Marika 9 - Ai Vola Tabu (Vakadewa Makawa Vakavoutaki 2021)

¹ Sa kaya talega vei ira ko koya, “Au sa kaya vakaidina vei kemudou, Sa tu eke eso, era na sega sara ni mate, era na raica mada na matanitu ni Kalou ni sa yaco vakaukauwa mai.”

Sa Matalia nai Rairai kei Jisu

² Sa bogi ono, sa qai kauti Pita, kei Jemesa, kei Joni, ko Jisu, a sa kauti iratou vakatikitiki ki na dua na ulunivanua cecere, ko iratou vakai iratou ga; a sa matalia na yagona e matadratou.

³ A sa lumilumisa mai na nona i sulu, sa vulavula sara me vaka na uca-vulavula; sa sega na dausava-i-sulu e vuravura e vakavulavulataka rawa me vakakina.

⁴ A sa rairai vei iratou ko Ilaijia kei Mosese, ka rau sa veivosaki kei Jisu.

⁵ A sa vosa ko Pita, ka kaya vei Jisu, “Vakavuvuli, sa vinaka na nodatou tiko eke. Ia me keitou tara mada na vale vakacevaceva e tolu, e dua me nomuni, ka dua me nei Mosese, ka dua me nei Ilaijia.”

⁶ Ni sa sega ni kila na ka me kaya, ni ratou sa rere vakalevu.

⁷ A sa dua na o sa vakarurugi iratou, ka sa dua na vosa sa lako mai na o, sa kaya, “Oqo na noqu Gone ni toko, dou rogoci koya.”

⁸ A ratou sa veiraiyaki vakasauri, a sa sega ni dua tale eratou sa kunea, ko Jisu duaduaga.

⁹ Ia ni ratou sa lako sobu tiko mai na ulunivanua, sa vakarota ko koya vei iratou me ratou kakua ni tukuna vua e dua na ka eratou a raica, ka malua me tucake tale mai na mate na Luve ni Tamata.

¹⁰ A ratou sa vunia na vosa ko ya me tu ga vei iratou, a ratou sa veitarogi, se cava beka na tucake tale mai na mate.

¹¹ A ratou sa tarogi koya, ka kaya, “A cava era kaya tiko ko ira na vunivola ni sa dodonu me lako mada mai eliu ko Ilaijia?”

¹² A sa vosa ko koya, ka kaya vei iratou, “Sa lako mada dina mai ko Ilaijia, me vukica na ka kece me vinaka tale; ia ka vakaevei na ka sa volai kina na Luve ni Tamata, ni sa dodonu me vosota ko koya na ka e vuqa, ka me vakalialiai?

¹³ Ia ka'u sa kaya vei kemudou ni sa tadu dina mai ko Ilaijia, ka ra sa kitaka vua na ka kecega era sa vinakata, me vaka na ka sa volai e na vukuna.”

Sa Vakabula e Dua na Gonetagane Curumi Tevoro ko Jisu

¹⁴ Ia ni sa yaco ko koya vei iratou na tisaipeli, sa raica era sa lewe vuqa sara sa voliti iratou, kei na vunivola eso era sa veileti kei iratou.

¹⁵ Ia ko ira kece na lewe vuqa, ni ra sa raici koya, era sa kurabui sara, a ra sa cici mai ka veikidavaki kaya.

¹⁶ A sa tarogi ira na vunivola ko koya, “A cava dou veileti kina kei iratou?”

¹⁷ Ka dua vei ira na lewe vuqa sa vosa, ka kaya, “Vakavuvuli, au sa kauta mai vei kemuni na luvequ-tagane, sa curumi koya e dua na yalo galu.

¹⁸ Ia e na gauna kecega sa tauva kina, sa viritaki koya sobu, ka sa qai busebuse kasivi ko koya, ka vakasequruquru bati, ka ciba yani. Ia ka'u a vosa vei iratou na nomu tisaipeli me ratou vakaseva tani, ka ratou sa sega ni rawata.”

¹⁹ Sa qai vosa ko koya, ka kaya, “Ai tabatamata sega ni vakabauta! A cava na kena dede me'u tiko kei kemudou? A cava na kena dede me'u vosoti kemudou? Kauti koya mai vei au.”

²⁰ A ra sa kauta mai vei koya. Ia ni sa raici koya ko koya, sa bitabitalaka sara na yalo, a sa bale ki na soso ko koya, ka vakatatoqitoqi ka tuburaki vuso.

²¹ A sa taroga na tamana ko Jisu, “Sa vakaevei na kena dede ni sa tauvi koya na ka oqo?” A sa kaya, “Ni se gone lailai sara.

²² Sa dau biuti koya vakavuqa ki na bukawaqa, ki wai talega, me vakamatea; ia kevaka ko ni sa rawata e dua na ka, mo ni lomani keirau mai, ka vukei keirau.”

²³ Sa qai kaya vua ko Jisu, “ ‘Kevaka ko sa rawata’!—Sa rawa na ka kecega vua sa vakabauta.”

²⁴ Sa qai tabalaka vakasauri na domona na tama ni gone, ka kaya e na mata tagitagi, “Kemuni na Turaga, au sa vakabauta; ni qai vukea na noqu tawa-vakabauta!”

