NA SAME 98 - Ai Vola Tabu (Vakadewa Makawa Vakavoutaki 2021)Me Laveti ko Koya sa Lewai Vuravura A Same. 1 Dou seretaka vei Jiova na sere vou, ni sa cakava oti na veicakacaka mana. A ligana i matau kei na ligana daucaka dodonu sa rawa kina na veivakabulai. 2 Sa vakatakila ko Jiova ni sa dauia na veivakabulai ko koya; sa vakaraitaka votu na nona caka dodonu e na matadra na veimatanitu. 3 Sa nanuma ko koya na nona yalololoma kei na nona lomadina kivei ira na vuvale i Isireli. Sa kunea nai yalayala kecega kei vuravura ni sa dauia na veivakabulai na noda Kalou. 4 Dou ia na sere vei Jiova, na vuravura kecega; dou lagata sara, dou kaila e na reki, dou ia na vakavinavinaka. 5 Dou sere vei Jiova ka qiri api, io na api kei na domo ni same. 6 E na davui kei na domo ni koneti, dou ia na sere e na mata i Jiova, na Tui. 7 Me vadugu mada na wasawasa, kei na veika e sinai kina; ko vuravura kei ira era sa tiko kina. 8 Me vakasausau na uciwai; me reki vata na veiulunivanua 9 e na mata i Jiova, ni sa lako mai me lewai vuravura. Ena lewai vuravura e na yalododonu, kei ira na tamata e na lewa dodonu. |