Neumi 2 - Ai Vola Tabu (Vakadewa Makawa Vakavoutaki 2021)

Sa Cudruvi na Koro Daucaka Ca

¹ Sa lako cake mai kivei iko ko koya na dauveivakarusai. Vakatawa na koro vakabai; yadrava na sala; vauca matua na tolomu; vakaukauwataki iko mo kaukauwa sara.

² Ni sa vakasuka mai ko Jiova na nodra lagilagi na Jekope, me vaka na nodra lagilagi na Isireli, ni ra a vakacacani ira ko ira na dauvakacaca, ka ra sa vakarusa na taba ni nodra vaini.

³ Sa vakadamudamutaki nai sasabai ni nona tamata qaqa; era sa vakaisulu e nai sulu kulakula ko ira na tamata i valu. Sa vakaiyaragi e nai sele-takelo makumakualiliva e na qiqi-ni-valu e na siga sa vakarau kina ko koya; ia na moto ena kabei vakaidina.

⁴ Sa lako vakaivalu tu na qiqi-ni-valu e na gaunisala, sa veiciciyaki e na salatu; sa ra na rairai vaka na cina, sa vaka na liva na nodra cici.

⁵ Sa nanumi ira mai ko koya na nona qaqa; era sa toqi tu e na nodra lako voli; sa ra kusarawa yani ki na bai ni koro, a sa vakarautaki mai na suva.

⁶ Sa basuki mai nai sogo ni uciwai, ia na vale levu sa luvu laivi yani.

⁷ Sa vakabobulataki ko Usapi, sa kau cake yani, ia na nona vada sa ra liutaki koya ka tagi lako me vaka na ruve, ka tavia tiko na lomaseredra.

⁸ Ko Ninive sa vaka e dua na drano ka sa dro na kena wai. Dou tu vakadua! Dou tu vakadua!— ia sa sega ga e vuki lesu.

⁹ Dou tokitaka na siliva, tokitaka na koula! Ni sa sega ni oti rawa nai yau e bini tu! Sa levu sara nai yaya domoni kecega.

¹⁰ Sa lala, sa lala didi, sa lala didi sara! Ia na yalodra sa waicala ka sa dui veiyaviti na durudra; sa yaluma kece sara talega na tolodra; sa rairai malumalumu na matadra kecega!

¹¹ Sa evei na nodra i tikotiko na laione, kei na nodra i kanakana na luve ni laione, na yasana ka lako voli kina na laione, na laione yalewa kei na luve ni laione, ka sa sega e dua me vakarerea?

¹² Na laione sa daudresulaka na kedra na luvena, ka cova na kedra na nona laione yalewa; ka sa vakasinaita na nodra qara e na ka sa dresulaka kei na nodra i kotokoto e na ka e cova.

¹³ Raica, koi au na nomu meca, sa kaya ko Jiova-ni-lewevuqa, ia ka'u na vakama na nona qiqi-ni-valu me kubou; ia ena kani ira na nomu luve ni laione nai seleiwau; ka'u na muduka tani talega mai vanua na ka ko sa dresulaka, ena sega talega ni rogoci tale na domodra na nomu i talaki.