Jope 36 - Ai Vola Tabu (Vakadewa Makawa Vakavoutaki 2021)

Sa Vakacerecereya ko Ilaiu na Vinaka ni Kalou

¹ A sa tomana na nona vosa ko Ilaiu, ka kaya:

² “Mo vosoti au mada vakalailai, ka'u na vakatakila vei iko, ni sa vo tiko me'u tukuna e dua na ka e na vukuna na Kalou.

³ Au na kauta vakayawa mai na noqu vuku, ka'u na okata ni sa yalododonu na noqu Dauveibuli.

⁴ Ni sa sega vakaidina ni lasu na noqu vosa; o koya sa tiko vata kei iko, sa vinaka duaduaga na nona vuku.

⁵ “Raica, sa kaukauwa na Kalou ka sa sega ni beca e dua; sa ka levu sara na nona kaukauwa ni yalomatua.

⁶ Sa sega ni maroroi ira me ra bula tiko nai valavala ca, ka sa ia na ka dodonu vei ira na dravudravua.

⁷ Sa sega ni vagolea tani na matana mai vei ira na yalododonu, ia kivei ira na tui e nai tikotiko vakaturaga sa vakataudeitaki ira tiko ka tawa mudu, ka ra sa vakalevulevui.

⁸ Ia ke sa vauci e na sinucodo ka vesuki e nai vau ni rarawa,

⁹ e na qai vakatakila vei ira na nodra cakacaka kei na nodra i valavala ca, ni ra sai valavala viavialevu.

¹⁰ Sa dolava na daligadra me ra vakatavulici ka sa vakarota vei ira me ra saumaki mai na ca.

¹¹ Kevaka era vakarorogo ka qaravi koya, era na vakaotia na nodra siga ni ra tiko vinaka, kei na nodra yabaki ni ra marau tiko.

¹² Ia kevaka era sa sega ni vakarorogo, era na rusa e nai seleiwau, ka mate e na leca-i-ka.

¹³ “Ko ira sa sega ni kila na Kalou era sa binia tiko na cudru; era sa sega ni tagi vua ni sa vauci ira.

¹⁴ Era mate dole ni ra se tabagone, ka tini koso na nodra bula e na madua.

¹⁵ Sa vakabula na dravudravua ko koya e na nona rarawa, ka sa dolava na daligadra ni ra vakasaurarataki.

¹⁶ Ka sa via kauti iko talega mai na vanua ni rarawa ki na vanua rabailevu sa sega kina na osooso, ka sa uro walega na ka sa tuvai tu e na nomu tepeli.

¹⁷ “Ia ko sa sinai sara e na nodra lewai nai valavala ca; sa vesuki iko ga na veilewai kei na lewa dodonu.

¹⁸ Qarauna me kakua ni temaki iko na cudru mo la'ki veivakalialiai kina, ka kakua ni vakatara na kena levu ni i lavo me vagolei iko tani.

¹⁹ Ena rogo beka na nomu tagi ni kere veivuke baleta na leqa, se sasaga e na nomu kaukauwa kece sara?

²⁰ Mo kakua ni daugadreva na bogi, e na gauna era dauyali kina na tamata mai na nodra i tikotiko.

²¹ Mo qarauni iko! Mo kakua ni goleva na ka sa sega ni dodonu; ni ko sa digitaka oqo ka cata na rarawa.

²² Raica, sa laveti na Kalou e na nona kaukauwa; ia ko cei nai vakatavuvuli sa vakataki koya?

²³ Ko cei sa lesia na nona i lakolako, se ko cei me kaya, ‘Ko sa caka cala’?

²⁴ “Mo nanuma mo vakacaucautaka na nona cakacaka, na veika era sa dauseretaka na tamata.

²⁵ Era sa vakaraica oqo na kawa tamata kecega; era sa dikeva vakayawa mai na tamata.

²⁶ Raica, sa cecere na Kalou, ia eda sa sega ga ni kilai koya; sa sega ni kilai rawa nai wiliwili ni nona yabaki.

²⁷ Ni sa vakuvuya cake na wai ko koya; sa tau mai kina na uca me vaka na kena bewabewa,

²⁸ sa lutu sobu mai na o ka miriki ira vakalevu na lewe vuqa.

²⁹ Sa dua beka e kila rawa na kena dautete na o, se na vadugu ni kurukuru e nona vale?

³⁰ Raica, sa tevuka ko koya na nona rarama e delana, ka sa ubia na dreke ni wasawasa.

³¹ Ni sa lewai ira na veivanua e na ka oqo; sa solia vakalevu na kakana.

³² Sa tabonaka na livaliva e na ligana, ka vakarota me tibika na vanua sa makataka.

³³ A kena rorogo sa tukutuku e na vukuna, ka sa tukuna talega na bulumakau na nona cabe cake.