Maika 6 - Ai Vola Tabu (Vakadewa Makawa Vakavoutaki 2021)

Sa Veivunauci ka Veibolei ko Jiova vei Ira na Isireli

¹ Dou rogoca mada na ka sa kaya ko Jiova, Tucake mada, mo ia na veilewai e matadra na veiulunivanua, me ra rogoca talega na domomu na veiulu-ni-koro.

² Dou rogoca, na veiulunivanua, na ka e veiletitaka ko Jiova, oi kemudou talega, na yavu kaukauwa kei vuravura; ni sa dua na ka e veiletitaka ko Jiova kei ira na nona tamata, io, ena ia na veilewai ko koya kei ira na Isireli.

³ A cava ka'u sa cakava vei iko na noqu tamata? Ia a cava ka'u sa vakaocataki iko kina? Sauma mada mai!

⁴ Ni'u a kauti iko cake mai na vanua ko Ijipita, ka'u a vakabulai iko mai na vale ni bobula; ka talai iratou ko Mosese, kei Eroni, kei Miriama, me liutaki iko.

⁵ Kemudou na noqu tamata, dou vakananuma mada na ka sa kerea ko Pelaki na tui Moapi, kei na ka sa kaya vua ko Pelami na luve i Piori; kei na ka mai Sitimi ka yaco sara ki Kilikali, mo dou kila kina nai valavala dodonu i Jiova.

Na Veika e Vinakata na Kalou

⁶ Ai soro cava me'u toro rawa kina vei Jiova? Ka cuva kina e na matai koya na Kalou cecere? Me'u torovi koya li e nai soro kama, e na luve ni bulumakau eso e yabaki yadua?

⁷ Ena vinakata beka ko Jiova me vakaudolu na sipi tagane, se me vakaoba na veiuciwai ni waiwai? Me'u vakacabora beka na noqu ulumatua mei soro ni noqu talaidredre, na vua ni yagoqu mei bulubulu ni valavala ca ni yaloqu?

⁸ Sa vakatakila oti vei iko, na tamata, na ka e vinaka; ia ka cava tale sa taroga mai vei iko ko Jiova, ia mo caka dodonu ga, ka mo vinakata na yalololoma, ka mo yalomalumalumu talega ni drau lako vata kaya na nomu Kalou?

Na Veivakaisini kei na Veivakasaurarataki me Cudruvi

⁹ Sa kaci ki na koro ko Jiova (ia ko koya sa vuku ena kila na yacamuni): Dou nanuma na kuita, kei koya sa lesia!

¹⁰ Sa tiko li e nona vale na tamata ca nai yau ni ca, kei nai vakarau lasu ko ya ka sa vakasisila?

¹¹ Me'u sa tamata dodonu li ni sa tiko vei au nai vakarau ni bibi sa sega ni dodonu, kei na taga vatu lasu?

¹² O ira na tamata vutuniyau era sa vutu ni valavala kaukauwa; ko ira talega na lewena era sa vosa lasu, io, na yamedra talega e gusudra sa dauveivakaisini.

¹³ Io koi au, ka'u na yaviti iko vakararawa sara, ka vakalalataki iko e na vuku ni nomu i valavala ca.

¹⁴ O iko, ko na kana, ka sega ni mamau, e na tarai iko tikoga na waloloi ni viakana; ko na biuta vakatikitiki, ia ka sega ni maroroya, ia na ka ko sa maroroya ka'u na solia ki nai seleiwau.

¹⁵ Ko na kaburaka, ia ka sega ni tamusuka; ko na butuka na olive, ia ko na sega ni lumuti iko e na kena waiwai; ko na butuka na vua-ni-vaini, ia ko na sega ni gunuva na kena waini.

¹⁶ Ni sa dauvakabau na ka sa lesia ko Omirai, kei nai valavala kecega ni vale i Eapi, dou sa muria talega na nodra i vakavuvuli; me'u cakava kina vei kemudou mo dou lala sara, ka mo dou vakasiusiutaki; ia na kedrai rogorogo ca na noqu tamata ena baleti kemudou.