NA SAME 31 - Ai Vola Tabu (Vakadewa Makawa Vakavoutaki 2021)

Na Masu ni Tamata e Vakararavi Vua na Kalou

Vua nai liuliu ni sere. A Same i Tevita.

¹ I Jiova, ka'u sa vakararavi vei kemuni, ni kakua ni laivi au me'u madua; ni vakabulai au e na nomuni yalododonu.

² Ni vakala na daligamuni vei au; mo ni vakabulai au kusarawa. Mo ni noqu uluvatu kaukauwa, na noqu i drodro me'u vakabulai kina.

³ Kemuni sa noqu uluvatu kei na noqu i drodro; ia mo ni tuberi au, ka liutaki au, e na vuku ni yacamuni,

⁴ ni kaliraki au mai na lawa era sa kitaka vuni vei au; ni sai kemuni ga na noqu kaukauwa.

⁵ Au sa solia na yaloqu ki na ligamuni; o ni a vakabulai au, Jiova, na Kalou daudina.

⁶ Au sa cati ira era sa nanuma na ka lasu wale, ia koi au, ka'u sa vakararavi vei Jiova.

⁷ Au na reki ka marau e na nomuni yalololoma, kemuni sa vakananuma na noqu rarawa; kemuni a kila na kena veivakararawataki ni yaloqu;

⁸ ka sa sega ni sogolati au e na liga ni meca; ko ni sa tea na yavaqu e na vanua rabailevu.

⁹ Ni lomani au, Jiova, ni'u sa rarawa; sa buawa na mataqu e na tagi, ka sa ca na yaloqu kei na yagoqu.

¹⁰ Ni sa takali na noqu bula e na rarawa, kei na noqu veiyabaki e na vutugu; sa oti na noqu kaukauwa e na vuku ni noqu caka cala, a sa vuca na suiqu.

¹¹ Au sa rogo ca vei ira kece na noqu meca, ka vakalevu vei ira na kai noqu, a ra sa rerevaki au ko ira keitou sa veikilai; o ira era kunei au e tautuba era sa dro tani vei au.

¹² Au sa guileca me vaka na mate sa sega ni nanumi; ka'u sa vaka na bilo sa kavoro.

¹³ Ni'u sa rogoca na nodra vosa ca na lewe vuqa— sa vakavolivoliti au na ka rerevaki!— ni ra sa bosei au me'u ca, ni ra sa bukiveretaka me ra kauta tani na noqu bula.

¹⁴ Ia ka'u a vakararavi vei kemuni, Jiova; ka'u a kaya, “Sai kemuni ga na noqu Kalou.”

¹⁵ Sa tu e na ligamuni na noqu gauna; ni vakabulai au mai na ligadra na noqu meca, mai vei ira talega era sa vakacacani au.

¹⁶ Me cilava na nomuni tamata na matamuni; ni vakabulai au e na vuku ni nomuni loloma.

¹⁷ I Jiova, kakua ni laivi au me'u madua, ni'u sa masu vei kemuni; me ra madua na tamata i valavala ca, me ra galu ga e nai bulubulu.

¹⁸ Me vagalui na tebenigusu daulasu era sa vosalevutaka na tamata yalododonu e na viavialevu kei na veivakalialiai.

¹⁹ A ka vakaidina na nomuni loloma ko ni sa maroroya me nodra era sa rerevaki kemuni, ko ni sa vakarautaka me nodra era vakararavi vei kemuni, e matadra na luve ni tamata!

²⁰ O ni na vunitaki ira e na yasana vuni e matamuni mai na nodra vere na tamata; o ni na vunitaki ira tiko e na nomuni vale tabu mai na veileti ni yamedra.

²¹ Me vakavinavinakataki ko Jiova, ni sa vakatakila vei au na nona loloma vakaidina e na koro kaukauwa.

²² Ia koi au ka'u a kaya ni'u sa kidroa, “Au sa muduki tani mai na matamuni.” Ia ko ni sa rogoca ga na domo ni noqu masu ni'u sa tagi vei kemuni.

²³ Dou lomani Jiova, koi kemudou kecega na nona tamata yalosavasava. Ni sa maroroi ira era sa lomadina ko Jiova, ka sa cudruvi ira vakalevu era daucakacaka vakaviavialevu.

²⁴ Dou gumatua, ena qai vakaukauwataka na yalomudou ko koya, oi kemudou kecega sa nuitaki Jiova.