NA SAME 86 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke

A Masu i Tevita.

¹ Mo ni vakalakala mai na daligamuni, Jiova, mo ni rogoci au, ni'u sa rarawa ka dravudravua.

² Mo ni maroroya na yaloqu, ni'u sa yalododonu; oi kemuni na noqu Kalou, mo ni vakabula na nomuni tamata sa vakararavi vei kemuni.

³ Mo ni yalololoma mai vei au, kemuni na Turaga, ni'u sa tagi vei kemuni e na veisiga.

⁴ Mo ni vakamarautaka na yalona na nomuni tamata, ni'u sa vagolea cake vei kemuni na Turaga, na yaloqu.

⁵ Ni kemuni sa Turaga dauyalovinaka, ka dauveivosoti; ka dau levu na nomuni loloma vei ira kecega era tagi vei kemuni.

⁶ Mo ni vaqara daligamuni mai, Jiova, ki na noqu masu; ka vakarorogo ki na domo ni noqu kerekere.

⁷ E na siga ka'u rarawa kina ka'u na masuti kemuni, ni kemuni na vosa mai vei au.

⁸ Sa sega e dua vei ira na kalou sa vakataki kemuni na Turaga, ka sa sega na cakacaka me tautauvata kei na nomuni cakacaka.

⁹ Na veimatanitu kecega ko ni a cakava era na lako mai ka soro vei kemuni na Turaga, ka ra na vakarokorokotaka na yacamuni.

¹⁰ Ni sai kemuni ka levu, ka sa cakava na ka e veivakurabuitaki; sai kemuni duaduaga na Kalou.

¹¹ Mo ni vakavulici au, Jiova, e nomuni sala, au na muria na nomuni vosa dina; mo ni vakaduavatataka na lomaqu me rerevaka na yacamuni.

¹² Au na vakavinavinaka vei kemuni na Turaga na noqu Kalou, e na yaloqu taucoko, au na vakarokorokotaka na yacamuni ka sega ni mudu.

¹³ Ni sa ka levu na nomuni loloma vei au; ko ni sa vakabula talega na yaloqu mai na titobu kei Eli.

¹⁴ Kemuni na Kalou, era sa tucake mai vei au na tamata viavialevu; ka ra sa segata na yaloqu nai soqosoqo ni tamata dauivalavala vakaukauwa, ka sega ni nanumi kemuni me tu e matadra.

¹⁵ Ia sai kemuni na Turaga, na Kalou sa dauyalololoma ka daulomasoli, sa dauvosota vakadede, ka dauyalovinaka ka daudina.

¹⁶ Mo ni golevi au mai, ka lomani au; mo ni solia na nomuni kaukauwa vua na nomuni tamata; ka vakabula na luvena na nomuni vada.

¹⁷ Me caka mada vei au e dua nai vakatakilakila ni loloma; me ra raica ko ira era cati au, ka madua kina, ni kemuni sa vukei au, Jiova, ka sa vakacegui au.