ፒሊጲሲዮሴ ኣሳስ INTRO1 - ጋሞ ማጻፋጊዶ ቆፋ ጳዉሎሲ ሃ ኪታዛ ጻፊዳይ ማቂዶኒያ ጌቴቲዛ ኦሮሜ ካዎይ ሃሪዛሶን ዲዛ ፒሊጲሲዮሴ ጌቴቲዛ ዴሬን ዲዛ ዎሳ ኬይሳ። ሂና ሄ ዎሳ ኬያ ጳዉሎሲ ኮይሮ ኣዉሮፓን ኤሲዳ ዎሳ ኬዮ፤ ፒሊጲሲዮሴ ካታማን ዲዛ ኣሳፔ ዳሪዛ ባጋይ ኦሮሜ ቢታፌ ዪዳ ኣሳ፤ ሄሳፌ ዴንዲዳይሳን ዳሮቲ ኦቶሬቴቴስ። (ሃዋ 16፡21) ኢስታፌ ባጋይቲ ኪርስቶሳን ኣማኒዛይታ፤ ሄሳ ጊሻስ ባ ኣሳታን ኢጼቲዳይታኔ ጎዴቲዛይታ ጊዲዳ፤ ሄሲካ ኢስቲ ሃ ኣላሜ ዱሳን ማንቆ ጊዳና ማላ ኦዴስ። (2ቆሮ 8፡2) ጊዲኮካ ኢስቲ ኣማኖን ሚኒ ኤቂዲ ሃንኮ ኣማኒሼ ዋዬቲዛይታ ማዲዛይታ ጊዲዳ፤ ሄሳ ጋሶን ጳዉሎሲ ኢስታ ኣዳፌ ሲቄስ። ሃ ኪታይ ጻፌቲዳይ ጳዉሎሲ ቃሾሶን ዲሺን ሃንኮ ኣማኒዛ ኦሳንቻታፔ ኤቄቴ ኢዛ ጋኪን ፒሊጲሲዮሴን ዲዛ ዎሳ ኬይ ጋርሳን ዴንዲዳ ዎርዶ ቲሚርቴ ጋሶን ኢዛ ዎዚናይ ሜቂ ዲሺና። ጊዶ ኣቲን ሃ ኪታዛን ቆንጪ ቤቲዛይ ኡፋይሲኔ ኩሜ ኣማኔቴ። ጳዉሎሲ ሄሳ ሄ ኪታዛ ጻፊዳ ጋሶይካ ኢዚ ሜቶቲ ዲሺን ፒሊጶሲኔ ኣማኒዛ ኣሳይ ኢዛስ ማዶ ዬዲዳ ጊሻስ ኢስታ ጋላታናስኮ! ኢዛ ቦላ ጊዲን ዎይኮ ኢስታ ቦላ ዱማ ዱማ ሜቶቲ ጋኪኮካ ኢስታስ ዳሮ ጻላቴኔ ኩሜ ሚኖ ኣማኖይ ኢስታስ ዳና ማላ ኢዚ ኢስታ ሚንስ። ኦቶሬቴኔ ጬቄቴ ኣጊዲ ዬሱስ ኪርስቶሳ ኣሽኬቴን ኩማና ማላ ኢዚ ኢስታ ሚን ቆፍሴስ። ኢስቲ ዬሱስ ኪርስቶሳራ ኣያናን ኢሲኖ ጊዲዲ ዴሚዳ ዴኦዚ ጾሳ ኪያቴፌ ቤቲዳይሳኔ ኢስቲ ኣማኖን ኤኪዳይሳፌ ኣቲን ዎጋ ናጎን ቤቲዳይሳ ጊዴና ጊዲ ኢዚ ኢስታ ቆፍሴስ። ዬሱስ ኪርስቶሳራ ኢሲፌቴን ዲዛ ኡባታስ ጾሲ ኢስታስ ኢሚዛ ሳሮቴ ጊሻሲኔ ኡፋይሳ ጊሻሲካ ጻፊዴስ። ሃይሲ ሃ ኪታዚ ኤሬቲዛይ ኡፋይስ፥ ኣማኔቴ፥ ኢሲፌቴኔ ኣማኖን ዴኦን ሚኒ ኤቃና ማላ ቆንጪሲ ቤሲዛይሳና፤ ቃሴካ ሃዋሬ ጳዉሎሲ ፒሊጲሲዮሴ ዎሳ ኬዮ ዳሮ ሲቂዛይሳ ቆንጪሴስ። ሃ ማጻፋይ ኦይኪዳ ኩሜ ቆፋ ጌሎሶ 1፡1-11 ጳዉሎሳ ዱሳ ጊሻስ 1፡12-26 ኣማኖን ዱሳስ ሌሚሶ 1፡27—2፡18 ጺምቶሳኔ ኣፍሮዲጾ ቆፋ 2፡19-30 ኣማኖ ኢጺዛይታፔ ናጌታና ማላ ዮቶ 3፡1—4፡9 ጳዉሎሲ ፒሊጲሲዮሴን ኣማኒዛይታስ ሺሺዳ ጋላታኔ ዞሬ 4፡10-20 ኩሻ ቆፋ 4፡21-23 |
The Word for the World International amp The Word for the World Ethiopia