Marika 11 - Ai Vola Tabu (Vakadewa Makawa Vakavoutaki 2021)

Na Curu Vakatui ki Jerusalemi

¹ Ia ni ra sa toro voleka ki Jerusalemi, ki Pecifaki kei Pecani, e na ulunivanua ni veiolive, sa tala ko koya e lewe rua na nona tisaipeli,

² a sa kaya vei rau, “Drau lako ki na koro lailai sa donui kemudrau. Ia ni drau sa curu kina, drau na kunea sara e dua na luve ni asa sa noka tu, sa sega ni vodoka e dua na tamata. Drau sereka, ka kauta mai.

³ Ia kevaka sa dua e kaya vei kemudrau, ‘Drau sa kitaka oqo e na vuku ni cava?’ drau kaya, ‘Sa yaga vua na Turaga, ka na qai vakatalai koya lesu tale mai ki ke.’ ”

⁴ A rau sa lako, ka kunea na luve ni asa, sa noka tu e na mata ni katuba e na tikina sa sota vata kina e rua na sala, ka rau sa sereka.

⁵ Ia ka so vei ira era sa tu kina, era sa kaya vei rau, “A cava drau sa sereka kina na luve ni asa?”

⁶ A rau sa kaya vei ira me vaka ka vakarota ko Jisu; a ra sa qai laivi rau me lako.

⁷ A rau sa kauta na luve ni asa vei Jisu, ka tevuka kina na nodrau i sulu, a sa vodoka ko koya.

⁸ A ra sa lewe vuqa era sa tevuka na nodra i sulu e na gaunisala, ka so tale era tamusuka eso na tabanikau, ka biuta e na gaunisala.

⁹ Ia ko ira sa liu, kei ira sa muri, era sa kaci, ka kaya, “Osana! Sa kalougata ko koya sa lako mai e na yaca ni Turaga!

¹⁰ Sa kalougata na matanitu nei Tevita na noda qase, ko koya sa yaco mai! Osana ki cake sara!”

¹¹ A sa curu ko koya ki Jerusalemi, ki na vale-ni-soro talega. Ia ni sa vakaraica voli na ka kecega, a sa qai yakavi mai, sa lako yani ko koya ki Pecani kei iratou na lewe tinikarua.

Sa Cudruva na Vuni Lolo ko Jisu

¹² Ia e na siga ka tarava, ni ratou sa lako mai Pecani, sa viakana ko koya.

¹³ Ia ni sa raica vakayawa e dua na vuni lolo sa vakadrauna, sa lako, de kunea kina e dua na ka. Ia ni sa yaco kina, sa sega ni kunea e dua na ka, a drauna walega, ni sa sega ni yaco na vula i lolo.

¹⁴ A sa vosa ko Jisu, ka kaya kina, “Me kakua na vuamu me laukana mai muri ka sega ni mudu.” A ratou sa rogoca na nona tisaipeli.

Sa Lako ki na Valenisoro ko Jisu

¹⁵ A ra sa yaco ki Jerusalemi. A sa curu ki na vale-ni-soro ko Jisu, ka vakatekivu me vakasevi ira tani kina era sa veivoli e na vale-ni-soro; sa vukica talega na nodra tepeli era sa veisau i lavo, kei na nodra veitikotiko era volitaki ruve.

¹⁶ A sa sega ni laiva e dua me colata e dua na ka e loma ni vale-ni-soro.

¹⁷ A sa vakavulici ira, ka kaya, “Sa sega li ni volai, ‘A noqu vale ena vakatokai me nodra vale ni masu na veimatanitu kecega?’ Ia dou sa cakava me nodra qara na daubutako.”

¹⁸ A ra sa rogoca ko ira na vunivola kei ira na bete levu, a ra sa segata me ra vakamatei koya, ni ra sa rerevaka, ni ra sa kurabui ko ira kecega na lewe vuqa e na nona i vakavuvuli.

¹⁹ Ia e na veiyakavi, sa lako tani e na koro ko koya.

Nai Vakavuvuli mai na Vuni Lolo

²⁰ Ia e na mataka, ni ra sa lako voli, era sa raica sa malai sara mai na wakana na vuni lolo.

²¹ Ia ni sa nanuma ko Pita, sa kaya vei koya, “Vakavuvuli, raica, na lolo ko sa lewa me ca sa malai sara.”

²² A sa kaya vei ira ko Jisu, “Dou vakabauta na Kalou.

²³ Ni'u sa kaya vakaidina vei kemudou, Kevaka sa dua e kaya ki na ulunivanua oqo, ‘Mo cavu tani, ka biu ki na wasaliwa,’ ia ka sega ni vakatitiqa na yalona, a sa vakadinata ga ni na yaco na ka sa kaya; ena rawata na ka kecega sa kaya ko koya.

²⁴ O koya oqo ka'u sa kaya kina vei kemudou, a ka kecega dou sa kerea, ni dou sa masu, dou vakadinata ni dou sa rawata, ena qai nomudou ga.

²⁵ “Ia ni dou sa tucake ka masu, dou veivosoti, kevaka e tiko na nomudou cala vua e dua; me na vosota talega vakakina na nomudou i valavala ca na Tamamudou sa tiko mai lomalagi.

²⁶ Ia kevaka dou sa sega ni veivosoti, ena sega talega ni vosota na nomudou i valavala ca na Tamamudou sa tiko mai lomalagi.”

Sa Tarogi Jisu Eso Se Ko Cei sa Lesi Koya

²⁷ A ra sa qai lako tale mai ki Jerusalemi. Ia ni sa lako voli ko koya e na vale-ni-soro, sa lako mai vua ko ira na bete levu, kei ira na vunivola, kei ira na qase,

²⁸ a ra sa kaya vua, “Ko sa lesi mai vei mo cakava na veika oqo? Ia ko cei sa solia vei iko nai lesilesi oqo mo cakava kina na veika oqo?”

²⁹ A sa vosa ko Jisu, ka kaya vei ira, “Au na tarogi kemudou talega e na dua na ka, ia dou tukuna vei au; au na qai tukuna talega vei kemudou se ka'u sa lesi mai vei me'u cakava na veika oqo.

³⁰ A papitaiso i Joni, sa ka mai lomalagi, se ka mai na tamata? Tukuna mai vei au.”

³¹ A ra sa veivosakitaka vakai ira, ka kaya, “Kevaka eda na kaya, ‘Sa vu mai lomalagi’, ena qai kaya ko koya, ‘Ia dou a sega ni vakadinati koya e na vuku ni cava?’

³² Ia me da kaya li, ‘Sa vu mai na tamata?’” — era sa rerevaki ira na tamata, ni ra sa vakadinata kecega ni sa parofita dina ko Joni.

³³ A ra sa qai sauma ka kaya vei Jisu, “Keitou sa sega ni kila.” Sa qai vosa ko Jisu, ka kaya vei ira, “Au na sega talega ni tukuna vei kemudou se ka'u sa lesi mai vei me'u cakava na veika oqo.”