Marika 13 - Ai Vola Tabu (Vakadewa Makawa Vakavoutaki 2021)

Sa Tukuna ko Jisu na Rusa ni Valenisoro

¹ Ia ni sa lako tani ko koya e na vale-ni-soro, sa kaya vua e dua vei ira na nona tisaipeli, “Vakavuvuli, raica, na kenai rairai ni veivatu, kei na veivale oqo!”

² A sa vosa ko Jisu, ka kaya vua, “O sa raica na veivale lelevu oqo, ne? Ena sega ni vo e dua na vatu me veitaqataqai, ena talaraki sobu kecega.”

Na Leqa kei na Veivakararawataki

³ Ia ni sa tiko ko koya mai na ulunivanua ni veiolive sa donuya na vale-ni-soro, eratou sa tarogi koya lo ko Pita kei Jemesa kei Joni kei Adriu,

⁴ “Mo ni tukuna mai vei keitou, se na yaco ninaica na veika oqo; ia ka cava na kenai vakatakilakila ni sa voleka ni yaco na ka kecega oqo.”

⁵ Sa qai vosa vei iratou ko Jisu, ka kaya, “Raica vinaka de vakacalai kemudou e dua.

⁶ Era lewe vuqa ena lako mai e na yacaqu, ka kaya, ‘Sai au ko koya!’ Ia ka lewe vuqa era na vakacala.

⁷ Ia ni dou na rogoca nai valu, kei nai rogorogo ni valu, dou kakua ni kidroa. Ni sa kilikili me yaco, ia sa bera ga nai vakataotioti.

⁸ Ni ra na veibolebolei na veivanua eso, kei na veimatanitu eso. Ena tavuki na vanua e na veiyasana e vuqa, ena yaco talega na dausiga. Oqo nai vakatekivu ga ni ka rarawa.

⁹ “Ia dou qarauni kemudou vinaka; ni dou na soli yani ki na mataveilewai, dou na vakanakuitataki e na veivalenilotu; dou na kau talega ki na matadra na kovana, kei na tui, e na vukuqu, mei vakadinadina vei ira.

¹⁰ Ia ena vunautaki dina mada eliu nai tukutuku-vinaka e na veivanua kecega.

¹¹ Ia ni dou sa kau yani, ka soli me lewai, dou kakua mada ni lomaocaoca se cava mo dou kaya, dou kakua talega ni vakanananu ki liu; ia na ka kecega ena soli vei kemudou e na tiki-ni-siga ko ya, sai koya ga mo dou vosataka, ni dou sa sega ni vosa koi kemudou, sa vosa ga na Yalo Tabu.

¹² Ia era na dui soli ira yani na veitacini me vakamatei, kei na tama ni gone ena solia na luvena; ia era na tucake na gone vei ira na nodra qase, ka vakavuna na nodra mate.

¹³ Ia era na cati kemudou ko ira na tamata kecega e na vuku ni yacaqu; ia ko koya ena vosota me yacova nai vakataotioti, ena vakabulai ko koya.

Na Veika Vakasisila e Veivakarusai

¹⁴ Ia ni dou sa raica e na yasana sa tabu ni tu kina na ka vakasisila sa dauveivakarusai, o koya sa vosa kina ko Taniela na parofita, (me kila ko koya sa wilika,) me qai dro ki na veiulunivanua ko ira era sa tiko e Jutia;

¹⁵ ia me kakua ni lako sobu ki vale ko koya sa tiko e delana, se curu kina, me kauta tani e dua na ka mai na nona vale;

¹⁶ ia me kakua ni lesu tale ko koya sa tiko e na were, me kauta na nona i sulu.

¹⁷ Ka na ca vei ira sa bukete, kei ira era sa vakasucuma na gone, e na gauna ko ya!

¹⁸ Ia dou masu me na kakua ni yaco e na vula i liliwa.

¹⁹ Ni na yaco na ka rarawa e na gauna ko ya; sa sega ni vakakina mai nai vakatekivu ni nona buli ka na Kalou ka yacova na siga oqo, ka na sega talega e muri.

²⁰ Ia kevaka sa sega ni vakalekalekataka na gauna ko ya na Turaga, sa sega na tamata me bula rawa. Ia e na vukudra na digitaki, ko ira sa digitaka ko koya, sa vakalekalekataka ko koya na gauna ko ya.

²¹ Kevaka ena qai kaya vei kemudou e dua, ‘Raica! Sa tiko eke na Karisito!’ se ‘Raica! Sa tiko mai kea!’—kakua ni vakabauta.

²² Ni na tubu mai na Karisito vakailasu eso, kei na parofita vakailasu eso, a ra na vakatakila mai na veivakatakilakila kei na veika e veivakurabuitaki, me vakacalai ira kina na digitaki, kevaka e rawa.

²³ Ia dou qarauni kemudou vinaka. Raica, au sa tukuna eliu vei kemudou na ka kecega.

Na Lako mai ni Luve ni Tamata

²⁴ Ia e na gauna ko ya, ni sa oti mada na ka rarawa ko ya, ena qai vakabutobutotaki na mata-ni-siga, ka na sega talega ni cila na rarama ni vula,

²⁵ ka na lutu mai na veikalokalo ni lomalagi, ka na veitosoyaki na veika kaukauwa ni lomalagi.

²⁶ Ia era na qai raica na Luve ni Tamata ni sa lako mai e na veio, e na kaukauwa levu kei nai ukuuku.

²⁷ Ena qai talai ira na nona agilosi ko koya, ka vakasoqoni ira vata na nona digitaki mai na mata ni cagi e va, mai nai yalayala kei vuravura kei nai yalayala kei lomalagi.

Na Vosa Vakatautauvata Baleta na Vuni Lolo

²⁸ “Mo dou kila mada na vosa vakatautauvata ni lolo; Ni sa qai lavovou na tabana, a sa tubu na drauna, dou sa kila sa voleka na vula i katakata.

²⁹ Me vaka talega kina koi kemudou, ni dou sa raica sa yaco na veika oqo, dou kila sa voleka ko koya, io mai katuba.

³⁰ Au sa kaya vakaidina vei kemudou, ena sega ni takali nai tabatamata oqo, ena yaco mada eliu na ka kecega oqo.

³¹ Ena takali ko lomalagi kei vuravura, ia na noqu vosa ena sega ni takali.

E Sega ni Dua e Kila na Kena Siga

³² “Ia na siga ko ya kei na tiki-ni-siga ko ya sa sega e dua e kila, ko ira na agilosi mai lomalagi e segai, se na Luvena, ia ko Tamaqu duaduaga.

³³ Dou qarauni kemudou vinaka. Dou vakatawa ka masu, ni dou sa sega ni kila na kena gauna.

³⁴ Oqo sa vaka e dua na tamata e lako ki na vanua tani, ko koya ni sa biuta na nona vale, a sa lesia vei ira na nona tamata me ra lewa, ka lesia vei ira yadua na nodra cakacaka, ka sa kaya talega vua nai vakatawa me yadra tiko.

³⁵ O koya mo dou qai yadra tiko—ni dou sa sega ni kila na tiki-ni-siga ena lako mai kina nai taukei ni vale, se ni sa yakavi, se ni sa lomaloma ni bogi, se ni sa tagi na toa, se ni mataka—

³⁶ de lako vakasauri mai, ka kunei kemudou ni dou sa moce ga.

³⁷ Ia na ka ka'u sa kaya vei kemudou, ka'u sa kaya vei ira kecega: Dou vakatawa.”