NA SAME 36 - Ai Vola Tabu (Vakadewa Makawa Vakavoutaki 2021)Na Ca ni Tamata kei na Vinaka ni Kalou Vua nai liuliu ni sere. A nei Tevita na tamata i Jiova. 1 Sa kaya e na vu ni yalona nai valavala ca ni tamata ca, ni sa sega vua na rerevaka na Kalou. 2 Ni sa daudokadokai koya vakataki koya ga, ni na sega ni kune na nona i valavala ca, ka sa vakasisilataki. 3 A vosa ni gusuna na veivakaisini kei na ka lasu; sa mudu ga ni vuku ka me caka vinaka. 4 Sa nakita ga na ca e na nona i mocemoce; sa vakataudeitaki koya e na sala sa sega ni vinaka; sa sega ni biuta na ca. 5 I Jiova, sa yala ki lomalagi na nomuni loloma, kei na nomuni dina ki na o. 6 Sa vaka na ulunivanua lelevu na nomuni yalododonu, a wasawasa titobu na nomuni lewa; I Jiova, ko ni sa maroroya na tamata kei na manumanu. 7 A ka talei vakaidina na nomuni yalololoma, na Kalou! O koya oqo era vakaruru kina na luve ni tamata ki ruku ni tabamuni. 8 Era na vakamamautaki sara e na ka vinaka ni nomuni vale, ia kemuni na vagunuvi ira e na nomuni uciwai ni marau. 9 Ni sa tu vei kemuni na waivure ni bula; keimami na raica na rarama e na nomuni rarama. 10 Me tu ga na nomuni yalololoma vei ira sa kilai kemuni, kei na nomuni yalododonu vei ira era sa yalododonu! 11 Me kakua ni lako vakaca mai vei au na yavana na viavialevu, me kakua talega ni vakasesei au na liga ni tamata ca. 12 Era sa bale ki kea na daucakacaka ca; era sa vakabalei sobu, a ra na sega ni tucake rawa. |