NA SAME 89 - Ai Vola Tabu (Vakadewa Makawa Vakavoutaki 2021)

Na Veiyalayalati ni Kalou kei Tevita

A Masikili i Icani na Eseraaiti.

¹ Au na seretaka na yalololoma i Jiova ka sega ni mudu; na gusuqu ena tukuna na nomuni yalodina ki nai tabatamata kecega.

² Ni'u a kaya, “Ena tara cake na loloma me sega ni mudu; o ni na vakataudeitaka na nomuni yalodina me vaka na lomalagi.”

³ Ko ni a kaya, “Au sa ia oti na veiyalayalati kei koya ka'u sa digitaka, au sa bubului vei Tevita na noqu tamata:

⁴ ‘Au na vakataudeitaka me sega ni mudu rawa na nomu kawa, au na tara cake na nomu i tikotiko me yacova nai tabatamata kecega.’ ” Sela

⁵ Ia na lomalagi ena vakavinavinaka e na vuku ni nomuni cakacaka mana, i Jiova, kei ira nai soqosoqo ni tamata yalosavasava e na vuku ni nomuni yalodina.

⁶ Ia ko cei mai lomalagi me vakatauvatani kei Jiova? O cei vei ira na luve ni qaqa me tautauvata kei Jiova,

⁷ sa rerevaki vakalevu na Kalou e na nodra i soqosoqo na yalododonu, me vakarokorokotaki talega vei ira kecega era sa tiko vakavolivoliti koya?

⁸ I Jiova na Kalou-ni-lewevuqa, o cei sa kaukauwa me vakataki kemuni, Jiova? Se vaka na nomuni yalodina sa vakavolivoliti kemuni?

⁹ O ni sa lewa na cudru ni wasawasa; ni sa tubu na kena biau, o ni sa vakamaravutaka.

¹⁰ O ni a vorolaki Reapi, me vaka e dua sa vakamatei; o ni a vakasavi ira na nomuni meca e na ligamuni kaukauwa.

¹¹ Sa nomuni na lomalagi, sa nomuni talega ko vuravura; o vuravura kei na ka kecega sa tiko kina—ko ni a tauyavutaka.

¹² Na vualiku kei na ceva—ko ni a cakava; o Tepori kei Erimoni ena rekitaka na yacamuni.

¹³ Sa kaukauwa sara na ligamuni; sa kaukauwa na ligamuni, sa cecere na ligamuni matau.

¹⁴ Ai tutu ni nomuni tikotiko vakaturaga na yalododonu kei na lewa dodonu; ena liu ga e matamuni na loloma kei na yalodina.

¹⁵ Sa kalougata na tamata era kila na rorogo vinaka, era na lako voli, Jiova, e na rarama ni matamuni;

¹⁶ era na rekitaka na yacamuni e na veisiga, era na vakaceceretaki talega e na nomuni cakacaka dodonu.

¹⁷ Ni kemuni sai ukuuku ni nodra kaukauwa; ena laveti talega na neimami totoka e na nomuni yalovinaka.

¹⁸ Ni sa nei Jiova na noda i sasabai, ka sa nei Koya na Yalosavasava ni Isireli na noda tui.

¹⁹ O ni a qai vosa e na raivotu vua na nomuni parofita yalododonu, ka kaya: “Au sa solia na kaukauwa vua sa qaqa; au sa vakaceceretaki koya sa digitaki mai vei ira na tamata.

²⁰ Au a kunei Tevita, na noqu tamata; au sa lumuti koya e na noqu waiwai tabu;

²¹ ena tiko dei vua na ligaqu; a tabaqu talega ena vakaukauwataki koya.

²² Ena sega ni vakasaurarataki koya rawa na meca, ka na sega ni vakamalumalumutaki koya rawa na luve ni caka ca.

²³ Au na mokuti ira sobu e matana na nona meca ka yaviti ira era cati koya.

²⁴ Ia ena tiko kaya na noqu yalodina kei na noqu loloma; e na vuku ni yacaqu talega ena laveti na nona totoka.

