Roma 16 - Ai Vola Tabu (Vakadewa Makawa Vakavoutaki 2021)

Na Veitataunaki kei na Vakanuinui Vinaka

¹ Ia ka'u sa tataunaki Fipi yani vei kemudou, o koya na wekada, o koya sa dauqarava nai soqosoqo lotu mai Kenikiria,

² ka mo dou vakacegui koya e na vuku ni Turaga, me vaka sa kilikili kei ira era sa lotu, ka vukei koya e na cakacaka kecega dou na yaga kina vua, ni sa dau vukei ira na lewe vuqa ko koya, kei au talega.

³ Me tukuni yani na noqu loloma vei rau ko Virisila kei Akuila, koi rau sa cakacaka vata kei au e na veika i Karisito Jisu,

⁴ ka rau sa bolea na mate me'u bula kina. Keitou sa vakavinavinaka kina vei rau, keitou kei ira kece na veisoqosoqo lewe ni lotu vei ira na veimatanitu tani.

⁵ Au loloma talega vei ira nai soqosoqo lotu e na nodrau vale. Au sa loloma vei Avenito, na tamata ka'u sa dau lomana, o koya nai sevu ni vakabauti Karisito mai Esia.

⁶ Au sa loloma vei Meri, o koya sa daucakacaka vakalevu e na vukumudou.

⁷ Au sa loloma vei Adroniko kei Junia, na wekaqu, keitou a vesu vata kei rau, a rau sa rogo vei iratou nai apositolo, erau sa nei Karisito eliu, au sa muri koi au.

⁸ Au sa loloma vei Abilia, o koya ka'u sa dau lomana e na vuku ni Turaga.

⁹ Au sa loloma vei Urubeni, o koya sa dauvukei keitou e na cakacaka i Karisito, kei Sateki, o koya ka'u sa dau lomana.

¹⁰ Au sa loloma vei Apeli sa dauvinakati e na veika i Karisito. Au sa loloma vei ira na lewe ni vuvale i Arisitopulo.

¹¹ Au sa loloma vei Erotiani na wekaqu. Au sa loloma vei ira na lewe ni vuvale i Narikiso, era sa nona ga na Turaga.

¹² Au sa loloma vei Taraivini kei Taraivosa, erau daucakacaka e na veika ni Turaga. Au sa loloma vei Perisi sa daulomani, o koya sa daucakacaka vakalevu e na veika ni Turaga.

¹³ Au sa loloma vei Rufu, o koya sa digitaki me nona na Turaga; ka'u loloma vei tinana—o koya ka sa tinaqu talega.

¹⁴ Au sa loloma vei Asinikirito, kei Filekoni, kei Erima, kei Patiropa, kei Erimi, kei ira na veiwekani sa tiko vata kei iratou.

¹⁵ Au sa loloma vei Filoloko, kei Julia, kei Niriu, kei na ganena, kei Olimipa, kei ira kecega era sa lotu, era sa tiko vata kei iratou.

¹⁶ Dou ia na loloma vakai kemudou e na veireguci e na yalosavasava. Sa loloma yani vei kemudou na veisoqosoqo lewe ni lotu kecega nei Karisito.

Nai Tinitini ni Vakasala

¹⁷ Ia ka'u sa vakamasuti kemudou, na veiwekani, mo dou kilai ira era sa vakatekivuna na veisei kei na veika e dauveivakatarabetaki, sa sega ni vaka nai vakavuvuli dou sa vakatavulici kina; ia kakua ni veiriti kei ira.

¹⁸ O ira era sa vakaoqo, era sa sega ni qarava na noda Turaga na Karisito, na ketedra ga; ia e na vosa vinaka ka kamikamica, era sa lawakitaka na lomadra era sa wele.

¹⁹ Ni sa kuruvaki ki na tamata kecega na nomudou talairawarawa. O koya oqo ka'u sa rekitaki kemudou kina, ia sa yaloqu ga mo dou vuku e na ka vinaka, mo dou kakua talega ni cala e na ka ca.

²⁰ Ia na Kalou ni veivakacegui ena butuki Setani vakusarawa e ruku ni yavamudou. Me tiko vei kemudou na loloma ni noda Turaga ko Jisu Karisito. Emeni.

²¹ Sa loloma yani vei kemudou ko Timoci na noqu i tokani, kei Lusiu, kei Jesoni, kei Sosipeta, ko iratou na wekaqu.

²² Oi au ko Teritiu, ka vola nai vola oqo, au sa loloma yani vei kemudou e na Turaga.

²³ Sa loloma yani vei kemudou ko Keio, o koya ka'u sa dautiko e nona vale, kei ira kecega nai soqosoqo lotu. O Erasito na dauniyau ni koro oqo sa loloma yani vei kemudou, kei Kuaritu na wekada.

²⁴ Me tiko vei kemudou kecega na loloma ni noda Turaga ko Jisu Karisito. Emeni.

Tini ena Masu ni Veivakacaucautaki

²⁵ Ia oqo, ki vua na Kalou sa rawata me vakataudeitaki kemudou me vaka na noqu i tukutuku-vinaka kei na vunautaki i Jisu Karisito, me vaka na vakatakilai ni ka vuni ka tabonaki tu mai vakabalavu

²⁶ ia ka sa qai vakaraitaki mai oqo, ka sa volai e na nodra i vola na parofita ka vakatakilai ki na veivanua kecega, me vaka na lewa ni Kalou tawa mudu, me rawa kina na talairawarawa ni vakabauta—

²⁷ io, ki vua na Kalou sa vuku duaduaga, me ia na vakarokoroko e na vuku i Jisu Karisito, ka sega ni mudu. Emeni.