NA SAME 94 - Ai Vola Tabu (Vakadewa Makawa Vakavoutaki 2021)

Na Kalou sa Lewa na Veika Kecega

¹ I Jiova na Kalou, sa nomuni tavi na veisausaumi; na Kalou, sa nomuni na veisausaumi, mo ni vakatakilai kemuni mai!

² Mo ni tucake, oi kemuni ka dau lewai vuravura; mo ni saumi ira mada na viavialevu!

³ A cava na kena dede na nodra reki tiko nai valavala ca? Ia ka cava na kena dede, i Jiova?

⁴ Era cavuta ka vosataka tiko na ka rarawa, era dokadokai ira tiko ko ira kecega nai valavala ca.

⁵ Era sa tukilaka, Jiova, na nomuni tamata, ka vakararawataka na nomuni votavota.

⁶ Era sa vakamatea na yada kei na vulagi, ka labati ira na gone e sega ni vakatamani.

⁷ Era sa kaya ga, “Ena sega ni raica ko Jiova; ena sega ni nanuma na Kalou i Jekope.”

⁸ Dou yalomatua mai na yalovakamanumanu vei ira na tamata; ia dou na vuku ninaica, koi kemudou na lialia?

⁹ O koya sa tea na daligada, ena sega beka ni rogo rawa? O koya sa bulia na matada, ena sega beka ni rai rawa?

¹⁰ O koya sa vunauci ira na veimatanitu, ena sega beka ni vunauci kemudou? O koya sa vakavulica na tamata me kila-ka, ena sega beka ni kila-ka ko koya?

¹¹ Sa kila ko Jiova na ka e vakanananu kina na tamata, ni sa ka walega.

¹² Sa kalougata, Jiova, na tamata ko ni sa vunauca, ka vakavulici koya e na nomuni vunau;

¹³ mo ni vakacegui koya kina mai na siga ni rarawa, ka me keli mada eliu na kedrai bulubulu nai valavala ca.

¹⁴ Ni na sega ni biuta na nona tamata ko Jiova, ka na sega ni laivi ira na nona i votavota.

¹⁵ Ia ena vuki na lewa me dodonu; a ra na muria ko ira kecega na yalododonu.

¹⁶ O cei ena tucake mai me totaki au me'u vorati ira nai valavala ca? O cei ena tu mai me vukei au me'u vorati ira na caka cala?

¹⁷ Kevaka sa sega ni noqu dauniveivuke ko Jiova, sa voleka ni tiko vagagalu na yaloqu.

¹⁸ Ni'u a kaya, “Sa tidara na yavaqu”, ia sa qai tokoni au, i Jiova, na nomuni loloma tudei.

¹⁹ Ni sa levu na lomaocaoca ni lomaqu, sa vakamarautaka na yaloqu na nomuni dauveivakacegui.

²⁰ Ena duavata li kei kemuni nai tikotiko vakaturaga ni valavala ca, o koya sa vakayacora na ka ca e na lawa?

²¹ Era sa soqoni ira vata me ra vakacacana na yalona na yalododonu, ka vakacala na tamata sa sega ni cala.

²² Ia sa noqu i drodro ko Jiova, kei na noqu Kalou, na uluvatu ka'u sa vakaruru kina.

²³ Ia ena sauma vei ira na nodra cala, ka muduki ira e na nodra ca; io, ena muduki ira laivi ko Jiova na noda Kalou.