Marika 6 - Ai Vola Tabu (Vakadewa Makawa Vakavoutaki 2021)

Sega ni Vinakati ko Jisu mai Nasareci

¹ Sa qai lako tani mai keri ko koya, ka lako ki na nona vanua; a sa muri koya ko ira na nona tisaipeli.

² Ia ni sa yaco na Siga ni Vakacecegu, sa vakatekivu ko koya me vakatavuvuli e na valenilotu, ka ra sa kurabui e lewe vuqa sa rogoca, ka kaya, “Sa rawata mai vei ko koya oqo na veika oqo? Se na vuku cava oqo sa soli vua, me sa caka kina e na ligana na veika-mana vakaoqo?

³ Sa sega li ni matai ko koya oqo, a luve i Meri, kei na tuakai Jemesa, kei Josese, kei Juta, kei Saimoni? Kei na ganena, eratou sa sega li ni tiko vata kei keda?” A ra sa tarabe e na vukuna.

⁴ A sa kaya vei ira ko Jisu, “Sa vakarokorokotaki na parofita e na vanua tani, e na nona vanua dina ga e segai, se vei ira na kai nona, se e na nona vale.”

⁵ A sa sega ni cakava rawa mai kea e dua na cakacaka mana, sa tabaki ira walega e na ligana e lewe vica sa tauvi-mate, ka vakabula.

⁶ A sa kurabui ko koya e na vuku ni nodra sega ni vakabauta. A sa lako voli ki na veikoro lalai, ka vakatavuvuli.

Sa Talai Iratou na Tisaipeli e Tinikarua ko Jisu

⁷ A sa kacivi ira mai na lewe tinikarua ko koya, ka vakatekivu me talai ira me ra lako yarua; a sa solia vei ira na kaukauwa me ra rawai ira na yalo velavela.

⁸ A sa vakarota vei ira me ra kakua ni kauta e dua na ka e na gaunisala, ai titoko walega; me kakua na taga ni vaqa, se na madrai, se nai lavo e na taga;

⁹ ia me ra vakaivava ga ka me ra kakua ni kauta e rua nai sulu.

¹⁰ A sa kaya vei ira ko koya, “Ni dou sa curu ki na dua na vale e na dua na yasana, dou tiko ga kina ka yacova na nomudou lako tani mai na tikina ko ya.

¹¹ Ia ko ira kecega sa sega ni vakacegui kemudou, se rogoci kemudou, ni dou sa lako tani e na yasana ko ya, dou kureitaka laivi na kuvu-ni-soso mai na yavamudou, mei vakatakilakila vei ira. Au sa kaya vakaidina vei kemudou, Ena ca vakalailai ko Sotoma kei Komora e na siga ni lewa, ena ca vakalevu na koro ko ya.”

¹² A ra sa lako yani, ka dauvunau me veivutuni na tamata.

¹³ A sa lewe vuqa na tevoro era sa vakaseva tani; a ra sa lewe vuqa sa tauvi-mate era sa walia e na waiwai, ka vakabula.

Na Mate i Joni na Dauveipapitaisotaki

¹⁴ Ni sa rogoca ko Eroti na tui ni sa kuruvaki na yacana, a sa kaya, “Sa tucake tale mai na mate ko Joni na dauveipapitaisotaki. O koya ga sa cakava kina ko koya na kaukauwa mana oqo.”

¹⁵ Era sa kaya eso tale, “Oqo ko Ilaijia.” A ra sa kaya eso tale, “Sa dua na parofita, se sa vaka e dua vei ira na parofita.”

¹⁶ Ia ni sa rogoca ko Eroti, sa kaya, “Ko Joni ga oqo, ko koya ka'u a tamusuka na uluna, sa tucake tale mai na mate ko koya.”

¹⁷ Ni sa talaki eliu ko Eroti, ka tauri Joni, ka vesuka e na valeniveivesu, e na vuku i Erotiasa na wati Filipe na tacina; ni rau sa veiwatini kaya.

