NA SAME 88 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke e na Vuku ni Rarawa Levu

A Sere. A nodra Same na luve i Kora. Vua nai liuliu ni sere: me vaka na Maalaca Leanoca. A Masikili i Imani na Eseraaiti.

¹ Kemuni Jiova na Kalou sa dauvakabulai au, ka'u a tagi e na siga kei na bogi e matamuni,

² me rairai e matamuni na noqu masu; mo ni vakalakala daligamuni ki na noqu tagi.

³ Ni sa luvu na lomaqu e na ka rarawa, ia ka'u sa toro voleka ki nai bulubulu.

⁴ Au sa wili vata kei ira era sa lako sobu ki nai bulubulu; au sa vaka na tamata sa sega vua na kaukauwa,

⁵ sa biu tu kei ira na mate, me vakataki ira na moku era sa koto e nai bulubulu, o ira ko ni sa sega ni nanuma tiko, a ra sa tawase tani mai na ligamuni.

⁶ O ni sa biuti au ki na boto ni qara, e na vanua butobuto, e loma ni wai titobu.

⁷ Sa bitaki au na nomuni cudru, ia ko ni sa vakararawataki au ni sa sevi au na nomuni biau kecega. Sela

⁸ O ni sa vakayawataka vei au na wekaqu; o ni sa soli au me'u sevaki vei ira. Au sa sogolati, ka sega ni lako tani rawa;

⁹ sa tagi na mataqu e na vuku ni rarawa. I Jiova, ka'u a tagi vei kemuni e na veisiga kecega; ka'u sa dodoka yani na ligaqu vei kemuni.

¹⁰ Ko ni na cakava li na cakacaka mana e na vukudra na mate? Ena tucake li na mate ka vakavinavinaka vei kemuni? Sela

¹¹ Ena tukuni li na nomuni yalololoma e nai bulubulu, se na nomuni yalodina e na vanua ni rusa?

¹² Ena kilai li na nomuni cakacaka mana mai na vanua butobuto, se na nomuni cakacaka dodonu mai na vanua e dau guileca kina na ka?

¹³ Ia koi au ka'u sa tagi oti vei kemuni Jiova; ia ena yaco kivei kemuni e na mataka na noqu masu.

¹⁴ I Jiova, a cava ko ni sa biuta tani kina na yaloqu? A cava ko ni sa vunia kina vei au na matamuni?

¹⁵ Oi au ka'u sa vakararawataki ka voleka ni mate ni'u sa cauravou ka yacova na siga oqo, au sa domobula ni sa bitaki au na ka rerevaki mai vei kemuni.

¹⁶ Sa luvuci au na nomuni cudru waqawaqa; sa muduki au tani na nomuni veivakarerei.

¹⁷ Sa vakavolivoliti au e na veisiga kecega me vaka na wai; sa lako vata mai ka voliti au.

¹⁸ O ni sa vakayawataka vei au na wekaqu kei koya sa lomani au; ka kauti ira keitou sa dauveikilai ki na butobuto.