Roma 4 - Ai Vola Tabu (Vakadewa Makawa Vakavoutaki 2021)

Nai Vakaraitaki ko Eparaama

¹ A cava me da qai kaya sa rawata ko Eparaama na tamada, e nai valavala vakayago?

² Kevaka sa vakadonui ko Eparaama e na vuku ni cakacaka, sa qai dua na ka vua me dokai koya kina; ia ka sega ga e na mata ni Kalou.

³ A cava e kaya nai Vola Tabu? “Sa vakabauta na Kalou ko Eparaama, a sa okati vua mei valavala dodonu.”

⁴ Ia na kenai sau vua na tamata daucakacaka, sa sega ni okati me loloma, sa kenai voli ga.

⁵ Ia ko koya sa sega ni cakacaka, a sa vakabauti koya sa vakadonuya na tamata i valavala ca, sa okati vua na nona vakabauta mei valavala dodonu.

⁶ Sa vaka talega kina ko Tevita ni sa tukuna na kena kalougata na tamata, sa okata vua na Kalou nai valavala dodonu, ia ka sega e na vuku ni cakacaka:

⁷ “Sa kalougata ko ira sa vosoti na nodra i valavala ca, ka sa buluti na nodra caka cala;

⁸ sa kalougata na tamata sa sega ni beitaka vua nai valavala ca ko Jiova.”

⁹ Era sa kalougata beka vakaoqo ko ira ga era sa cili, se ra vaka talega kina ko ira sa sega ni cili? Ni da sa kaya, “Sa okati vei Eparaama na nona vakabauta mei valavala dodonu.”

¹⁰ Sa qai okati beka ni sa vakaevei? Ni sa cili oti ko koya, se ni sa sega ni cili? Sa sega ga ni sa cili oti, ni sa sega ga ni cili.

¹¹ A sa soli vua na veicili mei vakatakilakila, me vakadinadinataka ni sa vakadonui ko koya e na vuku ni nona vakabauta, ni sa sega tu ni cili; me yaco kina ko koya me tamadra kecega era sa vakabauta, ia ka ra sega ni cili; me okati vei ira talega nai valavala dodonu,

¹² me tamadra talega era sa cili, vei ira era sa sega ni cili walega, era sa muria talega nai vakarau ni vakabauta ko ya sa nei Eparaama na tamada ni se bera ni cili.

Sa Ciqomi na Yalayala ni Kalou ena Vakabauta

¹³ Ni sa sega ni yalataki vei Eparaama, se vei ira na nona kawa, mei taukei ni vuravura, e na vuku ni vunau, e na vuku ga ni veivakadonui sa yaco e na vakabauta,

¹⁴ ni sa mai vakatawayagataki na vakabauta, ia sa ka wale talega na vosa ni yalayala, kevaka sa taukena ko ira era sa muria na vunau.

¹⁵ Ni sa vakavuna na cudruvi na vunau; ia kevaka sa sega na vunau, sa sega talega nai valavala ca.

¹⁶ E na vuku ni ka oqo, sa ka ni vakabauta, me sa rawa kina me ka ni loloma, me tudei kina na vosa ni yalayala vei ira kecega na kawa, e sega vei koya walega sa tu vua na vunau, vei koya talega sa tu vua na vakabauta i Eparaama (o koya sa tamada kecega,

¹⁷ me vaka sa volai, “Au sa qisi iko mo tamadra na veivanua e vuqa”) — e matana na Kalou ka sa vakabauta ko koya, o koya sa solia na bula vei ira na mate, ka sa kaciva me basika na veika e se bera ni basika.

¹⁸ Ia ni sa sega na ka me nuinui kina, sa vakabauta ko koya, ka vakanuinui, me yaco me “tamadra na veivanua e vuqa,” me vaka sa tukuni, “Ena vakakina na nomu kawa.”

¹⁹ Ia ni sa sega ni malumalumu na nona vakabauta, sa sega ni vakasamataka na yagona ni sa qase ka ni sa dua beka na drau na nona yabaki, se na leqa ni kunekune e na kete i Sera.

²⁰ A sa sega talega ni lomalomarua me tawa-vakabauta na vosa ni yalayala ni Kalou, ia sa kaukauwa ga na nona vakabauta ni sa vakarokorokotaka na Kalou,

²¹ ka sa vakadinata sara ni sa rawarawa vua na Kalou me vakayacora na ka sa yalataka.

²² O koya oqo “sa okati kina vua mei valavala dodonu.”

²³ Ia sa sega e na vukuna duaduaga sa volai kina “ni sa okati vua;”

²⁴ e na vukuda talega, ni na okati vaka talega kina vei keda, kevaka eda sa vakabauti koya sa vakatura cake tale na noda Turaga ko Jisu mai na mate;

²⁵ o koya ka soli yani e na vuku ni noda i valavala ca, a sa vakaturi cake tale me da vakadonui kina.