Jope 39 - Ai Vola Tabu (Vakadewa Makawa Vakavoutaki 2021)

¹ “Ko sa kila beka na gauna sa dauvakasucu kina na me ni veiulunivanua? Ko sa bau dauvakadikeva li na vakasucu ni dia ni veikau?

² Ko rawa beka ni wilika na levu ni vula era yacova, ka ko kila beka na gauna era vakasucu kina,

³ e na gauna era koto sobu kina, ka vakarautaki ira na luvedra, ka ra sa vakasucuma na luvedra?

⁴ Sa kaukauwa vinaka na luvedra, era sa tubu cake e na vanua galala; era sa lako yani, ka sega ni lesu tale vei ira.

⁵ “Ko cei sa vakatala na asa kila me lako yani e na galala? Ko cei sa sereka nai vesu ni asa yava totolo,

⁶ o koya ka'u sa cakava vua na vanua lala me nona vale, kei na vanua talasiga me nona i tikotiko?

⁷ Sa beci ira na lewe vuqa e na koro; ka sa sega ni rogoca na nona kaila na draiva.

⁸ Sa daulakova na veiulunivanua me kana voli kina, ka sa dauvakasaqara na co drokadroka kecega.

⁹ “Ena via qaravi iko beka na bulumakau yadru kila? Ena via tiko bogi dua beka e na nomu lomanibai?

¹⁰ Ko sa vauca rawa beka e na kena dali ki nai siviyara, se na muri iko ko koya me na qaru qele e na buca?

¹¹ Ko na vakararavi li vua ni sa levu na nona kaukauwa, ka ko na biuta beka vua na nomu i tavi cakacaka?

¹² Ko vakabauti koya li me na kauta lesu mai na nomu sila ka yauta mai ki na nomu lololo?

¹³ “Na taba ni ositeriji sa dautevuki ka vakacakurobaroba, ia na tabana kei na lawena sa sega ni vuka rawa vaka na belo.

¹⁴ Ni sa vakotora tu ga na kena yaloka ki na qele ka laiva me vakatakatataki e na kuvu-ni-soso,

¹⁵ ka sa guilecava ni na rawa ni butuka na tamata se na buturaka na manumanu kila.

¹⁶ Sa loma kaukauwa vei ira na luvena, me vaka era sega ni nona; sa oca wale ko koya, ka sa sega ni rere,

¹⁷ baleta ni sa vakayacora vua na Kalou me guilecava na vuku, ka sa sega ni vakayalomatuataki koya.

¹⁸ Na gauna sa tevuka cake kina na vuti ni tabana ko koya me dro, a sa dredrevaka ga na ose kei koya sa vodoka.

¹⁹ “Ko sa solia beka vua na ose na kaukauwa? Ko sa vakatobetaka na domona e na tobe balavu?

²⁰ Ko sa qisi koya beka me rika me vaka na vodre? Na suru ni ucuna sa ka rerevaki.

²¹ Sa qeva na buca e na yavana, ka reki e na nona kaukauwa; ka sa lako yani me la'ki tavaki ira nai yaragi.

²² Sa dredrevaka na rere, ka sa sega ni taqaya; sa sega talega ni dro tani mai nai seleiwau.

²³ Sa taqa ki vua na taga ni gasau, kei na moto makamakalivata kei nai sasabai.

²⁴ Sa tiloma na qele e na nona lomakatakata kei na cudru; ka sa sega ni tu vakadua ni sa rogo mai na uvu ni davui.

²⁵ Ni sa voqa mai na domo ni davui, sa kaya ko koya ‘Aa!’ A sa boica nai valu ni sa yawa tu, kei na nodra kurukuru na kavetani, kei na kaikaila.

²⁶ “Sa vuka cake beka na manulevu e na nomu vuku, ka vakatetaba me vuka ki na mata ni ceva?

²⁷ Sa vuka cake beka na ikeli ni ko sa vakarota, ka cakava mai cake na nona sova?

²⁸ Sa bula voli mai na uluvatu ka sa cakava na nona sova e na bati ni uluvatu ka vanua dredre.

²⁹ Mai na vanua ko ya sa irova mai kina na kena; sa raica rawa na matana mai na dua na vanua yawa sara.

³⁰ Ko ira na luvena era sa daugunu dra; ia e na vanua sa no kina na mate, sa tiko kina ko koya.”