Marika 12 - Ai Vola Tabu (Vakadewa Makawa Vakavoutaki 2021)

Na Vosa Vakatautauvata ni Tamata ena Loga-ni-vaini

¹ A sa vakatekivu ko koya me vosa vei ira e na vosa vakatautauvata. “Sa dua na tamata sa tea e dua na loga-ni-vaini, a sa viribaita vakavolivolita, a sa kelia nai keli-waini, a sa tara na nodra vale nai vakatawa, a sa lisitaka vei ira eso nai vakatau-ni-were, ka sa qai lako ki na vanua tani.

² Ia ni sa yaco na kena gauna, sa tala ko koya e dua na tamata vei ira nai vakatau-ni-were me kauta mai vei ira nai vakatau-ni-were eso na vua ni loga-ni-vaini.

³ Ia era sa taura, ka yaviti koya, ka vakatala tani e na liga lala.

⁴ Sa qai tala vei ira ko koya e dua tale na tamata; a ra sa vakamavoataka na uluna, ka vakacacana vakalevu.

⁵ A sa tala ko koya e dua tale; a ra sa vakamatei koya, kei ira na lewe vuqa tani; eso era sa yavita, ka so era sa vakamatea.

⁶ A sa vo ga e dua bauga na luvena, na nona gone ni toko, a sa talai koya talega e muri vei ira, ka kaya, ‘Era na vakarokorokotaka na luvequ.’

⁷ Ia ko ira nai vakatau-ni-were ko ya era sa kaya vakai ira, ‘O koya oqo nai taukei e muri; tou mai vakamatea, ena qai noda ga na loga-ni-vaini.’

⁸ A ra sa taura, ka vakamatea, ka biuta ki taudaku ni loga-ni-vaini.

⁹ A cava beka ena qai kitaka na turaga ni loga-ni-vaini? Ena lako ga mai ka vakamatei ira nai vakatau-ni-were, ka solia na loga-ni-vaini vei ira na tani.

¹⁰ ‘Dou sa sega beka ni wilika na tiki ni Vola Tabu oqo: ‘A vatu era sa cata ko ira na matai ni vale, sa yaco me kenai vakadei e na tutu-ni-vale;

¹¹ oqo na cakacaka ni Turaga, a sa ka e veivakurabuitaki e matada’?”

¹² A ra sa via tauri koya, ka ra sa rerevaki ira na lewe vuqa; ni ra sa kila sa vosataki ira ko koya e na vosa vakatautauvata ko ya; a ra sa qai biuti koya, ka lako yani.

Na Vakatarotaro me Baleta na Saumi ni Vakacavacava

¹³ A ra sa tala vua eso na Farisi, kei nai tokani i Eroti, me ra coriti koya e na nona vosa.

¹⁴ Ia ni ra sa yaco mai, era sa kaya vua, “Vakavuvuli, keitou sa kila ko sa dina ga, ka sa sega ni rerevaka e dua; ni ko sa sega ni doka na nodra nanuma na tamata, ia ko sa vakatavuvulitaka vakaidina ga nai valavala sa vinaka vua na Kalou. Sa ka vakalawa li me da soli-ka ni matanitu vei Sisa, se segai?

¹⁵ Me da solia, se me da kakua ni solia?” Ia ni sa kila ko koya na nodra i lawaki, a sa kaya vei ira, “Dou sa dauveretaki au e na vuku ni cava? Kauta mai vei au e dua na pene, me'u raica.”

¹⁶ A ra sa kauta mai. A sa tarogi ira ko koya, “A mata i cei oqo, kei na yaca i cei sa volai tu?” A ra kaya vua, “A nei Sisa.”

¹⁷ Sa qai kaya vei ira ko Jisu, “Mo dou solia vei Sisa na ka sa nei Sisa, vei koya talega na Kalou na ka sa nona na Kalou.” A ra sa kurabuitaki koya.

Na Taro me Baleta na Tucake Tale mai na Mate

¹⁸ Era sa qai lako mai vei koya eso nai tokani i Setoki, ko ira era sa dau kaya ena sega ni tucake tale na mate. A ra sa taroga, ka kaya,

¹⁹ “Vakavuvuli, sa vola vei keda ko Mosese, ‘Kevaka sa dua na tamata sa mate na tuakana se tacina, ka biuta na watina, ka sega na luvena, me rau qai veiwatini kei na nona yada na tacina se tuakana, me vakaivakawa kina vua na tuakana se tacina.’

²⁰ Sa tiko na mataveitacini eratou lewe vitu; a sa vakawati ko koya sa qase, a sa mate, ka sega na luvena.

²¹ Erau sa qai veiwatini kaya nai karua, a sa mate ga, ka sega na luvena. Sa vaka talega kina nai katolu.

²² Ia eratou sa veiwatini kaya ko iratou na lewe vitu, ka sega na luvedratou. Sa qai mate talega e muri na yalewa.

²³ Ia ni sa ia na tucake tale mai na mate, ena wati cei vei iratou ko koya? Ni ratou sa vakawatitaki koya kece ko iratou na lewe vitu.”

