Jope 35 - Ai Vola Tabu (Vakadewa Makawa Vakavoutaki 2021)

Sa Vosataka ko Ilaiu na Bula ni Vakadonui Koya Vakataki Koya

¹ Sa ia tiko na vosa ko Ilaiu, ka kaya:

² “Ko sa nanuma beka ni sa ka dodonu oqo? Ko sa kaya, ‘Au sa yalododonu ga e na mata ni Kalou’,

³ ni ko sa taroga, ‘A cava na kena yaga vei au? A cava na betena vei au ke sa sega vei au nai valavala ca?’

⁴ Au na sauma vei iko kei iratou talega na nomu i tokani ka tiko vata kei iko.

⁵ Mo ta cake mada ki na lomalagi, ka raica; ka vakaraica na o sa cecere cake vei iko.

⁶ Kevaka ko sai valavala ca, a cava ko sa cakava vua? Ia kevaka sa vakalevutaki na nomu talaidredre, a cava ko sa kitaka vua?

⁷ Kevaka ko sa caka dodonu, a cava ko sa solia vua; se cava sa rawata mai vei iko ko koya?

⁸ Na nomu i valavala ca ena vakamawe ki na mataqali tamata me vakataki iko, kei na nomu caka dodonu, kivei ira na tamata tale eso.

⁹ “Ni sa levu na veivakasaurarataki, era sa tagi kina ko ira era sa vakasaurarataki; era sa qoqolou e na vuku ni ligadra na kaukauwa.

¹⁰ Ia sa sega e dua sa kaya, ‘Sa evei na Kalou na noqu Dauveibuli, ko koya sa solia na kaukauwa e na bogi,

¹¹ ko koya sa vakavulici keda vakalevu, ka vakavulici ira vakalailai na manumanu ni vanua, ka sa vakayacori keda me da vuku cake vei ira na manumanu vuka?’

¹² Era sa tagi mai kea, ka sa sega ni sauma ko koya, e na vuku ni nodra viavialevu na tamata ca.

¹³ E dina sara ni sa sega ni vakarogoca na tagi wale na Kalou, ka sa sega talega ni goleva ko Koya sa Kaukauwa.

¹⁴ Ka vakaevei ni ko sa kaya ni ko sa sega ni kunei koya rawa, ka ni sa tiko ga vua na lewa dodonu, ka ko sa waraki koya tiko!

¹⁵ Ia oqo, ni sa sega ni dauveitotogitaki na nona cudru, ka sa sega ni dau via kila nai valavala ca,

¹⁶ sa dalaga kina ko Jope e na vosa wale, ka sa vakalevutaka na vosa sa sega ni vuku.”