NA SAME 60 - Ai Vola Tabu (Vakadewa Makawa Vakavoutaki 2021)

A Masu ni Qaqa ni Oti na Druka

Vua nai liuliu; me vaka Na Viavia ni Veiyalayalati. A Mikitami i Tevita, me i vakavuvuli; ni sa kabai o Arami Naraimi (Mesopotemia) kei Arami Soba (Siriasopa), ni sa lesu mai o Joape ka vakamatei ira na kai Itomi era lewe tinikarua na udolu ena Buca ni Masima.

¹ Oi kemuni na Kalou, ko ni sa biuti keimami, o ni sa dui vakasevi keimami; ko ni a cudru; mo ni lesu tale mai vei keimami!

² O ni sa cakava me sautaninini na vuravura; ko ni sa basuka me tadola; mo ni vakavinakataka na veitikina sa ca, ni sa veitosoyaki.

³ O ni sa vakayacora na ka rarawa vei ira na nomuni tamata; ko ni sa vagunuvi keimami e na waini keimami yatayata kina.

⁴ O ni sa solia na kuila vei ira era sa rerevaki kemuni, me cecebuya e na vuku ni nomuni yalodina. Sela

⁵ Me vakabulai kina ko koya ko ni sa lomana; mo ni vakabulai au e na ligamuni matau, ka rogoci au.

⁶ Sa vosa oti na Kalou e nona yalosavasava: “E na yalo ni reki ka'u na wasewasei Sikemi, ka veivotayaka na buca mai Sukoci.

⁷ Sa noqu ko Kiliati, ka sa noqu ko Manasa; sai vakaruru ni uluqu ko Ifereimi; ka noqu tamata daulewa ko Juta.

⁸ Na noqu i vuivui ko Moapi; kei Itomi, ka'u na viritaka vua na noqu i vava; kivei Filisitia, ka'u na kaila e na qaqa.”

⁹ O cei ena kauti au ki na koro kaukauwa? O cei ena tuberi au cake ki Itomi?

¹⁰ Oi kemuni na Kalou, se segai, oi kemuni ka sa biuti keimami? Ia koi kemuni na Kalou, ko ni sa sega ni lako vata kei ira na neimami valu?

¹¹ Mo ni vukei keimami mai me oti na ka rarawa, ni sa ka walega na nodra veivuke na tamata.

¹² E na vuku ni Kalou eda na gugumatua; ni sai koya ga ena buturaka sobu na noda meca.