Marika 3 - Ai Vola Tabu (Vakadewa Makawa Vakavoutaki 2021)

Na Tamata Liga Mate

¹ A sa curu tale ko koya ki na valenilotu, a sa tiko kina e dua na tamata sa mate na ligana.

² A ra sa vakaraici koya, se na vakabulai koya e na Siga ni Vakacecegu, se segai, me ra qai beitaki koya.

³ Sa qai kaya ko koya vua na tamata sa mate na ligana, “Tucake mai.”

⁴ A sa tarogi ira, “Sa tara beka me caka na ka vinaka e na Siga ni Vakacecegu, se me caka na ka ca? Me ia na veivakabulai, se na veivakamatei?” A ra sa galu ga.

⁵ Ia ni sa rai voli vakacudrucudru vei ira ko koya, ni sa rarawa na lomana e na vuku ni kaukauwa ni yalodra, sa kaya vua na tamata, “Dodoka mai na ligamu.” A sa dodoka yani, a sa vakabulai na ligana ka yaco me vaka na ligana kadua.

⁶ A ra sa lako yani na Farisi, ka bosei koya sara ko ira vata kei ira nai tokani i Eroti, se ra na vakamatei koya vakaevei.

Na Lewe Vuqa e na Bati ni Drano

⁷ A sa lako tani ko Jisu vaka ki wai kei ira vata kaya na nona tisaipeli, a ra sa lewe vuqa sara sa muri koya mai Kalili, kei Jutia,

⁸ mai Jerusalemi talega, kei Itumia, kei na tai kadua ni Joritani; ko ira talega e na veiyasana i Taia kei Saitoni, era lewe vuqa sara, ni ra sa rogoca na levu ni veika sa cakava ko koya, era sa lako mai vei koya.

⁹ A sa kaya ko koya vei ira na nona tisaipeli me vakarautaki toka e dua na waqa lailai vei koya, e na vukudra na lewe vuqa, de ra drigiti koya;

¹⁰ ni ra sa lewe vuqa sa vakabula ko koya, ka ra sa drigiti koya kina me ra tarai koya, ko ira kecega era sa tauvi-mate.

¹¹ O ira talega na yalo velavela, ni ra sa raici koya, era sa cuva sobu e matana, ka ra sa qoqolou ka kaya, “O iko na Luve ni Kalou.”

¹² A sa vakarota matua vei ira ko koya me ra kakua ni tukuni koya.

Sa Digitaki Iratou nai Apositolo ko Jisu

¹³ A sa cabe ki na ulunivanua ka kacivi ira mai sa digitaka, ka ra sa lako mai vua.

¹⁴ A ra sa lewe tinikarua sa lesia ko koya, me ra tiko vata kaya, ka me talai ira yani ko koya me ra vunau,

¹⁵ ka me tu talega vei ira na kaukauwa me ra vakasevi ira na tevoro.

¹⁶ A sa vakayacani Saimoni ko koya mei Pita,

¹⁷ kei Jemesa na luve i Sepete, kei Joni na taci Jemesa, a sa vakayacani rau ko koya mei Poanaji, e kenai balebale, A luve ni kurukuru;

¹⁸ kei Adriu, kei Filipe, kei Pacolomiu, kei Maciu, kei Tomasi, kei Jemesa na luve i Alifio, kei Cateo, kei Saimoni e dua vei ira sa vakatokai Na gumatua,

¹⁹ kei Jutasa Isikarioti, ko koya sa soli koya yani. A sa curu ko koya ki na dua na vale.

Ko Jisu kei Pielisepupi

²⁰ A ra sa lewe vuqa sa soqoni vata tale, a ra sa sega kina ni kania rawa na kedra.

²¹ Ia ni ratou sa rogoca ko iratou na wekana, eratou sa lako mai me ratou tauri koya, ni ratou sa kaya, “Sa lialia ko koya.”

²² Ia ko ira na vunivola ka lako sobu mai Jerusalemi, era sa kaya, “Sa tiko vua ko Pielisepupi, a sa vakasevi ira na tevoro e na kaukauwa ni nodra turaga na tevoro.”

²³ A sa kacivi ira mai ko koya, ka kaya vei ira e na vosa vakatautauvata, “E rawata vakaevei ko Setani me vakasevi Setani?

²⁴ Ia kevaka sa dua na matanitu sa veisei vakai koya, ena sega ni tudei rawa na matanitu ko ya.

²⁵ Ia kevaka sa dua na vale sa veisei vakai koya, ena sega ni tudei rawa na vale ko ya.

²⁶ Ia kevaka sa ia ko Setani me veivala vakai koya, ka veisei, ena sega ni tudei rawa, ena oti ga.

²⁷ Sa sega na tamata me curuma rawa na vale ni qaqa, ka kovea na nona i yaya, kevaka sa sega mada ni vesuka na qaqa, ena qai kovea e muri na nona i yau.

²⁸ “Au sa kaya vakaidina vei kemudou, Sa rawa me vosoti na nodra i valavala ca kecega na luve ni tamata, kei na nodra vosa ca kecega era sa vosavakacacataka kina na Kalou,

²⁹ ia ko koya sa vosavakacacataka na Yalo Tabu ena sega tikoga ni vosoti na nona i valavala ca, ia sa tu vua na nona cala ka tawa mudu”—

³⁰ ni ra kaya, “Sa dua na yalo velavela sa tu vua.”

Ko Ira era sa Wekai Jisu Dina

³¹ Sa qai lako mai ko iratou na tinana, kei na tacina, a ratou sa tu e tautuba, ka talaki vua me lako mai.

³² Ia era sa lewe vuqa sa tiko vakavolivolita, ka ra sa kaya vua, “Raica, na tinamu kei iratou na tacimu eratou sa tu e tautuba, eratou mai qarai iko.”

³³ A sa vosa vei ira, ka kaya, “Ko cei na tinaqu se ko iratou na taciqu?”

³⁴ A sa vakaraici ira era sa tiko vakavolivoliti koya, ka kaya, “Raica, oqo na tinaqu kei ira na taciqu!

³⁵ Ko koya yadua sa muria na loma ni Kalou, sai koya oqo na taciqu, se na ganequ, se na tinaqu.”