NA SAME 111 - Ai Vola Tabu (Vakadewa Makawa Vakavoutaki 2021)

Me Vakavinavinakataki na Cakacaka Talei ni Kalou

¹ Dou ia vei Jiova na vakavinavinaka! Au na vakavinavinaka vei Jiova e na yaloqu taucoko, e na kedra maliwa na yalododonu, kei nai soqosoqo lotu.

² A cakacaka i Jiova sa ka levu, era qara me ra kila ko ira kecega era dau vinakata.

³ A ka vakaturaga ka vakaiukuuku na nona cakacaka, ka sa sega ni mudu na nona yalododonu.

⁴ Sa cakava me nanumi na nona cakacaka mana; sa daulomasoli ko Jiova ka yaloveivosoti.

⁵ Sa solia na kedra vei ira era sa rerevaki koya; ena nanuma tikoga na nona veiyalayalati.

⁶ Sa vakatakila oti na kaukauwa ni nona cakacaka vei ira na nona tamata, ni sa solia vei ira me nodra i votavota na veimatanitu.

⁷ Sa dina ka dodonu na cakacaka ni ligana; sa vakadinadinataki na nona i vakaro kecega.

⁸ Sa vakataudeitaki me sega ni mudu, ka sa caka e na yalodina kei na yalododonu.

⁹ Sa vakayacora na bula ko koya vei ira na nona tamata; sa lesia na nona veiyalayalati me sega ni mudu. Sa ka savasava ka cecere na yacana.

¹⁰ Na rerevaki Jiova sai tekitekivu ni vuku; era sa yalomatua kecega ko ira era sa vakayacora na nona vunau. Io sa sega ni mudu na nona vakavinavinakataki.