Roma 12 - Ai Vola Tabu (Vakadewa Makawa Vakavoutaki 2021)

Bula ni Veiqaravi Vua na Kalou

¹ O koya oqo, au sa vakamamasu kina vei kemudou na veiwekani, e na vuku ni yaloveivosoti ni Kalou, mo dou solia na yagomudou mei madrali bula, me savasava, me vinaka vua na Kalou, me nomudou i soro vakayalo.

² Dou kakua ni vakatauvatani kemudou kei ira era sa vakavuravura, ia mo dou veisau ga mai na kena vakavoui na nomudou vakasama, ka mo dou kila rawa kina na loma ni Kalou—na ka sa yaga, ka vinaka, ka dodonu sara.

³ Ia e na loloma sa soli mai vei au, au sa kaya vei ira na tamata yadua vei kemudou, me kakua e dua me dokai koya me vaka sa sega ni dodonu me dokai koya, ia me yalomatua ga na nona nanuma, me vaka nai vakarau ni vakabauta sa vota na Kalou vei ira yadua.

⁴ Me vaka sa dua bauga na yagoda, ka vuqa na tikida, ia ka sa sega ni vakaitavi vata na tikida kecega,

⁵ sa vakakina koi keda, na lewe vuqa, eda sa yago vata ni da tu vata kei Karisito, eda sa veitikina vaka talega vakai keda.

⁶ Ni da sa rawata na veisolisoli sa duidui me vaka na loloma sa soli vei keda: kevaka sa parofisai, me da parofisai me vaka nai vakarau ni noda vakabauta;

⁷ se na dauveiqaravi, me da ia na veiqaravi; se ko koya sa dauvakatavuvuli, me vakatavuvuli tiko;

⁸ se ko koya sa dauveivakayaloqaqataki, me veivakayaloqaqataki tiko; o koya sa ia na dausolisoli, me dina na lomana; o koya sa veiliutaki, me gumatua kina; o koya sa dauloloma, me ia e na reki.

Nai Vakatakilakila ni Tamata Lotu Dina

⁹ Me kakua ni vakailasu na loloma. Dou cata na ca, ka taura matua na ka vinaka.

¹⁰ Dou veilomani sara e na veilomani ni veitacini; dou veiuasiviti e na veivakarokorokotaki.

¹¹ Dou kakua ni vucesa mai e na lomakatakata, ia me gumatua tikoga na yalomudou, ka dauqarava na Turaga.

¹² Dou reki e nai nuinui, vosota na ka rarawa, ka yalodina tikoga e na masu.

¹³ Dou veivotai vei ira era gadreva na veivuke e na kedra maliwa era sa lotu, ka dau vakacegui ira na vulagi.

¹⁴ Dou vosavakalougatataki ira era sa vakacacani kemudou; vosavakalougatataka ga, ka kakua ni rukaka.

¹⁵ Dou reki vata kei ira era sa reki, ka tagi vata kei ira era sa tagi.

¹⁶ Dou lomavata tiko vakai kemudou. Kakua ni dou viavialevu, ia mo dou veiriti ga kei ira na tamata era dauraici sobu. Dou kakua ni raici kemudou cake ni dou sa vuku.

¹⁷ Kakua ni veisausaumitaka na nona ca e dua. Nakita eliu na veika sa dodonu e na matadra na tamata kecega.

¹⁸ Kevaka sa rawa, ni sa vakatautaki ga vei kemudou, dou bula veilomani kei ira na tamata kecega.

¹⁹ Oi kemudou sa lomani, dou kakua ni sauma na ca sa caka vei kemudou, ia mo dou laiva ga vua na Kalou me sauma, ni sa volai, “A noqu i tavi me'u cudruvaka, au na sauma koi au, sa kaya na Turaga.”

²⁰ E na kena veibasai, “O koya mo qai vakania na nomu meca kevaka sa viakana; kevaka sa viagunu, mo vagunuvi koya; ko na binia kina ki na uluna na qilaiso sa waqa tu ni ko sa kitaka vakaoqo.”

²¹ Me kakua ni rawai iko na ca, mo rawa ga na ca e na vinaka.