NA SAME 68 - Ai Vola Tabu (Vakadewa Makawa Vakavoutaki 2021)

Na Vakacaucau kei na Vakavinavinaka

Vua nai liuliu. A nei Tevita. A Same. A Sere.

¹ Me tucake na Kalou, me ra dui vakubutaki ko ira na nona meca; me ra veidroyaki e matana ko ira era sa cati koya.

² Me vaka sa cagina tani na kubou, mo ni lewa me ra vaka talega kina ko ira; me vaka sa waicala na drega ni vola e na mata ni bukawaqa, me ra rusa laivi vakakina ko ira nai valavala ca e na mata ni Kalou.

³ Ia me ra marau ga na yalododonu; me ra reki e na mata ni Kalou; io, me ra ladelade e na marau.

⁴ Dou sere vua na Kalou, dou seretaka na yacana; dou vakavinavinaka vua sa vodo lako e na lomalagi— na yacana ko Jiova— dou tavarekireki e matana.

⁵ A tamadra na luveniyali kei koya sa lewa e na vukudra na yada sai koya na Kalou e na nona i tikotiko tabu.

⁶ Sa qisi ira na Kalou era tiko taudua me ra tiko vakamataqali; sa kauti ira ki tautuba era vesuki e na sinucodo; a ra sa tiko ga e na vanua dausiga na tamata be.

⁷ Kemuni na Kalou, ni ko ni a liutaki ira na nomuni tamata, ni kemuni a lako vakaturaga e loma ni vanua lala, Sela

⁸ sa tavuki na vanua, ka sa tau na lomalagi e na mata ni Kalou, io, ko Saineai sa yavala e na mata ni Kalou, na Kalou ni Isireli.

⁹ Oi kemuni, na Kalou, ko ni a vakatauca mai na uca levu; ko ni a vakaukauwataka kina na nomuni votavota, ni sa ceguoca;

¹⁰ era a tiko mai kina na nomuni soqosoqo; e na nomuni yalololoma, na Kalou, ko ni a vakarautaka na ka me nodra na dravudravua.

¹¹ Sa solia na vosa na Turaga; era sa lewe vuqa sara sa dautukuna voli:

¹² “Ko ira na tui ni veimataivalu, era sa dro, era sa dro!” Na yalewa ka tiko ga e vale sa vota nai toki-ni-valu,

¹³ ka dina ga ni dou sa koto e na maliwa ni ba-ni-sipi— na taba ni ruve sa botani e na siliva, kei na lawena e na koula tatalivaliva.

¹⁴ Ena vaka na uca-vulavula mai Salimoni, ni sa vakasevi ira mai kina na tui ko Koya sa Kaukauwa.

¹⁵ A ulunivanua ni Kalou sa vaka na Ulunivanua ko Pasani; na ulunivanua cecere sa vaka na Ulunivanua ko Pasani!

¹⁶ A cava dou sa rai kivi kina koi kemudou na ulunivanua cecere, ki na ulunivanua sa vinakata na Kalou me tiko kina, io, ko Jiova ena tiko kina ka sega ni mudu?

¹⁷ A qiqi-vakaturaga ni Kalou sa rua na oba (20,000), ia na nona agilosi sa udolu vakavuqa sara; sa tiko na Turaga e na kedra maliwa, me vaka mai Saineai, e na tikina tabu.

¹⁸ O ni a lako ki cake, o ni sa vakabobulataki ira na bobula era lewe vuqa, o ni sa rawata nai solisoli me nodra na tamata, Io, me nodra na dautalaidredre, me sa tiko vata kei ira ko Jiova na Kalou.

¹⁹ Me vakacaucautaki na Turaga, o koya sa colata na noda i colacola e na veisiga; io, na Kalou na noda i vakabula. Sela

²⁰ A noda Kalou na Kalou sa dauia na veivakabulai, ka sa nei Jiova na Turaga na noda i drodro mai na mate.

²¹ Ia na Kalou, ena vuetaka na uludra na nona meca, kei na buradelana vakaulu ni tamata sa kitaka tiko na talaidredre.

²² Sa kaya na Turaga, “Au na kauta tale mai Pasani, au na kauti ira tale na noqu tamata mai na loma ni wasawasa,

²³ me lomoci kina na yavamu e na dra ni nomu meca, kei na yamedra na nomu koli e na ka ko ya.”

²⁴ Era sa kunea oti, na Kalou, na nomuni lakolako, io, na nomuni lakolako, na noqu Kalou, na noqu Tui, e na vale tabu—

²⁵ era sa liu ko ira na dausere, ka ra sa muri tiko na dauqiriqiri, sa tiko e na kedra maliwa na goneyalewa era dauqiri tibereli:

²⁶ “Dou vakavinavinaka vua na Kalou e na soqoni ni vavakoso, io, vei koya na Turaga, oi kemudou sa tubu mai vei Isireli!”

²⁷ Sa tiko mai kea ko ira na Penijamini ka lailai kei na nodra turaga, kei na nodra turaga na Juta kei na nodra i vavakoso, kei na nodra turaga na Sevuloni, kei na nodra turaga na Navitalai.

²⁸ Sa vakarota na nomu Kalou mo kaukauwa; kemuni na Kalou, mo ni vakaukauwataka na ka ko ni sa cakava e na vuku i keimami.

²⁹ E na vuku ni nomuni vale mai Jerusalemi era na kauta mai nai solisoli vei kemuni ko ira na tui.

³⁰ Mo ni vunauci ira na manumanu ni veigasau; na qele ni bulumakau tagane ni veimatanitu, kei na luvedra. Me ra vakamalumalumu mada kina ko ira yadua ka soro e na tiki ni siliva; sa vakasevi ira ko koya era vinakata nai valu.

³¹ Era na lako mai Ijipita na turaga; ena dodoka vakasauri na ligana ko Eciopea vua na Kalou.

³² Dou sere vua na Kalou, na veimatanitu e vuravura; dou vakacaucautaki koya na Turaga, Sela

³³ Vei koya sa vodo tu e na dela ni lomalagi e cake sara, io na lomalagi ka tu mai liu; raica, sa tabalaka na domona, io, na domona kaukauwa.

³⁴ Dou tukuna ni sa kaukauwa na Kalou, sa nodra turaga levu na Isireli; ka sa tiko mai lomalagi na nona kaukauwa.

³⁵ Kemuni na Kalou, ko ni sa rerevaki mai na nomuni veiyasana tabu, na Kalou ni Isireli sai koya ga sa dausolia na kaukauwa kei na qaqa vei ira na nona tamata. Me vakacaucautaki na Kalou!