Roma 7 - Ai Vola Tabu (Vakadewa Makawa Vakavoutaki 2021)

E Dua nai Dusidusi mai na Bula Vakawati

¹ Dou sa sega li ni kila, kemudou na veiwekani—ni'u sa vosa vei ira ga era sa kila na vunau—ni sa dauvauca na tamata nai vunau e na veisiga ni nona bula?

² Ia na yalewa sa vakawati, sa vauci koya na lawa vua na watina, ni sa bula tiko ko koya; ia kevaka sa mate na watina; sa qai sereki kina na yalewa mai na vunau ni veiwatini.

³ O koya ena vakatokai kina me dautagane, kevaka sa laki vakawati kei na dua tale na tagane, ni se bula tiko na watina. Ia kevaka sa mate na watina, sa qai sereki ga mai na lawa ko ya, ka na sega kina ni dautagane kevaka ena laki vakawati kei na dua tale na tagane.

⁴ Dou sa vakakina, na veiwekani ni dou sa qai sereki mai na vunau e na vuku ni yago i Karisito; mo dou vakawati vata kaya, io kei koya sa vakaturi cake tale mai na mate, ka me da vua kina vua na Kalou.

⁵ Ni da sa tiko vakayago ga, sa dautubu vakaukauwa e na veitikida na gagadre ca, sa tubu mai na vunau, me vuataki kina na mate.

⁶ Ia eda sa qai sereki mai na vunau, ni da sa qai mate ki na ka sa vauci keda; me da ia na veiqaravi e nai tovo vou ni yalo, ka segai e nai tovo makawa ni vunau.

Na Vunau kei nai Valavala Ca

⁷ A cava me da qai kaya? Sa ca li na vunau? E segai sara! Au a sega dina ni kila se cava nai valavala ca ke'u sega ni kila na vunau. Ni'u sa sega ni kila se cava na daukocokoco kevaka sa sega ni kaya na vunau, “Kakua ni kocokoco.”

⁸ Ia na ca, ni sa kaukauwa e na vuku ni vunau, sa vakatubura e lomaqu na gagadre ca kecega. Ni sa mate na ca ni sa sega na vunau.

⁹ Ia ka'u a bula ga eliu ni sa sega na vunau, ia ni sa lako mai na vosa ni vunau, sa bula tale na ca, ka'u sa qai mate kina.

¹⁰ Ia na vosa ni vunau, o koya sa yaco rawa kina na bula, ka'u sa kunea sa yaco kina na mate.

¹¹ Ni sa kaukauwa na ca, e na vuku ni vosa ni vunau, a sa temaki au kina, ka vakamatei au.

¹² Ia sa savasava na vunau, sa savasava talega nai vakaro, sa dodonu talega, ka vinaka.

¹³ Sa qai yaco beka na ka vinaka me ka me'u mate kina? E segai sara! A ca ga, me rairai kina ni sa ca, sa taura na ka vinaka me cakava kina vei au me'u mate; me rairai kina na ca me ca dina sara e na vuku ni vosa ni vunau.

Nai Tovo e Rua e Tu Vua na Tamata

¹⁴ Ni da sa kila sa ka vakayalo na vunau; ia koi au, au sa vakayago walega, ka'u sa volitaki ki na ca.

¹⁵ A ka ka'u sa kitaka tiko, au sa sega ni vinakata. Ni veika ka'u sa vinakata, au sa sega ni kitaka; ia na ka ka'u sa cata, au sa kitaka tiko.

¹⁶ O koya oqo kevaka ka'u sa kitaka na ka ka'u sa sega ni vinakata, au sa kaya kina ni sa vinaka na vunau.

¹⁷ Ia sa sega ni koi au dina sa kitaka, a ca ga sa tiko vei au.

¹⁸ Ni'u sa kila sa sega sara ni tiko vei au e na noqu i tovo vakayago e dua na ka vinaka. Ni sa tiko ga vei au na vinakata na ka vinaka, ia na kaukauwa me'u kitaka kina ka'u sa sega ni kunea.

¹⁹ Na ka vinaka ka'u sa vinakata, au sa sega ni kitaka; ia na ka ca ka'u sa sega ni vinakata, au sa kitaka ga.

²⁰ Ia oqo kevaka ka'u sa kitaka na ka ka'u sa sega ni vinakata, sa qai sega ni koi au dina ka kitaka, na ca ga sa tiko vei au.

²¹ Ka'u sa kunea kina e dua na vunau, ni gauna au via kitaka kina na ka vinaka, sa tiko volekati au sara na ca.

²² Ni'u sa taleitaka na vunau ni Kalou e na lomaqu dina,

²³ ia ka'u sa kunea e duatani na vunau e na veitikiqu, a rau sa veivala kei na vunau sa tu e na lomaqu, a sa vakabobulataki au ki na vunau ni ca, o koya sa tiko e na veitikiqu.

²⁴ A tamata vakaloloma koi au! O cei ena sereki au mai na yago ni mate oqo?

²⁵ Au sa vakavinavinaka vua na Kalou e na vuku ni noda Turaga ko Jisu Karisito. Ia sa qai vakaoqo, au sa qarava na vunau ni Kalou e na lomaqu dina, ia na vunau ni valavala ca e na noqu i tovo vakayago.