NA SAME 28 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke kei na Vakavinavinaka

A nei Tevita.

¹ Au na tagi vei kemuni Jiova; na noqu uluvatu, ni kakua ni galuvi au, De ko ni galu vei au, ka'u na vakataki ira era sa lako sobu ki nai bulubulu.

² Ni rogoca na domo ni noqu masu, ni'u sa tagi vei kemuni, ni ka'u sa dulaka cake na ligaqu vaka ki na nomuni loqi tabu.

³ Me'u kakua ni kau tani vata kei ira na tamata ca, kei ira sa daucaka ca; ko ira era sa vosa ni veivakacegui vei ira na kai nodra, ia ka sa tu e na yalodra na ca.

⁴ Ni solia vei ira me vaka na nodra cakacaka, me vaka na ca era kitaka, ni solia vei ira me vaka na cakacaka ni ligadra; vakayacora vei ira na kenai sau ni nodra i valavala.

⁵ Ni ra sa sega ni vakananuma na cakacaka i Jiova, se na ka sa kitaka tiko na ligana, ena talaraki ira sobu ko koya, ka sega sara ni tarai ira cake.

⁶ Vakavinavinaka vei Jiova, ni sa rogoca na domo ni noqu masu.

⁷ A noqu kaukauwa kei na noqu i sasabai ko Jiova; sa vakararavi vua na yaloqu; ka sa vukei au mai, ka sa reki vakalevu kina na yaloqu, ka'u na vakavinavinaka talega vua e na noqu sere.

⁸ A nodra kaukauwa ko Jiova, kei nai vakabula kaukauwa vua sa lumuta ko koya.

⁹ Ni vakabulai ira na nomuni tamata, ka vakalougatataka na nomuni votavota; mo ni lewai ira talega, ka laveti ira cake ka tawa mudu.