Jope 38 - Ai Vola Tabu (Vakadewa Makawa Vakavoutaki 2021)

Sa Vosa vei Jope na Kalou

¹ Sa qai vosa mai vei Jope ko Jiova mai na covulaca, ka kaya:

² “Ko cei oqo sa vakabutobutotaka nai vakasala e na vosa sa sega ni vuku?

³ Mo vauca mada vakatagane na tolomu, ni'u na vakataroga vei iko, ia mo vakatakila mai vei au.

⁴ “Ko a tiko li mai vei e na gauna ka'u a tauyavutaki vuravura kina? Mo tukuna mai vei au, kevaka ko sa kila.

⁵ Ko cei sa lewa na kenai vakarau—ko sa qai kila vakaidina! Se ko cei ka dreta kina na dali i vakarau?

⁶ Sa tauyavutaki li e na dela ni cava, se ko cei ka vakasobura na kena duru-vatu e tutuna,

⁷ ni ra lagasere vata na veikalokalo ni mataka lailai ka ra kaila e na reki ko ira kecega na luve ni Kalou?

⁸ “Se ko cei sa sogolatia na wasawasa e nai sogo ni sa curu vakaukauwa tani mai na kete?—

⁹ ni'u a cakava na o me kenai sulu kei na butobuto loaloa me kenai vau,

¹⁰ ka vakarautaka na kenai yalayala ka cakava na kenai vakadei kei na kenai sogo,

¹¹ ka kaya, ‘Ko sa na yaco ga e ke, ka kakua ni sivia, ka na yala ga eke na nomu biua viavialevu’?

¹² “Ko sa vakarota beka na mataka e nai tekivu ni nomu gauna, ka vakatakila ki na mataka na vanua me kida cake kina,

¹³ me rawa ni taura kina nai yalayala kei vuravura, ka kureitaki tani kina ko ira nai valavala ca?

¹⁴ Sa vukici me vaka na tete e na ruku ni ka sa tabaki kina, kei na veika e baleta sa vaka nai sulu.

¹⁵ Sa bureitaki vei ira nai valavala ca na kedra rarama, ka sa ramusu na liga sa viavialevu.

¹⁶ “Ko sa curuma beka nai vurevure ni waitui, se ko sa lako voli e na dreke ni wasawasa?

¹⁷ Sa dola oti beka vei iko na katuba kei mate, se ko sa kunea na matamata ni yaloyalo ni mate?

¹⁸ Ko sa bau kila beka na kena levu na vuravura? Tukuna mai kevaka ko sa kila na veika kecega oqo.

¹⁹ “Evei na gaunisala ki nai tikotiko ni rarama, ka evei na kena vanua na butobuto,

²⁰ mo kauta kina ki na kena vanua ka mo kila talega kina na sala ki na kena vale?

²¹ Ko sa kila ga, ni ko sa sucu oti tu kina, ka ni sa vuqa nai wiliwili ni nomu siga!

²² “Ko sa curuma beka na lololo ni uca-vulavula, se ko sa raica na lololo ni uca-cevata,

²³ na kena ka'u sa maroroya me baleta na gauna ni leqa, e na vuku ni siga ni vala kei na veivaluvaluti?

²⁴ A sala cava sa mua ki na vanua e wasewasei kina na rarama, se vanua e veibiuyaki kina na cagi ni tokalau e delai vuravura?

²⁵ “Ko cei sa cakava na sala-ni-wai me baleta na uca levu kei na gaunisala me muria na kurukuru,

²⁶ me vakatauca na uca e na vanua sa sega ni bula kina e dua, e na vanua dravuisiga sa sega kina na tamata,

²⁷ ka me mamau kina na vanua sa lala ka sega ni teivaki, ka me vakarautaki kina na qele me vakatubura na co?

²⁸ “Sa vakatamani beka na uca, se ko cei beka sa vakatubura na mata ni tegu?

²⁹ A kete i cei li sa lako mai kina na wai cevata, ka ko cei sa vakasucuma na tegu cevata ni lomalagi?

³⁰ Sa cokocokovata na wai me vaka na vatu, ka sa cevata na dela ni wai titobu.

³¹ “Ko na rawa li ni vauca vata na veikalokalo ko Peliatisi, se sereka nai vau kei Oraioni?

³² Ko na rawa li ni vakauti Masaroci e na kena gauna, se ko rawa li ni tubera na Bea kei ira na luvena?

³³ Ko sa kila beka nai valavala ni kena lewai na lomalagi? Ko rawa li ni vakataudeitaka na nodra lewa e delai vuravura?

³⁴ “Ko rawa li ni tabalaka cake na domomu ki na o, me luvuci iko kina na wai levu?

³⁵ Ko rawa li ni vakatala yani na livaliva, me ra lako yani kina ka kaya vei iko, ‘Koi keitou ga oqo’?

³⁶ Ko cei li sa vakatikora na vuku ki na lomada, se ko cei sa vakayalomatuataka na tamata?

³⁷ Ko cei li sa tu vua na vuku me wilika rawa kina na veio ni lomalagi? Se ko cei li e na rawa ni sova na bola-ni-wai kei lomalagi,

³⁸ ni sa kaukauwa mai na kuvu-ni-soso, ka veikabiti sara na qele qa?

³⁹ “Ko rawa li ni vakasasataka na kena kakana na laione, se vakamamautaki ira na luve ni laione ni ra sa viakana,

⁴⁰ ni ra sa koto sobu e na nodra qara se wawa lo tiko e na nodra vanua ni tobo kakana?

⁴¹ Ko cei li sa solia na kena na reveni, ni sa tagi na luvena vua na Kalou, ka ra vuka vaka ka vaka ni sa sega na kedra?