NA SAME 116 - Ai Vola Tabu (Vakadewa Makawa Vakavoutaki 2021)

Vakavinavinaka e na Vuku ni Bula mai na Tauvi Mate

¹ Au sa lomani Jiova, ni sa rogoca ko koya na domo ni noqu masu.

² Ni sa vakalakala daligana vei au, ka'u na masu tiko kina vua ni ka'u se bula.

³ Sa viviraki au nai vau ni mate, ka sa kidaci au na rarawa ni bulubulu; sa yacovi au na rarawa kei na taqaya.

⁴ Au a qai masuta na yaca i Jiova: “I Jiova, au sa masuti kemuni, mo ni vakabulai au!”

⁵ Sa daulomasoli ko Jiova, ka yalododonu; io, sa yalololoma na noda Kalou.

⁶ Sa maroroi ira era sega ni vuku ko Jiova; au a vakamalumalumutaki, a sa vakabulai au ko koya.

⁷ Mo lesu tale ki na nomu i vakavakacegu, na yaloqu, ni sa caka vinaka sara vei iko ko Jiova.

⁸ Kemuni sa vakabula na yaloqu mai na mate, kei na mataqu mai na wai ni mata, kei na yavaqu me'u kakua ni bale.

⁹ Au na lako voli e na mata i Jiova e na vanua ni bula.

¹⁰ Au a vakabauta, o koya ka'u a kaya kina: “Au sa rarawa vakalevu”;

¹¹ au a kaya ni'u a taqaya voli, “Era daulasulasu na tamata kecega.”

¹² A cava me'u cakava vei Jiova e na vuku ni nona cakacaka loloma kecega vei au?

¹³ Au na taura na bilo ni bula ka masuta na yaca i Jiova.

¹⁴ Au na cakava mada na veika ka'u a bubului kina vei Jiova e matadra na nona tamata kecega.

¹⁵ A ka talei e na mata i Jiova na nodra mate na nona tamata yalosavasava.

¹⁶ I Jiova, e dina ka'u sa nomuni tamata; au sa nomuni tamata, kei na luvena na nomuni vada. O ni sa sereka na noqu i vesu.

¹⁷ Au na vakacabora vei kemuni nai madrali ni vakavinavinaka, ka'u na masuta na yaca i Jiova.

¹⁸ Au na cakava mada na veika ka'u a bubului kina vei Jiova e matadra na nona tamata kecega,

¹⁹ e na lomanibai ni vale i Jiova, e na nomu loma ni koro, Jerusalemi. Dou ia vei Jiova na vakavinavinaka!