Markus 8 - Alkawal Kesal

Yeesu nyaamnii yimɓe dubuuje nayo (4 000)

¹ Nder balɗe ɗeen jama'aare ɗuuɗnde ɓesdi hawritgo to Yeesu. Nde laatii ɓe kororaaki nyaamdu, Yeesu noddi *almaajiri'en muuɗum vi'i ɓe :

² — Mi nanii jurumɗum nde'e jama'aare, gam hannde balɗe tati eɓe ngondi e am, nyaamdu maɓɓe boo horaaki.

³ To mi woorii ɓe, ɓe koota ɓe nyaamaay, ɓe ngiiltoto dow laawol, gam woɓɓe maɓɓe ivoyii to woɗɗi.

⁴ Almaajiri'en toontii mo mbi'i : — Toye keɓeten ko nyaamneten ɓe nder nde'e ladde ?

⁵ Yeesu ƴami ɓe vi'i : — Buroodiiji noye ngoonɗon ? Ɓe mbi'i : — Joveeɗiɗi.

⁶ Sey o vi'i jama'aare ndeen jooɗoo. O hooƴi buroodiiji joveeɗiɗi ɗiin, o yetti Allah, o senndi ɗi, o hokki almaajiri'en ma'ako nge'eda jama'aare, kamɓe boo ɓe nge'edi jama'aare ndeen.

⁷ Kadimaa eɓe ngoodi ngoɗkon liykon seɗɗa, sey o yetti Allah gam ma'akon, o vi'i almaajiri'en nge'eda kon kankon maa.

⁸ Jama'aare ndeen nyaami faa haari. Almaajiri'en kawriti ko hori, ɗum hebbini compooje joveeɗiɗi.

⁹ Yimɓe ɓeen njaharii faro dubuuje nayo (4 000). Ɓaawo ma'ajum o accootiri e maɓɓe.

¹⁰ Ɗoon e ɗoon o natti akali ndiyam, kanko e almaajiri'en ma'ako, ɓe ndilliri lesdi Dalmaatiya.

Fariisa'en e ngiɗi Yeesu waɗana ɓe kaayniiɗum

¹¹ *Fariisa'en ngari puɗɗi yeddootirgo e Yeesu. Eɓe ngiɗi godaago mo, sey ɓe torii mo o waɗana ɓe kaayniiɗum kolleyɗum to Allah o ivoyi.

¹² Yeesu resi ɓernde vi'i : — Gam ɗume onon yimɓe ndu'u jaamaniiru ngillotooɗon holleego kaayniiɗum ? Emi vi'a on goonga : walaa kaayniiɗum ko ɗum hollata yimɓe ndu'u jaamaniiru.

¹³ Ɓaawo ma'ajum, o woori ɓe, o natti akali, o funngitiri ngoya fonngo.

Ƴuufnirɗum Fariisa'en

¹⁴ *Almaajiri'en Yeesu njeggitii yooɓaago, buroodiiwol go'otol tan ɓe njogii nder akali maɓɓe.

¹⁵ Yeesu vaggini ɓe vi'i : — Kakkilee, ndeenee ko'e mooɗon e *ƴuufnirɗum *Fariisa'en e ɗum *Hiruudus.

¹⁶ Sey almaajiri'en puɗɗi volvugo hakkunde mu''en e mbi'a : — Koo maa gam en njooɓaaki buroodi o vi'ata ka ?

¹⁷ Nde Yeesu annditi ko ɓe mbi'ata, sey o vi'i ɓe : — Ko jeyi mbolvoton haala ciya buroodi ? Faa jo'oni on keɓtaay ? On pahamaay ? Ɓerɗe mooɗon no bumɗe naa ?

¹⁸ Ko jeyi on ngoodi gite, ammaa on ngi'iraay ɗe, on ngoodi noppi, ammaa on narraay ɗi ? On kiimtaaki naa ?

¹⁹ Wakkaci ko nyaamnumi yimɓe dubuuje njovo (5 000) e buroodiiji jovi, compooje noye kawritɗon ko hornaa ? Ɓe mbi'i : — Sappo e ɗiɗi.

