NA SAME 95 - Ai Vola Tabu (Vakadewa Makawa Vakavoutaki 2021)

A Sere ni Vakacaucau

¹ Tou mai sere vei Jiova; tou mai ia na meke vua na uluvatu ni noda bula!

² Tou lako mada mai e matana e na vakavinavinaka, ka reki ni da mai ia vua na same.

³ Ni sa Kalou levu ko Jiova, ka sa Tui levu vei ira na kalou kecega.

⁴ Sa tiko e ligana na vanua titobu kei vuravura; ka sa nona talega na veiulunivanua cecere.

⁵ Sa nona na wasawasa, ni sa bulia ko koya; ka sa bulia na vanua mamaca na ligana.

⁶ Tou mai lotu ka cuva sobu; tou mai vakatekiduru e na mata i Jiova, o koya ka buli keda!

⁷ Ni sa noda Kalou ko koya, koi keda na tamata ni nona vanua, kei na sipi sa tubera ko koya. O koya oqo e na siga edaidai mo dou qai rogoca na domona!

⁸ Dou kakua ni vakaukauwataka na yalomudou, me vaka e na veivakacudrui, me vaka e na siga ni dauvere mai na vanua lala,

⁹ era sa dauveretaki au kina ko ira na nomudou qase, ka vakatovolei au vakaca, ni ra sa raica tiko na noqu cakacaka.

¹⁰ E vasagavulu na yabaki ka'u a rarawa kina vei ira nai tabatamata ko ya, ka kaya, “Era tamata ka daulako sese e lomadra, ka ra sa sega ni kila na noqu i valavala.”

¹¹ Ia ka'u a bubului kina vakaoqo vei ira e na noqu cudru, “Era na sega ni curu ki na noqu i vakavakacegu.”