NA SAME 46 - Ai Vola Tabu (Vakadewa Makawa Vakavoutaki 2021)

Na Veitaqomaki ni Kalou vei Ira na Nona Tamata

Vua nai liuliu ni sere. A nodra na luve i Kora. A Sere, me vaka na Alamoca.

¹ A noda i drodro kei na noda kaukauwa na Kalou, sa voleka sara me vukei keda ni da sa rarawa.

² O koya oqo eda na sega kina ni rere, kevaka sa kau tani ko vuravura, ka sa kau yani ki na loma ni wasa liwa na veiulunivanua;

³ ka sa vadugu na kena wai ka vakatubu ua, ka yavala na veiulunivanua ni sa tubu na kena biau. Sela

⁴ Sa dua na uciwai, na kena soniwai sa vakamarautaka na koro ni Kalou, na tikina tabu e nai tikotiko i Koya sa Cecere Sara.

⁵ Sa tiko e na kena loma-ni-koro na Kalou; ena sega ni vakayavalati; ena sou na Kalou e na mataka me vukei koya.

⁶ Sa cudru na veivanua, sa yavala na veimatanitu; sa vosa yani ko koya, sa waicala ko vuravura.

⁷ Sa tiko vata kei keda ko Jiova-ni-lewevuqa; a noda i drodro na Kalou i Jekope. Sela

⁸ Dou mai raica na cakacaka i Jiova, ni sa ia na veivakarusai e loma i vuravura.

⁹ Sa vakaotia nai valu mai nai yalayala kei vuravura; sa musuka na dakai-titi ko koya, ka vakarusa na moto, ka sa vakama na qiqi-ni-valu e na bukawaqa.

¹⁰ “Dou tiko lo, ka dou kila ni'u sa Kalou! Ka'u na vakalevulevui e na veimatanitu, ka'u na vakalevulevui e vuravura.”

¹¹ Sa tiko vata kei keda ko Jiova-ni-lewevuqa; a noda i drodro na Kalou i Jekope. Sela