²⁴ A sa vosa ko Jisu, ka kaya vei ira, “Sa sega li ni vu ni nomudou sese oqo, ni dou sa sega ni kila nai Vola Tabu, se na kaukauwa ni Kalou?

²⁵ Ni ra na tucake tale mai na mate, era na sega ni vakawati, se veimusumusukitaki me ra vakawati; era na vakataki ira na agilosi mai lomalagi.

²⁶ Ia ni ra na tucake tale na mate, dou sa sega li ni wilika e nai vola i Mosese, ni sa vosa na Kalou vei koya, mai na kau, ka kaya, ‘Oi au na Kalou i Eparaama, kei na Kalou i Aisake, kei na Kalou i Jekope?’

²⁷ Ia sa sega ni nodra Kalou na mate ko koya, a nodra Kalou ga era sa bula tiko. Dou sa qai vakacalai vakalevu kina.”

Nai Vakaro Bibi Duadua

²⁸ Ka sa dua na vunivola, ni sa rogoca na nodra veileti, a sa kunea ni sa vosa vakavuku vei ira ko koya, sa qai lako mai ka tarogi koya, “Ai vakaro cava sa kenai matai e nai vakaro kecega?”

²⁹ A sa kaya vua ko Jisu, “Sai matai ni vakaro kecega oqo, ‘Mo rogoca, na Isireli: ko Jiova na noda Kalou, ko Jiova sa dua bau;

³⁰ ia mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kece, kei na nomu kaukauwa kece.’

³¹ Na kenai karua oqo, ‘Mo lomana na kai nomu me vaka ko sa lomani iko.’ Sa sega e dua nai vakaro sa uasivi e nai vakaro ruarua oqo.”

³² A sa kaya vei koya na vunivola, “E vinaka, Vakavuvuli, ko sa kaya dina ni ‘sa dua bauga na Kalou; a sa sega tale e dua me rau le rua kaya;’

³³ ia ‘me da lomani koya e na lomada taucoko, kei na noda vakasama kece, kei na yaloda taucoko, kei na noda kaukauwa kece,’ ka ‘me da lomana na kai noda me vaka eda lomani keda,’—oqo sa ka bibi vakalevu sara ka lailai nai soro kama kecega kei nai soro kecega.”

³⁴ Ia ni sa raica ko Jisu ni sa vosa vakavuku ko koya, sa kaya vua, “Ko sa sega ni yawa mai na matanitu ni Kalou.” A sa sega e dua sa doudou e muri me vakatarogi koya.

Na Taro me Baleta na Mesaia

³⁵ A sa vosa ko Jisu ni sa vakatavuvuli tiko e na vale-ni-soro, ka kaya, “E rawa vakaevei ni ra kaya ko ira na vunivola ni sa luve i Tevita na Karisito?

³⁶ Ni sa kaya ko Tevita, ka sa vuna na Yalo Tabu, “ ‘Sa kaya na Turaga vua na noqu Turaga, “Mo tiko e na ligaqu i matau, me'u vakamalumalumutaki ira mada na nomu meca me ra sai tutu-ni-yavamu.” ’

³⁷ Sa vakatokai koya ko Tevita me Turaga; sa qai luvena vakaevei?” A ra sa lewe vuqa vei ira na tamata sa vinakata me ra rogoci koya.

Sa Veivakasalataki ko Jisu Baleti Ira na Vunivola

³⁸ A sa kaya vei ira e na nona i vakavuvuli, “Dou qarauni kemudou mai vei ira na vunivola, era sa vinakata me ra lako voli e nai sulu balabalavu, kei na veikidavaki e na rara ni veivoli,

³⁹ kei nai tikotiko ni qase e na veivalenilotu, kei nai tikotiko vakaturaga e na kana magiti;

⁴⁰ era sa kovea na nodra i yau na yada, a ra masu vakabalavu tiko me veivakaisini; ko ira oqo era na cudruvi vakalevu.”

Na Nona i Solisoli na Yada Dravudravua

⁴¹ A sa tiko ko Jisu e na yasana sa donuya na kato ni lavo, a sa raici ira na lewe levu ni ra sa biuta nai lavo ki na kato ni lavo. Ka lewe vuqa era sa vutuniyau era sa biuta vakalevu.

⁴² A sa lako mai e dua na yada dravudravua, a sa biuta kina e rua nai lavo lalai sara, sa rauta e dua na pene.

⁴³ A sa kacivi ira na nona tisaipeli ko koya, ka kaya vei ira, “Au sa kaya vakaidina vei kemudou, na yada dravudravua oqo sa biuta vakalevu ki na kato ni lavo, ko ira kecega na kena vo era sa biuta vakalailai ga.

⁴⁴ Ni ra sa biuta kina eso ko ira kecega mai na nodra ka e vuqa, ia ko koya oqo, sa dravudravua, ka sa biuta na nona ka kecega, io na nona ka kece e bula kina.”