¹⁸ Ni sa kaya vei Eroti ko Joni, “Sa sega ni tara mo drau veiwatini kei na wati tacimu.”

¹⁹ A sa cati koya kina ko Erotiasa, a sa vinakata me vakamatea. Ia ka sa sega ni rawata,

²⁰ ni sa rerevaki Joni ko Eroti, ni sa kila sa tamata yalododonu ka yalosavasava ka sa vakarurugi koya. Ia ni sa rogoci koya, sa dau vakayavalata na lomana, ia sa vinakata ga me daurogoci koya.

²¹ Ia sa qai yaco mai e dua na gauna, a siga ni sucu i Eroti, ka sa cakava ko koya na kedra magiti na turaga ni vanua, kei na turaga-ni-valu, kei ira na qase ni Kalili.

²² Ni gauna sa curu yani kina na yalewa na luve i Erotiasa, ka meke, a sa vakalomavinakataki Eroti kei ira era sa kana vata kaya. Sa qai kaya na tui vua na goneyalewa, “Kerea vei au na ka ko sa vinakata, ka'u na solia vei iko.”

²³ A sa bubului vua, “A ka ko na kerea vei au, au na solia vei iko, kevaka ka'u na wasea rua kina na noqu matanitu.”

²⁴ A sa curu yani ko koya, ka tarogi tinana, “A cava me'u kerea?” A sa kaya ko koya, “Na ulu i Joni na dauveipapitaisotaki.”

²⁵ A sa curu kusarawa tale vua na tui ko koya, ka masuta, ka kaya, “Au sa vinakata mo ni solia mada mai vei au na ulu i Joni na dauveipapitaisotaki e na dua na dari.”

²⁶ A sa rarawa vakalevu sara na tui, ia e na vuku ni nona bubului kei na vukudra talega era sa tiko kaya, sa sega ni via bureitaka vua.

²⁷ A sa tala sara na tui e dua vei ira na sotia i vakatawa, a sa kaya me kau mai na uluna. A sa lako ka tamusuka na uluna e na valeniveivesu,

²⁸ ka kauta mai na uluna e na dua na dari, ka solia vua na goneyalewa. A sa solia na goneyalewa vei tinana.

²⁹ Ia ni ra sa rogoca ko iratou na nona tisaipeli, eratou sa lako mai ka kauta na yagona, ka buluta.

Sa Vakani Ira e Lewe Lima na Udolu ko Jisu

³⁰ A ra sa soqoni vata vei Jisu ko ira nai apositolo, ka tukuna vua na ka kecega, a ka era sa cakava, kei na ka talega era sa vakavuvulitaka.

³¹ A sa kaya vei ira ko koya, “Dou lako mai ka vakatikitiki ki na dua na vanua galala, ka mo dou vakacegu mada vakalailai.” Ni ra sa lewe vuqa era lako mai ka lako yani, a ra sa sega kina ni lalaga me ra kana.

³² A ra sa vodoka na waqa, ka lako vakatikitiki tani ki na dua na vanua galala.

³³ Ia ko ira na lewe vuqa era sa raica ni ra sa lako yani, a ra sa lewe vuqa sa kilai ira, a ra sa cici e vanua mai na veikoro kece, ka siviti ira.

³⁴ A sa lako mai ko Jisu, ka raici ira era sa lewe vuqa sara, a sa lomani ira, ni ra sa vaka na sipi sa sega na nodra i vakatawa. A sa vakatekivu me vakatavulici ira e na ka e vuqa.

³⁵ Ia ni sa kala na siga, sa lako mai vei koya ko ira na nona tisaipeli, ka kaya, “Oqo e dua na vanua lala, ka sa kala na siga.

³⁶ Mo ni vakatalai ira yani me ra lako ki na veiyasana kei na veikoro lalai sa vakavolivoliti keda, me ra volia na kedra madrai, ni sa sega na ka vei ira me ra kania.”