²⁵ Au na vakayacora talega na ligana ki na waitui kei na ligana i matau ki na veiuciwai.

²⁶ Ena kacivaka vei au ko koya, ‘Oi kemuni na tamaqu, na noqu Kalou, kei na Uluvatu ka'u sa vakabulai kina!’

²⁷ Au na lesi koya talega me noqu ulumatua, me cecere cake vei ira na tui kei vuravura.

²⁸ Au na vakabauta tiko na noqu loloma vua ka sega ni mudu, ena tudei talega kaya na noqu veiyalayalati.

²⁹ Au na vakataudeitaka na nona kawa me sega ni mudu, ena vaka talega na gauna ni lomalagi na nona i tikotiko vakaturaga.

³⁰ Kevaka era biuta na noqu vunau ko ira na luvena ka sega ni muria na noqu lewa,

³¹ kevaka era vakacacana na noqu i lesilesi ka sega ni vakabauta na noqu i vakaro,

³² ka'u na qai sauma na nodra bese e nai waro kei na nodra i valavala ca e na kuita;

³³ ia ka'u na sega ni kauta laivi mai vua na noqu loloma, se lasutaka na noqu vosa dina.

³⁴ Au na sega ni vakacacana na noqu veiyalayalati, se vakatanitaka na vosa sa cavuta na tebenigusuqu.

³⁵ Au sa bubului vakadua e na noqu yalododonu; me'u kakua ni lasu vei Tevita.

³⁶ Ena sega sara ni mudu na nona kawa, ena vaka na mata-ni-siga e mataqu na nona i tikotiko vakaturaga.

³⁷ Ena vakataudeitaki me vaka na vula ka me sega ni mudu, ka vaka nai vakadinadina levu mai lomalagi.” Sela

³⁸ Ia ko ni sa biuta ka vakasisilataka; ko ni sa cudru vua ko ni a lumuta.

³⁹ O ni sa vakatawayagataka na nomuni veiyalayalati kaya na nomuni tamata; o ni sa cakava me ka wale na nona i sala vakaturaga ni kemuni sa biuta ki na soso.

⁴⁰ O ni sa basuraka kecega na nona bai; o ni sa vakarusa sara na nona bai ni valu kaukauwa.

⁴¹ Sa betiraki koya ko ira kece sa lako voli e na sala; sa rogo ca vei ira era tiko voleka vua.

⁴² O ni sa vakaukauwataka na ligadra i matau era sa vakararawataki koya; o ni sa vakamarautaki ira na nona meca kecega.

⁴³ O ni sa vakatawayagataka na bati ni nona i seleiwau, ka sega ni vukei koya me tu rawa e nai valu.

⁴⁴ O ni sa vakaotia na nona i ukuuku, ka biuta ki na soso na nona i tikotiko vakaturaga.

⁴⁵ O ni sa vakalekalekataka na gauna ni nona cauravou; o ni sa vakaisulutaki koya e na madua. Sela

⁴⁶ A cava na kena dede, Kemuni Jiova? Ena sega beka ni mudu na nomuni vunitaki kemuni? Ena waqa beka me vaka na bukawaqa na nomuni cudru?

⁴⁷ Mo ni nanuma na kena lekaleka ni noqu bula— ka cava ko ni a bulia kina na luve ni tamata kecega me ra ka walega?

⁴⁸ O cei na tamata sa bula tiko ka na sega ni kunea na mate? Ena vakabulai koya li mai na liga ni bulubulu? Sela

⁴⁹ Kemuni na Turaga sa evei na nomuni yalololoma eliu, o ni a bubului kina vei Tevita e na nomuni yalodina?

⁵⁰ Kemuni na Turaga, mo ni nanuma na kedrai rogo ca na nomuni tamata; au sa colata voli e lomaqu na nodra vosa ca na veimatanitu kecega e vuqa,

⁵¹ era sa vosa ca kina, Jiova, ko ira na nomuni meca, era sa vosacataka kina na nona i lakolako ko ni a lumuta.

⁵² Me vakarokorokotaki ko Jiova ka sega ni mudu. Emeni, Emeni.