NA SAME 75 - Ai Vola Tabu (Vakadewa Makawa Vakavoutaki 2021)

Na Vakavinavinaka e na Vuku ni Cakacaka Vinaka ni Kalou

Vua nai liuliu: Kakua ni Vakarusa. A Same i Esava. A Sere.

¹ Keimami sa vakavinavinaka vei kemuni na Kalou; keimami sa vakavinavinaka; ia sa voleka mai na yacamuni. Sa tukuni mai na nomuni cakacaka mana.

² “Ni'u sa lokuca oti na kena siga ka'u na lewa vakadodonu kina.

³ Sa waicala ko vuravura kei ira kecega na lewena, au sa vakataudeitaka na kena duru. Sela

⁴ Au a kaya vei ira na lialia, ‘Dou kakua ni valavala vakalialia’, vei ira talega nai valavala ca, ‘Kakua ni kurea ki cake nai leu;

⁵ kakua ni kurea na nomu i leu ki cake, kakua ni vosa vakadomokaukauwa.’ ”

⁶ Ni sa sega ni vu na vakalevulevui mai na tokalau, se mai na ra, se mai na mata ni ceva;

⁷ ia na Kalou sa daulewa, sa vakasivoya e dua, ka toroya cake e dua.

⁸ Ni sa taura tu e dua na bilo ko Jiova sa damudamu na kena waini, sa sinai e na ka e veiwaki vata ka sa livia yani ko koya, ia na kena soko, era na lobaka dina ka gunuva ko ira nai valavala ca kecega e vuravura.

⁹ Ia koi au, ka'u na tukuna tikoga ka sega ni mudu; au na seretaka na vakavinavinaka vua na Kalou i Jekope.

¹⁰ Au na tamusuka laivi talega na nodra i leu nai valavala ca, ia ena vakaceceretaki ga na nodra i leu na yalododonu.