NA SAME 114 - Ai Vola Tabu (Vakadewa Makawa Vakavoutaki 2021)

Na Lagilagi ni Kalou e na nodra Lako Yani na Isireli

¹ Ni sa lako tani mai Ijipita ko ira na Isireli, na vale i Jekope mai vei ira na tamata sa duatani na nodra i vosavosa,

² sa yaco me nona yasana tabu ko Juta, ka nona matanitu ko Isireli.

³ Sa kunea na wasawasa, ka sa dro; sa vakalesui ki cake ko Joritani.

⁴ Sa rika voli na veiulunivanua me vaka na sipi tagane, kei na ulu-ni-koro lalai me vaka na luve ni sipi.

⁵ A cava ka manati iko, na wasawasa, ni ko a dro? Se ko iko, Joritani, ni ko a vakalesui ki cake?

⁶ Se koi kemudou na ulunivanua, ni dou a rika voli me vaka na sipi tagane? Kei kemudou na ulu-ni-koro lalai, me vaka na luve ni sipi?

⁷ Mo sautaninini, ko iko vuravura, e na mata ni Turaga, e na mata ni Kalou i Jekope,

⁸ o koya ka vukica na vatu me drano, kei na vatu kaukauwa sara mei vurevure ni wai.