NA SAME 55 - Ai Vola Tabu (Vakadewa Makawa Vakavoutaki 2021)

A Masu ni Tamata sa Lawakitaki mai Vua na Nona i Tokani

Vua nai liuliu ni sere: kei nai yaya ni vakatagi vaka-wa. A Masikili i Tevita.

¹ Mo ni vakatu daligamuni, na Kalou, ki na noqu masu; ia mo ni kakua ni vunitaki kemuni mai na noqu kerekere.

² Mo ni nanumi au, ka vakarorogo vei au; au sa vutugu e na noqu rarawa, ka sega ni vakacegu rawa;

³ e na vuku ni vosa ni meca, e na vuku ni nodra i valavala vakasaurara na caka cala. Ni ra sa beitaki au e na ka e sega ni dodonu, ka ra sa vakararawataki au e na nodra cudru.

⁴ Sa rarawa vakalevu na yaloqu e lomaqu, ka sa kani au na rerevaka na mate.

⁵ Sa kani au na rere kei na sautaninini, ka sa luvuci au na domobula.

⁶ Ka'u a qai kaya, “Isa, me'u vakatabana mada ga me vaka na ruve! Au na vuka yani ka la'ki tiko vakacegu;

⁷ io, au na qai dro vakayawa sara yani; ka'u na la'ki tiko e na vanua lala. Sela

⁸ Au na qai kusarawa ni dro tani mai na cagi levu, kei na cava.”

⁹ Mo ni vakarusai ira, kemuni na Turaga, ka wasea na yamedra; ni'u sa kunea nai valavala kaukauwa kei na veileti e na koro.

¹⁰ Era sa lako voli e dela ni kena bai e na siga kei na bogi, sa tiko e loma ni koro na caka cala kei na ka rarawa;

¹¹ sa tiko ga kina nai valavala ca; a sa sega ni yali e na kena rara na dauveivakaisini kei na dauveivaqaseni.

¹² Ni sa sega ni koya na meca ka vosa vakacacataki au— ke sa vakakina ke'u sa vosota rawa; ka sa sega ni koya ka cati au ka vakalevulevui koya vei au— ke sa vakakina ke'u sa vunitaki au vua.

¹³ Ia sai iko ga, a tamata, na noqu i sa, na noqu i tokani, na noqu i tau voleka sara,

¹⁴ o koya keirau sa dauveilasamaki vakavinaka vata; ka daulako vata ki na vale ni Kalou kei na mataveiwekani.

¹⁵ Me vauci ira ko mate; me ra lako bulabula sobu ki nai bulubulu; ni sa tiko e nodra i tikotiko kei na lomadra talega na ca.

¹⁶ Ia ka'u sa masu vua na Kalou, ka na vakabulai au ko Jiova.

¹⁷ E na yakavi, kei na mataka, kei na siga levu ka'u na masu ka tagi vakadomoilevu, ka na rogoca na domoqu ko koya.

¹⁸ Sa vakabula na yaloqu me'u vakacegu mai nai valu ka ia vei au, ni ra sa lewe vuqa era vala kei au.

¹⁹ Na Kalou, o koya ka sa lewa mai nai vakatekivu, Sela ena vakarorogo, ka vakayalomalumalumutaki ira— baleta ni ra sa sega ni veisau, ka sega ni rerevaka na Kalou.

²⁰ Sa dodoka na ligana na noqu i tokani vua na nona i tau ka sa vakacataka ko koya na nona vosa ni yalayala.

²¹ Sa malumalumu sara na vosa ni gusuna ka sa kaukauwa na bata, ia sa tiko e lomana na via veivala; sa waicala na nona vosa ka cevata na waiwai, ia sai seleiwau ga sa ucu tu.

²² Mo biuta vei Jiova na nomu i colacola bibi, ena tokoni iko ko koya; ena sega ni laivi ira na yalododonu me ra vakayavalati e na dua na gauna.

²³ Ia koi kemuni na Kalou, ko ni na biuti ira sobu ki nai keli ni rusa; ko ira na tamata dauveivakamatei ka dauveivakaisini era na sega ni bula me yacova na veimama ni nodra gauna. Ia koi au, ka'u na vakararavi vei kemuni.