³⁷ A sa vosa ko koya, ka kaya vei ira, “Dou solia vei ira e dua na ka me ra kania.” Era sa qai kaya vua, “Me keitou laki volia beka na madrai e na pene e rua na drau, ka solia vei ira me ra kania?”

³⁸ A sa kaya vei ira ko koya, “E vica nai buli madrai sa tu vei kemudou? Dou laki raica.” Ia ni ra kila, era sa kaya, “E lima, ka rua na ika.”

³⁹ A sa kaya ko koya me ra tiko sobu kecega vakaivavakoso e na co drokadroka.

⁴⁰ A ra sa tiko sobu vakaiwasewase, sa yayadrau se yayalimasagavulu.

⁴¹ Ia ni sa taura ko koya nai buli madrai e lima kei na ika e rua, sa ta cake ki lomalagi, ka lotutaka, ka dovia na veibuli madrai, ka solia vei ira na nona tisaipeli me ra tauca e matadra na tamata. A sa vota ko koya na ika e rua vei ira kecega.

⁴² A ra sa kana kecega, ka ra sa mamau.

⁴³ A ra sa tomitomika vata na madrai sa vo, kei na ika talega, a sa tinikarua nai su sa sinai kina.

⁴⁴ Ia ko ira era sa kania na veibuli madrai era lewe lima beka na udolu na tagane.

Sa Lako e Dela ni Wai ko Jisu

⁴⁵ Sa qai vakarota sara ko koya vei ira na nona tisaipeli me ra vodoka na waqa, ka me ra liu ki tai kadua ki Pecisaita, me sa vakatalai ira mada yani na lewe vuqa ko koya.

⁴⁶ Ia ni sa vakatalai iratou oti, sa lako ko koya ki na ulunivanua, me masu.

⁴⁷ Ia ni sa yakavi mai, sa tiko na waqa e loma ni wai, ka sa tiko duaduaga ko koya e vanua.

⁴⁸ A sa raici iratou ni ratou sa oca e na voce, ni sa saqati iratou tiko na cagi. Ia ni sa yaco mada nai kava ni wase ni bogi, sa qai lako vei iratou ko koya, sa lako voli e dela ni wai. A sa nanuma me lako siviti ratou.

⁴⁹ Ia ni ratou sa raica ni sa lako voli ko koya e dela ni wai, eratou sa nanuma sa dua na yalo, a ratou sa qoqolou;

⁵⁰ ni ratou sa raici koya kecega ka sa kidroa. A sa vosa sara vei iratou ko koya, ka kaya vei ira, “Dou vakacegu, sai au ga. Dou kakua ni rere.”

⁵¹ A sa cabe vei iratou ki waqa, a sa ruru na cagi. A ratou sa kidacala vakalevu sara e lomadratou, ka kurabui,

⁵² ni ratou sa sega ni vakasamataka na veibuli madrai, ni sa kaukauwa na lomadratou.

Sa Vakabulai Ira na Tauvimate mai Kenisareti ko Jisu

⁵³ Ia ni ratou sa lako ki tai kadua, eratou sa yaco ki na nodra vanua na kai Kenisareti, a ratou sa udu ki matasawa.

⁵⁴ Ia ni ratou sa sobu mai waqa, era sa kilai koya sara,

⁵⁵ ka cici ki na veiyasana kece sa vakavolivolita, a ra sa vakatekivu me colati ira e nai mocemoce era sa tauvi-mate, ki na yasana era rogoca sa tiko kina ko koya.

⁵⁶ Ia na yasana kece sa lako kina ko koya, se na veikoro lalai, se na veikoro lelevu, se vanua, era sa vakotori ira sa tauvi-mate e na veisala, ka masuti koya me ra bau tara walega na tutu ni nona i sulu. Ia ko ira kecega sa tara, era sa vakabulai.