Jope 37 - Ai Vola Tabu (Vakadewa Makawa Vakavoutaki 2021)

Sa Tukuna ko Ilaiu na Lagilagi ni Kalou

¹ “Na ka talega oqo sa sautaninini kina na utoqu, ka sa lade tani mai na kena i tikotiko.

² Rogoca, rogoca na vakuru ni domona kei na rorogo sa lako mai na gusuna.

³ Sa vakatala yani ko koya ki na ruku i lomalagi taucoko, kei na nona livaliva ki nai yalayala kei vuravura.

⁴ Sa qai vadugu mai e muri na domona; sa kurukuru ko koya e na domona vakaturaga, ka sa sega ni tarova na livaliva ni sa rorogo tu na domona.

⁵ Sa kurukuru vakurabui na Kalou e na voqa ni domona; sa cakava ko koya na veika lelevu eda sa sega ni kila rawa.

⁶ Ni sa kaya ki na uca-vulavula, ‘Mo tau ki vuravura’; kei na uca mirimiri, na uca levu ni nona kaukauwa,

⁷ sa yaco me i vakatakilakila e na ligadra na tamata kecega, me ra kila kina na tamata kecega sa bulia ko koya.

⁸ Era sa qai la'ki curu ki na nodra qara na manumanu, ka tiko ga e na nodra tikina.

⁹ Sa lako mai na covulaca mai na ceva, kei na liliwa mai na vualiku,

¹⁰ Sa cevata na tegu e nai cegu ni Kalou, ka sa cevata sara na wai levu.

¹¹ Ka sa vakatawa na o vavaku e na kena uca; sa vakaseavutaka na o lumilumisa.

¹² A sa veivukiyaki voli e na nona vosa, me ra kitaka kina na ka kecega sa vakarota ko koya, e na veivanua e vuravura sa tawa.

¹³ Sa yaco oqo me ka ni veivakadodonutaki se me ka ni nona vanua, se me ka ni loloma, ka sa vakavuna ko koya.

¹⁴ “Mo vakatudaliga, Jope, ki na ka oqo; mo tu vakadua, ka vakananuma mada na cakacaka veivakurabuitaki ni Kalou.

¹⁵ Ko sa kila beka na sala e daulesia kina na ka oqori na Kalou, ka vakavuna na livaliva ni nona o me tibi mai?

¹⁶ Ko sa kila beka se sa daulili vakavinaka vakaevei na o, na nona cakacaka veivakurabuitaki ko koya sa uasivi duaduaga na nona vuku,

¹⁷ ko iko ka sa katakata vinaka na nomu i sulu ni sa tiko vakadua ko vuravura e na vuku ni cagi mai na ceva?

¹⁸ Sa rawa li vei iko, me vakataki koya, mo tevuka na lomalagi, ka kaukauwa me vaka nai iloilo vakawaicalataki?

¹⁹ Mo vakatakila vei keitou na vosa me keitou kaya vua; keitou sa sega ni tukuna vakadodonu rawa e dua na ka e na vuku ni butobuto.

²⁰ Me na tukuni beka vua ni'u via vosa koi au? Sa bau dua li na tamata e vinakata me tilomi bulabula?

²¹ “Ia oqo, sa sega ni dua na tamata me raica rawa na rarama ni sa serau mai lomalagi, ni sa liwa yani na cagi ka vakasavasavataka.

²² Sa lako mai na vualiku na mata ni rarama koula; sa vakavolivolita na Kalou na lagilagi vakatui sa cecere.

²³ O Koya sa Kaukauwa—eda sa sega ni kunei koya rawa; sa uasivi ko koya e na kaukauwa kei na caka dodonu, kei na vutu ni valavala dodonu ena sega ni vakayacora kina na veivakasaurarataki.

²⁴ O koya oqo me ra rerevaki koya kina na tamata; ni sa sega ni okata ko koya na tamata sa dauviavia vuku.”