NA SAME 35 - Ai Vola Tabu (Vakadewa Makawa Vakavoutaki 2021)

Na Masu ni Kere Veivuke ni sa Levu na Meca

A nei Tevita.

¹ I Jiova, mo ni veileti kei ira era sa veileti kei au; ni veivala kei ira era sa veivala kei au.

² Mo ni taura nai sasabai kei nai vakaruru, ka tucake mo ni vukei au.

³ Mo ni laveta talega na moto kei nai matau ni vala me ravuti ira era sa vakacemuri au! Mo ni kaya mai ki na yaloqu, “Koi au na nomu i vakabula!”

⁴ Me ra vakidroataki ka vakamaduataki era sa saga na yaloqu. Me ra vakasukai ki muri ka vakataqayataki ko ira era bosea na ka me'u ca kina.

⁵ Me ra vaka na qa-ni-sila sa cagina, ka me vakasavi ira talega na agilosi i Jiova.

⁶ Me butobuto ka tidara na nodra sala, ka me vakasavi ira talega na agilosi i Jiova.

⁷ Ni sa sega na vuna ni ra vunia na nodra lawa e nai keli me rawai au; era kelia me'u mate kina ka sega na vuna.

⁸ Me yaco vakidacala vua na rusa. Ia me rawai koya ga na nona lawa sa vunia ko koya; me lutu ga kina ko koya—ki na nona rusa!

⁹ Ia na yaloqu ena rekitaki Jiova, ena reki ga ni sa vakabulai au ko koya.

¹⁰ Ena kaya talega na suiqu kecega, “O cei sa vakataki kemuni, i Jiova? Ni kemuni sa vakabulai koya sa dravudravua mai vua sa rui kaukauwa vua, kei koya na dravudravua kei na luveniyali mai vua sa vakacacani koya.”

¹¹ Era sa tucake mai na dauveibeitaki vakailasu; era sa taroga vei au na ka ka'u sa sega ni kila.

¹² Era sa kitaka vei au na ka ca mei sau ni ka vinaka; ka sa ca kina na yaloqu.

¹³ Ia koi au, ni ra sa tauvi mate, ka'u sa vakaisulu e nai sulu taga; ka'u sa vakamalumalumutaki au e na lolo; ka'u sa vakacuva na uluqu ki lomaserequ ka masu,

¹⁴ ka sa vaka ni'u tagicaka voli na noqu i tokani se taciqu; ka vaka e dua sa lelevaka na tinana, ni sa cuva sobu ka lolosi.

¹⁵ Ia ena gauna ka'u sa tao kina, era sa sota vata e na reki, ka ra soqoni vata mai me ra saqati au; ko ira na tamata ca ka'u sa sega ni kilai ira era sa basuraki au ka sega ni cegu;

¹⁶ era sa vaka na dauveivakasewasewani e na kana magiti, era sa vakasequruquru bati vei au.

¹⁷ A cava na kena dede, i Jiova, mo ni na vakararai mai kina? Ni vakabulai au mai na nodra veivakarusai, na noqu bula mai vei ira na laione!

¹⁸ Au na qai vakamolimoli vei kemuni e nai soqosoqo levu; ka'u na vakavinavinaka vei kemuni e na kedra maliwa na lewe vuqa.

¹⁹ Me ra kakua ni reki e na vukuqu ko ira na noqu meca ni sa sega na vuna, me ra kakua talega ni katariva ko ira era cati au walega.

²⁰ Ni ra sa sega ni vosataka na vosa ni vakacegu, ia kivei ira era tiko vinaka e na vanua, era veinanuyaka ga na ka ni dauveivakaisini.

²¹ A ra sa dalaga vakalevu vei au; a ra sa kaya, “Sai koya! Sai koya! Sa qai kunea na matada.”

²² O ni sa kunea talega, Jiova, mo ni kakua ni galu tiko! Noqu turaga, ni kakua ni yawa vei au!

²³ Mo ni yavala mai! Ka yadra mo ni lewai au, io mo ni totaki au mai, na noqu Kalou kei na noqu Turaga!

²⁴ Mo ni lewai au, Jiova na noqu Kalou, me vaka na nomuni yalododonu; ia mo ni kakua ni laivi ira me ra rekitaki au.

²⁵ Me ra kakua ni kaya e lomadra, “Sai koya, sa loma i keitou oqo!” Me ra kakua ni kaya, “Keitou sa tilomi koya sara.”

²⁶ Me ra madua ka kidroa vata ko ira sa rekitaka na noqu vakacacani! Me ra vakaisulu e na veivakamaduataki kei na veivakarogocataki ko ira era sa vakalevulevui ira vei au!

²⁷ Me ra kaikaila e na marau ka reki ko ira era sa vinakata me'u vakadonui, ka me ra kaya tikoga, “Me vakacaucautaki ko Jiova, o koya sa vinakata me ra tiko vinaka na nona tamata!”

²⁸ Ia na yamequ ena tukuna na nomuni lewa dodonu kei na nomuni vakavinavinaka e na veisiga kece.