Marika 7 - Ai Vola Tabu (Vakadewa Makawa Vakavoutaki 2021)

Na Nodra i Vakavuvuli na Qase

¹ Sa qai soqoni vata vua ko ira na Farisi, kei na vunivola eso, era sa lako mai Jerusalemi.

² Ia ni ra sa raica na nona tisaipeli eso era kana ni sa dukadukali na ligadra, ka ni sa sega ni vuluvulu mada, era sa vakaucacataka.

³ Ia ko ira na Farisi, kei ira kecega na Jiu, era sa sega ni kana ni ra sa sega ni vuluvulu vakavinaka mada, ni ra sa vakabauta na nodra i vakavuvuli na qase.

⁴ Ia ni ra sa tale mai na veivoli, era sa vuluvulu mada, a ra sa qai kana. A sa vuqa tale na ka tani era sa vakabauta me ra muria, na dere bilo ni gunu, kei na bilo i vakarau, kei na bilo parasa, kei nai tikotiko.

⁵ Sa qai tarogi koya ko ira na Farisi, kei ira na vunivola, “Ena cava era sa sega ni muria na nodra i vakavuvuli na qase ko ira na nomu tisaipeli, ni ra sa kana ka sega mada ni vuluvulu?”

⁶ A sa vosa ko koya, ka kaya vei ira, “Sa tukuni kemudou vinaka eliu ko Aisea, koi kemudou na dauveivakaisini, me vaka sa volai, ‘Ko ira na tamata oqo, era sa vakarokorokotaki au e na tebenigusudra, ia na yalodra sa yawa tani vei au.

⁷ A sa sega ni yaga na nodra masuti au, ni ra sa vakatavuvulitaka na vunau ni tamata mei vakavuvuli.’

⁸ Ni dou sa biuta tani na vunau ni Kalou, ka vakabauta nai vakavuvuli ni tamata.”

⁹ A sa kaya vei ira ko koya, “Sa dina sara ni dou biuta na vunau ni Kalou, mo dou vakabauta na nomudou i vakavuvuli.

¹⁰ Ni sa kaya ko Mosese, ‘Vakarokoroko vei rau na tamamu kei na tinamu;’ ia, ‘Ko koya sa vosavakacacataka na tamana se na tinana, me sa vakamatei.’

¹¹ Ia dou sa kaya ni kevaka e dua na tamata sa kaya vei tamana se tinana, ‘Na veika e noqu ka sa yaga vei iko sa Koripani’ (a kenai balebale, Sa tabu me nona na Kalou)—

¹² ka dou sa qai tarova kina me kakua ni cakava e dua na ka ko koya me yaga vua na tamana se na tinana,

¹³ ka dou sa qai vakatawayagataka kina na vunau ni Kalou e na nomudou i vakavuvuli dou sa dauvakatavulica. Ka sa vuqa na veika vakaoqo dou sa kitaka.”

Na Ka e Vakadukadukalitaka na Tamata

¹⁴ Ia ni sa kacivi ira kecega mai na lewe vuqa ko koya, sa kaya vei ira, “Dou rogoci au koi kemudou kecega, ka mo dou kila:

¹⁵ Sa sega na ka e taudaku ni tamata, ni sa curu ki lomana sa vakadukadukalitaka rawa, ia na veika ga sa lako mai vua sa vakadukadukalitaka na tamata.

¹⁶ Kevaka e dua na tamata sa vakadaligana me rogoca, me mani rogoca sara.”

¹⁷ Ia ni sa laivi ira na lewe vuqa ko koya, ka curu ki vale, sa tarogi koya ko ira na nona tisaipeli e na vuku ni vosa vakatautauvata.

¹⁸ A sa kaya vei ira ko koya, “Oi kemudou talega, dou sa sega ni kila rawa oqo, ne? Dou sa sega beka ni kila, na ka kecega e taudaku sa curuma na tamata, sa sega ni vakadukadukalitaka rawa,

¹⁹ ni sa sega ni curu dina ki na yalona, ki ketena walega, ka sa qai lako tani ki nai benubenu?” (A sa caka kina me savasava na kakana kecega.)

²⁰ Sa kaya talega ko koya, “A ka sa curu tani mai na tamata, oqori ga sa vakadukadukalitaka na tamata.

²¹ Ni veika e lako mai loma, mai na yalodra na tamata, na vakanananu ca, na veibutakoci, na veidauci, na daulaba,

²² na daubutako, na daukocokoco, nai valavala ca, na dauveivakaisini, na daugagano, na mata ca, na vosa vakacaca, na viavialevu, nai valavala lialia.

²³ A ka ca kecega oqo sa lako mai loma, ka sa vakadukadukalitaka na tamata.”

Na Nona Vakabauta e Dua na Yalewa

²⁴ Sa qai cavu tu ko koya, ka lako tani mai keri vaka ki na veiyasana i Taia kei Saitoni. A sa curu ki na dua na vale ka sega ni vinakata me dua na tamata me kila, ia sa sega ni vuni rawa ko koya.

²⁵ Ia sa dua na yalewa ka curuma na luvena sa goneyalewa e dua na yalo velavela, sa rogoca na kenai tukutuku, a sa lako mai ka cuva ki na yavana.

²⁶ A sa yalewa mai na dua na matanitu tani, a yalewa ni Sairo-finisia. A sa masuti koya me cemuria tani na tevoro mai na luvena-yalewa.

²⁷ A sa kaya vua ko Jisu, “Me ra vakani mada eliu ko ira na gone, ni sa sega ni vinaka me kau na kedra na gone ka biuta vei ira na koli.”

²⁸ A sa vosa na yalewa, ka kaya vua, “E dina sara, na Turaga; ia ko ira na koli e ruku ni tepeli era daukania na meme ni kedra na gone.”

²⁹ Sa qai kaya vua ko koya, “E na vuku ni vosa oqori, mo lako ga—sa lako tani mai vua na luvemu-yalewa na tevoro.”

³⁰ Ia ni sa yaco ki nona vale, sa kunea ni sa lako tani na tevoro, ka sa davo e nai mocemoce na luvena-yalewa.

Sa Vakabula ko Jisu e Dua na Tamata Didivara ka Galu

³¹ A sa lesu tale ko koya mai na veiyasana i Taia kei Saitoni, a sa lako e loma ni vanua vaka-Tikapoli, ki na wai mai Kalili.

³² A ra sa kauta mai vei koya e dua sa didivara, a sa kaka; a ra sa masuti koya me tabaka e na ligana.

³³ A sa kauti koya vakatikitiki mai vei ira na lewe vuqa, a sa daramaka na nona i qaqalo ki na daligana ruarua ni tamata, ka kasivi, ka tara na yamena;

³⁴ sa qai ta cake ki lomalagi, ka vutugu, ka kaya vua, “Efaca,” a kenai balebale, “Mo rogo mada.”

³⁵ A sa qai rogo na daligana ruarua, a sa sereki na wa ni yamena, ka sa vosa macala mai.

³⁶ Sa qai vakarota vei ira ko koya me ra kakua ni tukuna vua e dua na tamata; ia na levu ga ni nona vakaroti ira ko koya, na levu talega ni nodra gumatua e na veitukuniyaka.

³⁷ Ka sa kurabui vakalevu sara ko ira, ka kaya, “Sa cakava vakavinaka na ka kecega ko koya; sa cakava vei ira na didivara me ra rogo, kei ira talega na galu me ra vosa.”