NA SAME 115 - Ai Vola Tabu (Vakadewa Makawa Vakavoutaki 2021)

Na Ka Wale ni Matakau kei na Cecere ni Kalou

¹ Kemuni Jiova, me kakua vei keimami, me kakua vei keimami, ia me soli ga na vakavinavinaka ki na yacamuni, e na vuku ni nomuni loloma tudei kei na nomuni yalodina.

² A cava me ra kaya kina na veimatanitu, “Sa evei na nodra Kalou?”

³ Ia na noda Kalou sa tiko mai lomalagi; sa cakava oti na ka kecega sa vinakata ko koya.

⁴ Ia na nodra matakau na siliva kei na koula, na cakacaka ni liga ni tamata.

⁵ Era sa vakagusuna, ia era sa sega ni vosa rawa; era sa vakamatana, ia era sa sega ni rai rawa.

⁶ Era sa vakadaligana, ia era sa sega ni rogo rawa; era sa vakaucuna, ia era sa sega ni boi rawa.

⁷ Era sa vakaligana, ia era sa sega ni tara ka rawa; era sa vakayavana, ia era sega ni lako rawa; ka ra sa sega talega ni cavuta rawa na vosa e na nodra i tagitagi.

⁸ Ko ira era buli ira era sa tautauvata ga kei ira; kei ira kece talega era sa vakararavi vei ira.

⁹ I Isireli, mo vakararavi vei Jiova! O koya ga na nodra dauniveivuke kei na nodra i sasabai.

¹⁰ Na vale i Eroni, dou vakararavi vei Jiova! O koya ga na nodra dauniveivuke kei na nodra i sasabai.

¹¹ Oi kemudou sa rerevaki Jiova, dou vakararavi vei Jiova! O koya ga na nodra dauniveivuke kei na nodra i sasabai.

¹² Sa daunanumi keda ko Jiova; ena vakalougatataki keda; ena vakalougatataka na vale i Isireli; ena vakalougatataka na vale i Eroni;

¹³ ena vakalougatataki ira era sa rerevaki Jiova, ko ira na lalai kei ira na lelevu.

¹⁴ Me vakalewevuqataki kemudou ko Jiova, oi kemudou kei ira na luvemudou.

¹⁵ Me vakalougatataki kemudou ko Jiova, o koya ka bulia na lomalagi kei na vuravura.

¹⁶ Na lomalagi, io na lomalagi sa nei Jiova, ia sa solia na vuravura ko koya me nodra na kawa tamata.

¹⁷ Era sa sega ni vakavinavinaka rawa vei Jiova ko ira na mate, se ko ira era sa lako sobu ki na vanua ni vakagagalu.

¹⁸ Ia koi keda ga, eda na vakavinavinaka vei Jiova mai na gauna oqo ka sega ni mudu. Dou ia vei Jiova na vakavinavinaka!