NA SAME 25 - Ai Vola Tabu (Vakadewa Makawa Vakavoutaki 2021)

Na Masu ni Kere Veituberi kei na Veitaqomaki

A nei Tevita.

¹ Kivei kemuni, Jiova, ka'u sa vagolea cake na yaloqu.

² Noqu Kalou, ka'u sa vakararavi vei kemuni; kakua ni laivi au me'u madua; me ra kakua ni marau na noqu meca e na vukuqu.

³ Ena sega talega e dua me na waraki kemuni me madua kina; ko ira ga era talaidredre walega era na madua.

⁴ Kemuni Jiova, mo ni vakatakila mai vei au na nomuni sala; ni vakavulici au e na nomuni lakolako.

⁵ Tuberi au e na nomuni dina, ka vakavulici au, ni sai kemuni na Kalou na noqu i vakabula; ka'u sa waraki kemuni e na veisiga kecega.

⁶ Ni nanuma, Jiova, na nomuni yalololoma kei na nomuni yalovinaka, ni sa ka mai liu sara na ka oqori.

⁷ Kakua ni nanuma na noqu i valavala ca kei na noqu caka cala, ni'u a cauravou; me vaka ga na nomuni loloma mo ni nanumi au, e na vuku ni nomuni yalovinaka, i Jiova!

⁸ Sa yalovinaka ka yalododonu ko Jiova; o koya oqo ena vakavulici ira kina na tamata ca e na nona sala.

⁹ Ena tuberi ira na yalomalua e na lewa, io, ena vakavulici ira na yalomalumalumu e na nona sala.

¹⁰ A sala kecega i Jiova na loloma kei na ka dina, kivei ira era sa muria dina na nona veiyalayalati kei na nona i tukutuku.

¹¹ E na vuku ni yacamuni, Jiova, mo ni kakua ni cudruvi au e na vuku ni noqu i valavala ca, ni sa ka levu.

¹² O cei na tamata sa rerevaki Jiova? Ena vakavulici koya e na sala ena digitaka ko koya.

¹³ Ena tiko vakacegu na yalona, ena taukena talega na vanua na nona kawa.

¹⁴ Na veitokani i Jiova sa nodra ko ira era sa rerevaki koya, ka sa vakatakila vei ira na nona veiyalayalati.

¹⁵ Sa rai tikoga vei Jiova na mataqu, ni na kaliraka na yavaqu ko koya mai na lawa.

¹⁶ Mo ni gole mai vei au, ka lomani au, ni'u sa luveniyali ka vakararawataki.

¹⁷ Sa levu mai na rarawa ni yaloqu, mo ni kauti au tani mada mai na noqu rarawa.

¹⁸ Ni vakaraica na noqu rarawa kei na noqu yaluma, ka vosota na noqu i valavala ca kecega.

¹⁹ Ni vakananuma na noqu meca, ni ra sa lewe vuqa, a ra sa cati au e na veicati vakaidina.

²⁰ Mo ni maroroya na yaloqu, ka vakabulai au; me'u kakua kina ni madua; ni'u sa vakararavi vei kemuni.

²¹ Me maroroi au na yalododonu kei nai valavala dodonu, Ni'u sa dinati kemuni tikoga.

²² Mo ni vakabulai ira na Isireli, na Kalou, mai na nodra rarawa kecega.