Roma 5 - Ai Vola Tabu (Vakadewa Makawa Vakavoutaki 2021)

Na Noda Vakadonui Vua na Kalou

¹ O koya oqo, ni da sa vakadonui e na vakabauta, me da sa qai veivinakati kei na Kalou e na vuku ni noda Turaga ko Jisu Karisito,

² e na vukuna talega eda sa torova rawa kina, e na vakabauta na loloma oqo eda sa qai tu kina; me da sa reki talega ni da sa nuitaka na veivakalougatataki ni Kalou.

³ A sa sega ni ko ya walega, me da sa daureki talega e na vuku ni veika rarawa, ni da sa kila sa tubu na dauvosota mai na ka rarawa,

⁴ ka tubu nai vakarau vinaka mai na dauvosota, kei nai nuinui mai nai vakarau vinaka,

⁵ ka sa sega na madua e na vuku ni nuinui, ni sa sovaraki ki na yaloda na loloma ni Kalou ni sa soli vei keda na Yalo Tabu.

⁶ Ni da se malumalumu voli, a sa mate na Karisito e na vuku ni tamata i valavala ca e na gauna taudonu.

⁷ Ka dina sara, ni sa sega ni dauyaco me mate e dua e na vukuna na tamata yalododonu—de sa rawa beka vua e dua me na mate e na vukuna e dua na tamata vinaka.

⁸ Ia na Kalou sa vakatakila na nona loloma vei keda, ni sa mate na Karisito e na vukuda ni da se tamata i valavala ca voli ga.

⁹ Ia ni da sa qai vakadonui oqo e na vuku ni nona dra, ena qai vakalevu cake sara na noda vakabulai e na vukuna mai na cudru ni Kalou.

¹⁰ Ni gauna eda a veimecaki voli kina, eda sa qai vakaduavatataki tale kei na Kalou e na vuku ni nona mate na Luvena, ka uasivi sara, ni da sa vakaduavatataki rawa, eda na vakabulai e na vuku ni nona bula.

¹¹ Ia sa sega ni ko ya walega, eda sa vakavinavinaka talega vua na Kalou e na vuku ni noda Turaga ko Jisu Karisito, o koya ka sa vakavuna me da ciqoma na veivakaduavatataki.

Ko Atama kei Karisito

¹² Ia me vaka sa curu ki vuravura nai valavala ca e na vuku ni tamata e lewe dua, kei na mate e na vuku ni valavala ca, a sa yaco vakakina na mate ki na tamata kecega, ni sa daucaka cala na tamata kecega—

¹³ ka sa tu ga eliu e vuravura nai valavala ca ni se bera ni soli nai vunau, ia sa sega ni wili nai valavala ca ke sa sega nai vunau.

¹⁴ Ia mai na gauna i Atama ka yacova na gauna i Mosese, a sa daulewa ko mate, ka vakakina vei ira talega era sa sega ni valavala ca me vaka na talaidredre i Atama, o koya ka nona i vakatakarakara ko koya sa lako mai e muri.

¹⁵ Ia nai solisoli loloma sa sega ni tautauvata kei na talaidredre. Ka kevaka sa mate na lewe vuqa e na vuku ni nona talaidredre na le dua, sa qai levu cake sara na kena yaco vakalevu vei ira na lewe vuqa na yalololoma ni Kalou kei na loloma soli wale e na vuku ni nona loloma na tamata e le dua, ko Jisu Karisito.

¹⁶ Erau sa sega ni tautauvata na ka sa yaco e na vuku ni nona cala e dua na tamata kei na loloma soli wale. Ni lewa ka sa tau-muria mai na talaidredre e dua bauga sa kauta mai na cudruvi, ia na loloma soli wale ka sa tau-muria mai na talaidredre e vuqa sa kauta mai na veivakadonui.

¹⁷ Ia, e na vuku ni talaidredre ni le dua, ka sa gumatua ko mate e na vuku ni talaidredre oqori, ena qai uasivi cake sara vei ira sa ciqoma na loloma levu kei na loloma soli wale ni yalododonu, me ra gumatua e na bula e na vukuna na le dua, ko Jisu Karisito.

¹⁸ O koya oqo, me vaka sa lewai me cudruvi na tamata kecega e na vuku ni nona cala e dua bau na tamata, sa vakayacori talega vakakina e na vuku ni nona valavala dodonu e dua bau na tamata me ra vakadonui ka vakabulai kina na tamata kecega.

¹⁹ Ka me vaka ni sa vakacalai na lewe vuqa e na nona talaidredre e dua bau na tamata, sa vakadonui vaka talega kina na lewe vuqa e na vuku ni nona talairawarawa e dua bau na tamata.

²⁰ Ia ni sa kau mai na vunau, sa tubu vakalevu nai valavala ca; ia ni sa tubu cake nai valavala ca, sa qai tubu cake vakalevu sara na loloma,

²¹ me rawa kina, me vaka ni sa gumatua nai valavala ca ki na mate, me gumatua vaka talega kina na loloma, e na vakadonui, ki na bula tawa mudu, e na vuku i Jisu Karisito na noda Turaga.