²⁵ Ia ni sa raica ko Jisu era sa cici vata mai na lewe vuqa, sa vunauca na yalo velavela, ka kaya vua, “O iko na yalo ni galu kei na didivara, au sa vakarota vei iko, mo lako tani mai vua, ka mo kakua ni curuma tale!”

²⁶ A sa qoqolou, ka bitabitalaka vakalevu, a sa qai lako tani, a sa vaka e dua sa mate ko koya, ka ra sa kaya kina e lewe vuqa, “Sa mate ko koya.”

²⁷ A sa taura na ligana ko Jisu, ka vakaduria cake, ka sa qai tucake mai.

²⁸ Ia ni sa curu ki vale ko koya, sa tarogi koya lo ko ira na nona tisaipeli, “E na vuku ni cava keitou sa sega ni vakasevi koya tani rawa kina?”

²⁹ A sa kaya vei ira ko koya, “O ira vakaoqo era sa sega ni vakasevi tani wale, sa rawa ga e na daumasu kei na lolo.”

Sa Tukuna Tale ko Jisu na Nona Mate

³⁰ A ra sa lako tani mai keri, ka lako voli e Kalili; a sa sega ni vinakata ko koya me dua na tamata me kila.

³¹ Ni sa vakavulici ira na nona tisaipeli ko koya, ka kaya vei ira, “Sa voleka na nona soli yani na Luve ni Tamata ki na ligadra na tamata, ka ra na vakamatea; ia ni sa vakamatei, ena qai tucake tale mai e nai katolu ni siga.”

³² A ra sa sega ni kila nai balebale ni vosa ko ya, a ra sa rere ni tarogi koya.

Ko Cei e Liu Duadua?

³³ Era sa qai yaco ki Kapenaumi; ia ni sa curu ki vale sa tarogi ira, “A cava dou sa veileti kina e na gaunisala?”

³⁴ A ra sa vagagalu ga, ni ra a veileti vakai ira e na gaunisala, se ko cei sa levu cake vei ira.

³⁵ A sa tiko sobu ko koya, ka kacivi ira na lewe tinikarua, ka kaya vei ira, “Kevaka e dua sa vinakata me liu, ia me na kenai murimuri sara, ka me dauveiqaravi ni tamata kecega.”

³⁶ A sa qai kauta e dua na gone lailai, ka vakatura e na kedra maliwa; ia ni sa keveta, sa kaya vei ira,

³⁷ “O koya yadua ena ciqoma e dua na gone lailai vakaoqo e na vuku ni yacaqu, sa ciqomi au; ia ko koya yadua sa ciqomi au, sa sega ni ciqomi au walega, sa ciqomi koya talega sa talai au mai.”

O Koya sa Sega ni Veisaqasaqa kei Keda sa To Vata kei Keda

³⁸ Sa qai vosa vua ko Joni, ka kaya, “Vakavuvuli, keitou a raica e dua sa vakaseva tani na tevoro eso e na yacamuni, ia ka sega ni muri keda ko koya; ka keitou sa tarova, ni sa sega ni muri keda.”

³⁹ A sa kaya ko Jisu, “Kakua ni tarova, ni sa sega e dua sa cakava e dua na cakacaka-mana e na yacaqu, me qai vosacataki au rawa.

⁴⁰ Ni sa noda i to ko koya sa sega ni noda meca.

⁴¹ Ia ko koya yadua ena solia vei kemudou e dua na bilo wai mo dou gunuva, ni dou sai tokani i Karisito, au sa kaya vakaidina vei kemudou, ena sega ni yali vei koya na kenai sau.

Na Veiveretaki ki nai Valavala Ca

⁴² “Ia ko koya yadua ena vakacala e dua vei ira na lalai oqo era sa vakabauti au, sa vinaka cake vua kevaka sa vakarubeci e domona e dua na vatu-i-qaqi, ka qai biu ki loma ni wasaliwa.

⁴³ Ia kevaka sa vakacalai iko na ligamu, muduka tani. Sa vinaka vei iko mo curu ki na bula ka liga dua, ka ca me rua na ligamu ka mo lako ki Eli, ki na bukawaqa e sega ni bokoci rawa.

⁴⁴ [Sa sega ni mate kina na nodra baca, a sa sega ni bokoci kina na bukawaqa.]

⁴⁵ Ia kevaka sa vakacalai iko na yavamu, muduka tani. Sa vinaka vei iko mo curu ki na bula ka yava dua, ka ca me rua na yavamu ka mo biu ki Eli, ki na bukawaqa e sega ni bokoci rawa.

⁴⁶ [Sa sega ni mate kina na nodra baca, a sa sega ni bokoci kina na bukawaqa.]

⁴⁷ Ia kevaka sa vakacalai iko na matamu, vecuka tani. Sa vinaka vei iko mo curu ki na matanitu ni Kalou ka dua bauga na matamu, ka ca me rua na matamu ka mo biu ki Eli sa waqa kina na buka,

⁴⁸ ‘ni sa sega ni mate kina na nodra baca, a sa sega ni bokoci kina na bukawaqa.’

⁴⁹ “Ni na vakamasimataki ko koya yadua e na bukawaqa, ka na vakamasimataki nai madrali kece e na masima.

⁵⁰ A ka vinaka na masima, ia kevaka sa takali mai na masima na kena tuituina, ena vakatuituinataki tale e na cava? Me tu ga e na lomamudou na masima, dou veilomani talega vakai kemudou.”