NA SAME 63 - Ai Vola Tabu (Vakadewa Makawa Vakavoutaki 2021)

Yalovakacegu Tiko e na Mata ni Kalou

A Same i Tevita, ni sa tiko ena vanua lala mai Juta.

¹ Oi kemuni na Kalou, ko ni sa noqu Kalou; ka'u na sou me'u qaravi kemuni, sa viagunu vei kemuni na yaloqu; sa gu ga vei kemuni na lewequ, e na vanua mamaca ka dauveivakaocataki, sa sega kina na wai.

² Me'u kunea na nomuni kaukauwa kei na nomuni ukuuku, me vaka ka'u a kunea e na nomuni vale tabu.

³ Ni sa vinaka na nomuni loloma ka ca na bula, ena vakavinavinaka kina vei kemuni na tebenigusuqu.

⁴ Ka'u na vosavinakataki kemuni vakaoqo me vaka ni'u sa bula; ka'u na dodoka cake na ligaqu e na yacamuni.

⁵ Ena mamau na yaloqu me vaka e na uto ni sui kei na uro, ena vakavinavinaka talega na tebenigusuqu ni sa reki tiko,

⁶ ni'u sa nanumi kemuni e na noqu i mocemoce, ka vakanananu vei kemuni e na veitiki ni bogi;

⁷ ni kemuni sa dauvukei au, ka'u na rekitaka kina na yaloyalo ni tabamuni.

⁸ Sa gumatua na yaloqu ni'u muri kemuni; sa tokoni au na ligamuni matau.

⁹ Ia ko ira era segata na yaloqu me ra vakarusa era na lako sobu ki na tikina e ruku i vuravura;

¹⁰ era na bale e nai seleiwau, era na kedrai votavota na fokisi.

¹¹ Ia na tui ena rekitaka na Kalou; era na marau tiko ko ira yadua sa bubului vua, ia ena vagagalutaki na gusudra na vosa lasu.