Kalatia 2 - Ai Vola Tabu (Vakadewa Makawa Vakavoutaki 2021)

Ko Paula kei Iratou nai Apositolo Tale Eso

¹ Sa oti e tinikava na yabaki, au sa qai lako cake tale kei Panapasa ki Jerusalemi, ka'u sa kauti Taito talega.

² Ia sai vakavuvuli ga e na raivotu ka'u a lako cake kina, ka'u sa tukuna vei ira nai tukutuku-vinaka ka'u sa vunautaka tiko vei ira na veimatanitu tani, ia ka vuni ga vei ira era sa rogo, de sega ni yaga na noqu cici oqo, se na noqu cici eliu.

³ Ia sa sega ni vakasaurarataki me cilivi ko Taito, keirau sa tiko kaya, a kai Kirisi.

⁴ E segai e na vukudra na mataveiwekani vakailasu era sa kau vuni mai, o ira sa curu lo mai me ra vakaraica na noda lalaga eda sa rawata ni da sa tu vata kei Karisito Jisu, me ra vakabobulataki keda kina—

⁵ ia keitou a sega ni talairawarawa vei ira me vakamalumalumutaki keitou, e segai sara e na dua bau na tiki-ni-siga, me tudei kina vei kemudou na dina ni tukutuku-vinaka.

⁶ Ia ko iratou sa daurogo ni ratou sa ia na veiliutaki (se cava na kedratou i tuvaki sa sega na kena duidui vei au; ni sa sega ni vakaduiduitaka e dua na tamata na Kalou) — ko iratou nai liuliu oqori eratou sa sega ni vakaikuritaka vei au e dua na ka.

⁷ Sa sega sara ni vakakina, ia ni ratou sa raica ni'u sa lesi me'u vunautaka nai tukutuku-vinaka vei ira ka sega ni cili, me vaka ko Pita vei ira sa cili

⁸ (ni ko koya sa cakacaka e na loma i Pita mei apositolo vei ira sa cili sa cakacaka vakakina e na lomaqu e na vukudra na veimatanitu tani),

⁹ ia ko Jemesa, kei Kifa, kei Joni, ko iratou sa okati me ratou kena duru, ni ratou sa kila na loloma ka soli vei au, eratou sa vakabauti keirau sara kei Panapasa, ka dodoka vei keirau na liga-i-matau ni veitokani, ni ratou sa duavata me keirau lako vei ira na kai matanitu tani, ka me ratou lako vei ira sa cili.

¹⁰ E dua ga na ka eratou sa kerea, me keirau nanumi ira na dravudravua, a ka talega oqo ka'u sa via cakava.

Sa Vunauci Pita ko Paula Mai Anitioki

¹¹ Ia ni sa lako mai ki Anitioki ko Kifa, au sa vorati koya e na matanavotu, ni sa dodonu me vunauci.

¹² Ni sa kana vata eliu ko koya kei ira sa matanitu tani, ni ra sa sega ni tadu mai eso mai vei Jemesa; ia ni ra sa tadu mai, sa sega ni via tiko vata kei ira ka sa lako tani ko koya, ni sa rerevaki ira na cili.

¹³ O ira talega na Jiu sa vo era sa ia vata kaya na veivakaisini ko ya; a sa kau vakatani talega kina ko Panapasa e na nodra veivakaisini.

¹⁴ Ia ni ka'u sa raica era sa sega ni valavala dodonu ka me vaka na dina ni tukutuku-vinaka, au a kaya vei Kifa e na matadra kecega, “Kevaka ko sai valavala tiko me vakataki ira sa matanitu tani ni ko sa Jiu, ka sega ni vakataki ira na Jiu, e na cava ko sa vakasaurarataki ira kina era sa matanitu tani me rai valavala me vakataki ira na Jiu?”

Sa Vakabulai na Jiu kei na Kai Matanitu Tani ena Vakabauta

¹⁵ Koi keda, eda sa Jiu ni da sucu, ka sega ni tamata ca mai vei ira na veimatanitu tani,

¹⁶ ni da sa kila sa sega ni vakadonui na tamata e na vuku ni cakacaka ni vunau, e na vuku ga ni vakabauti Jisu Karisito. Eda sa vakabauti Karisito Jisu koi keda, me da vakadonui kina e na vuku ni da vakabauti Karisito, ka sega ga e na cakacaka ni vunau, ni sa sega na tamata ena vakadonui e na vuku ni cakacaka ni vunau.

¹⁷ Ia kevaka eda sa kune koi keda talega me da tamata ca, ni da sa vakasaqara tiko me da vakadonui e na vuku i Karisito, sa qai dauveiqaravi beka ni valavala ca na Karisito? E segai sara!

¹⁸ Ia kevaka ka'u sa tara cake tale na ka ka'u a basuka sobu, au sa tukuni au kina ni'u sa tamata caka ca.

¹⁹ Ni sai koya na vunau ka'u sa mate kina ki na vunau, me'u bula vua na Kalou.

²⁰ Keirau sa vakoti vata kei Karisito ki na kauveilatai. Ia sa sega ga ni koi au sa bula tiko, na Karisito ga sa bula e lomaqu. Ia na noqu bula vakayago oqo, au sa bula tiko kina ni'u sa vakabauta na Luve ni Kalou, o koya sa lomani au, ka soli koya e na vukuqu.

²¹ Au sa qai sega ni vakatawayagataka na loloma ni Kalou; ni sa qai sega ni yaga na mate i Karisito, kevaka sa rawa na veivakadonui e na vunau.