NA SAME 29 - Ai Vola Tabu (Vakadewa Makawa Vakavoutaki 2021)Na Domo i Jiova e na Gauna Veilecayaki A Same i Tevita. 1 Dou ia vei Jiova, koi kemudou na luve ni qaqa, dou ia vei Jiova na vakarokoroko kei na kaukauwa. 2 Dou vakarokoroko ki na yaca i Jiova me vaka sa dodonu; dou cuva vei Jiova e nai ukuuku ni yalosavasava. 3 Sa rogo e na dela ni wai na domo i Jiova; sa kurukuru na Kalou vakaiukuuku, sa tu e na wai levu ko Jiova. 4 Sa rogo vakaukauwa na domo i Jiova; sa rogo vakaturaga na domo i Jiova. 5 Sa musuka na sitari na domo i Jiova; io, sa musuka na sitari ni Lepanoni ko Jiova. 6 Sa vakaladetaka ko koya me vaka na luve ni bulumakau, ko Lepanoni kei Sirioni me vaka na luve ni iunikoni. 7 A domo i Jiova sa tasea na yameyame ni bukawaqa. 8 Sa kurea na vanua lala na domo i Jiova; sa kurea ko Jiova na vanua lala ko Ketesa. 9 Na domo i Jiova sa sakure kina na vuni oki, ka sa tacavu kina na veikau; ka sa vakavinavinaka ko ira kece yadua e na nona vale tabu. 10 Sa tiko vakaturaga e na dela ni waluvu ko Jiova; io, sa tiko vakaturaga ko Jiova ka sega ni mudu. 11 Me qai solia ko Jiova na kaukauwa vei ira na nona tamata! Me qai vakalougatataka na nona tamata ko Jiova ni sa vakacegui ira! |