²⁰ — Ee, wakkaci nde nyaamnumi yimɓe dubuuje nayo (4 000) e buroodiiji joveeɗiɗi fa, compooje noye kawritɗon ko hornaa ? Ɓe mbi'i : — Joveeɗiɗi.

²¹ Ndeen Yeesu vi'i ɓe : — Ee faa jo'oni on pahamaay naa ?

Yeesu vumtinii bumɗo nder si'ire Baytisayda

²² Yeesu e *almaajiri'en muuɗum njottii si'ire Baytisayda. Sey woɓɓe ngaddi bumɗo, ɓe torii Yeesu meema mo.

²³ Yeesu nanngi junngo bumɗo oon, yahari mo yaasi si'ire, tuuti joode e gite bumɗo oon, yowi juuɗe dow ma'ako, ƴami mo vi'i : — E woodi ko ngiiɗaa naa ?

²⁴ Bumɗo oon feeri gite vi'i : — Emi yi'a yimɓe kama leɗɗe, eɓe ngiilo.

²⁵ Sey Yeesu ɓesdi meemgo gite bumɗo oon. Bumɗo oon futtini gite muuɗum yamɗiti, o yi'i koo ɗume deydey.

²⁶ Yeesu vi'i mo : — Hoot wuro, ta'a vittu ngel ɗaa'e ci'el.

Biiturus vi'ii Yeesu woni Almasiifu

²⁷ Yeesu e *almaajiri'en muuɗum ndilliri ci'on ngonkon ha'ade si'ire Kaysaariya-Filipi. Dow laawol o ƴami ɓe, o vi'i : — Moye yimɓe mbi'ata yam ?

²⁸ Ɓe toontii mo, ɓe mbi'i : — Woɓɓe e mbi'a a Yahayya baɗoowo baptisma. Woɓɓe e mbi'a a annabi Iliya. Woɓɓe boo e mbi'a a go'oto nder annabo'en.

²⁹ O ƴami ɓe o vi'i : — Onon fa, moye mbi'oton yam ? Biiturus toontii mo vi'i : — Aan woni *Almasiifu.

³⁰ Yeesu ma'i ɓe korey, to' ɓe mbi'i ka koo moye.

Yeesu volvii dow maayde e ummitaaki muuɗum

³¹ Sey Yeesu fuɗɗi fahamingo ɓe, o vi'i : — Doole *Ɓii-Neɗɗo torree torraaji ɗuuɗɗi, arɗuɓe *Yahuudu'en e *mawɓe aardiiɓe diina e *moodiɓɓe Tawreeta kibina mo. O waree, ɓaawo balɗe tati o ummitoo nder maayde.

³² Yeesu vi'ii ɓe haala kaan e njaayri. Biiturus noddi mo vuttudu, fuɗɗi felgo mo.

³³ Ammaa Yeesu waylitii raari almaajiri'en horiiɓe, o nyaaɗani Biiturus o vi'i : — Woɗɗam, aan *Ceyɗaan ! Gam nyumo maaɗa ivoyaay to Allah, to yimɓe ngo ivi.

³⁴ Ndeen o noddi jama'aare e *almaajiri'en ma'ako, o vi'i ɓe : — Giɗɗo tokkugo yam fuu, sey wanya hoore muuɗum, vakkoo gaafagal muuɗum tokka yam.

³⁵ Gam giɗɗo hisnugo yonki muuɗum, no dulley ki. Ammaa dulluɗo yonki muuɗum gam am, e gam *Habaru Belɗum, no hisney ki.

³⁶ Ɗume ɗum nafata neɗɗo, to heɓii risku duuniyaaru fuu, ammaa dullii yonki muuɗum ?

³⁷ Koo boo ɗume neɗɗo waawi hokkugo gam soottaago yonki muuɗum ?

³⁸ Koo moye semti yam, miin e bolle am nder ndu'u jaamaniiru ndu hakke e ciya goonga, miin *Ɓii-Neɗɗo, to mi vittidoyii e malaa'ika'en seniiɓe e teddungal Baaba am, mi semtey mo.