Jope 9 - Ai Vola Tabu (Vakadewa Makawa Vakavoutaki 2021)

Vakadinata ko Jope ni sa Dodonu na Kalou

¹ Sa qai vosa ko Jope, ka kaya:

² “Au sa kila vakaidina ni sa vaka oqo: Ia sa dodonu rawa vakaevei na tamata e na mata ni Kalou?

³ Kevaka sa via veileti kaya, ena sega ni sauma rawa vua e dua na ka kevaka e tarogi vakaudolu.

⁴ Sa vuku na lomana, ka sa ka vakaidina na nona kaukauwa —ko cei li sa veivorati kaya, ka sa qaqa kina?—

⁵ ko koya sa kauta tani na veiulunivanua, ka ra sa sega ni kila, ni sa vukica e na nona cudru;

⁶ ko koya sa yavalati vuravura tani mai na kena i tikotiko, ka sa yavala na kena duru;

⁷ ko koya sa vakarota na mata-ni-siga, ka sa sega ni cadra; a sa sogolatia na kalokalo;

⁸ ko koya sa birika vakai koya ga na lomalagi, ka sa butuka tu na dela ni ua ni wasawasa;

⁹ ko koya sa buli Akituro kei Oraioni, kei Peliatisi kei na veiyasana vuni e na mata ni ceva;

¹⁰ ko koya sa dau cakava na ka levu sa sega ni kilai rawa, kei na ka e veivakurabuitaki sa sega ni wiliki rawa.

¹¹ Raica, sa lako volekati au, ia ka'u sa sega ga ni raici koya; sa lako tu yani, ia ka'u sa sega ga ni kunea.

¹² Raica, sa kauta tani ko koya; ia ko cei me tarova rawa? Ko cei me kaya vua, ‘A cava ko ni sa kitaka?’

¹³ “Sa na sega ni vakasuka na nona cudru na Kalou, sa ra na cuva ga vua ko ira na dauveivuke nei Reavi.

¹⁴ Sa dredre vakalevu vei au me'u vosa vua, se digitaka na vosa me'u kaya vua?

¹⁵ Ia kevaka ka'u sa yalododonu, ka'u na sega ga ni vosa tale vua, ka'u na vakamamasu ga vua sa lewai au.

¹⁶ Kevaka ka'u a kaci, ka rogo mai vei au ko koya, ka'u na sega ga ni vakadinata ni sa rogoca na domoqu.

¹⁷ Ni sa vorolaki au ko koya e na cava, ka sa vakamavoataki au vakalevu wale.

¹⁸ Sa sega ni laivi au me'u cegu rawa, ia sa vakaluvuci au e na ka gaga.

¹⁹ Kevaka ka'u cavuta na kaukauwa, raica, sa kaukauwa ko koya; se na lewa, ia ko cei me na lokuca mai na noqu siga?

²⁰ Kevaka ka'u sa vakadonui au, ena vakacalai au na gusuqu; kevaka ka'u sa kaya ka'u sa sega ni cala, ena vakatakilai au ni'u sa yalovakatani.

²¹ Kevaka ka'u sa sega ni cala, ka'u na sega ni kila na yaloqu; ka'u na weletaka na noqu bula.

²² Sa tautauvata ga; ka'u sa kaya kina, ‘Sa vakarusa ko koya na tamata yalododonu kei na tamata i valavala ca.’

²³ Kevaka sa yaco vakidacala na veivakamatei ni leqa, ena dredrevaka ko koya na ka era sa vakatovolei kina na tawa cala.

²⁴ Sa soli ko vuravura ki na ligadra nai valavala ca; sa tabonaka ko koya na matadra na mataveilewai— kevaka sa sega ni ko koya, ia me qai ko cei beka li?

²⁵ “Sa qai totolo na noqu siga ka bera nai talaki e daucici; era sa dro tani; era sega ni kunea na ka vinaka.

²⁶ Sa lako tani yani me vaka na waqa totolo, me vaka na ikeli sa vukaca sobu mai na kena.

²⁷ Kevaka ka'u sa kaya, ‘Au na guilecava na noqu kudru; ka'u na biuta tani na noqu mataveveku ka matamamarau mai,’

²⁸ ka'u sa qai rere e na vuku ni noqu rarawa kecega, ni'u sa kila ni ko na sega ni vakadonui au.

²⁹ Au na beitaki ga; ka cava na vuna sa tawa yaga kina na noqu oca e na cakacaka?

³⁰ Ni kevaka ka'u sa vuluvulu e na wai ni uca-vulavula ka vakasavasavataka sara na ligaqu,

³¹ ia ko na vakalomoci au ga e nai keli lolobo, ka na vakasisilataki au na noqu i sulu.

³² Ni sa sega ni tamata ko koya, me vakataki au, me'u vosa rawa vua, ka me keirau mai veilewai vata kaya.

³³ Sa sega talega na dau-ni-lewa e na keirau maliwa, o koya me bau tabaki keirau ruarua e na ligana.

³⁴ Me kauta tani mada vei au ko koya na nona kuita, ka me kakua ni vakadomobulataki au na nona veivakarerei.

³⁵ Ia ka'u na qai vosa ka sega ni rerevaki koya, ni'u sa kila ni sa sega ni'u vaka na ka sa nanumi me baleti au.