NA SAME 50 - Ai Vola Tabu (Vakadewa Makawa Vakavoutaki 2021)

Nai Soro Donu Vua na Kalou

A Same i Esava.

¹ O Koya sa Kaukauwa, na Kalou, io, ko Jiova, sa vosa oti ka sa kacivi vuravura mai na yasana sa cadra kina na mata-ni-siga ka yacova na yasana sa dromu kina.

² Mai Saioni, na koro lagilagi duaduaga, sa serau mai na Kalou.

³ Ena lako mai na noda Kalou, ena sega ni galu, ena liutaki koya e dua na bukawaqa sa daukana voli, ia sa na vakavolivoliti koya e dua na cava rerevaki.

⁴ Ena kacivi lomalagi mai cake ko koya kei vuravura talega, me lewai ira na nona tamata ko koya:

⁵ “Dou vakasoqoni ira vata kivei au na noqu tamata yalodina, ko ira era sa ia na veiyalayalati kei au e na vakacaboisoro!”

⁶ Ko lomalagi sa tukuna na nona i valavala dodonu, ni sa daunilewa na Kalou vakataki koya. Sela

⁷ “Dou rogoca, na noqu tamata, ni ka'u na vosa, ko iko na Isireli, ka'u na tukuna na nomu cala. Oi au ga na Kalou, na nomu Kalou.

⁸ Au na sega ni vunauci iko e na vuku ni nomu i soro; se na nomu i soro kama ka tu tiko ga e mataqu.

⁹ Au na sega ni taura e dua na bulumakau mai na nomu vale, se na me tagane mai na nomu bai ni me.

¹⁰ Ni sa noqu ga na bulumakau kila kecega mai na veikau, kei na bulumakau lasa mai na veiulunivanua e udolu.

¹¹ Au sa kila yadua na manumanu vuka mai na veiulunivanua, ka sa noqu na manumanu kila kecega ni vanua.

¹² “Kevaka ka'u sa viakana, au na sega ni tukuna vei iko, ni sa noqu ko vuravura kei na ka kecega sa sinai kina.

¹³ Au na kania li na lewe ni bulumakau tagane, se gunuva na dra ni me?

¹⁴ Mo vakacabora vua na Kalou na vakamolimoli; ka vakayacora na ka ko a bubului kina vei Koya sa Cecere Sara.

¹⁵ Mo masuti au talega e na siga ni rarawa; ka'u na vakabulai iko, ia ko na vakacaucautaki au.”

¹⁶ Ia vei ira nai valavala ca, sa kaya na Kalou: “A cava soti ko sa tukuna kina na noqu vunau, ka sa cavuta talega e gusumu na noqu veiyalayalati?

¹⁷ Ni ko sa cata tiko na bula vakaivakarau, ka sa biuta ki dakumu na noqu vosa.

¹⁸ Ni ko sa veitokani kaya na daubutako ni ko sa sotava e dua, ka ko sa vakailala vata kei ira na dauyalewa.

¹⁹ “O sa solia na gusumu ki na ka ca, ka sa tulia na ka lasu na yamemu.

²⁰ O sa tiko ga ka vosacataki koya na tacimu; ko sa kaseti koya na luve i tinamu.

²¹ A ka oqo ko a kitaka, ia ka'u a galu ga; ko a qai nanumi au me'u vakataki iko ga. Ia ka'u na vunauci iko, ka tuva e matamu na nomu i valavala ca oqo.

²² “Dou nanuma mada na ka oqo, oi kemudou sa guilecava na Kalou, de'u sa basuraki kemudou, ka sega e dua me vakabulai kemudou.

²³ O koya sa vakacabora na vakavinavinaka sa vakacaucautaki au; ia ko koya sa lewa vakavinaka na nona i valavala ka'u na vakaraitaka vua na bula sa mai vua na Kalou.”