Jope 34 - Ai Vola Tabu (Vakadewa Makawa Vakavoutaki 2021)

Sa Vakatusa ko Ilaiu ni sa Daulewa Vakadodonu na Kalou

¹ A sa vosa tiko ko Ilaiu, ka kaya:

² “Dou rogoca na noqu vosa, koi kemudou na tamata vuku, ka vakarorogo vei au, koi kemudou sa daukila-ka;

³ ni sa dauvakalewa na vosa na daliga, me vaka sa dautovolea na kakana na gusu.

⁴ Tou digitaka me nodatou na lewa dodonu; me tou kila vakataki kedatou na ka e vinaka.

⁵ Ni sa kaya ko Jope, ‘Sa sega na noqu cala, ka sa kauta tani na Kalou na noqu dodonu;

⁶ Me'u lasu beka e na vuku ni noqu dodonu? Na noqu mavoa sa sega ni maca rawa, ka dina ga ni sa sega na noqu cala.’

⁷ Ko cei na tamata sa vakataki Jope, me gunuva na veivakalialiai me vaka na gunu wai,

⁸ ko koya sa sala vata kei ira na daucaka ca, ka sa lako voli kei ira na tamata ca?

⁹ Ni sa kaya ko koya, ‘Sa sega ni yaga vua na tamata me daumarautaki koya na Kalou.’

¹⁰ “O koya oqo mo dou vakarorogo kina vei au, koi kemudou na tamata yalomatua, ni sa ka tabu sara vua na Kalou me kitaka na ka vakasisila, ka sa tabu vua sa Kaukauwa me caka cala.

¹¹ Ni na sauma lesu vua na tamata me vaka na nona cakacaka, ka na kitaka talega me ra sotava na tamata yadua na veika e tautauvata kei na nodra i valavala.

¹² E dina sara ni na sega ni daucaka ca na Kalou, ka na sega talega ni kauta vakatani na lewa ko Koya sa Kaukauwa.

¹³ Ko cei sa lesi koya me lewa na vanua, se ko cei sa vakacolata vua na vuravura taucoko?

¹⁴ Ke sa nanuma na tamata ko koya, ka kauta tale vua na yalona kei na nona i cegu,

¹⁵ ke sa na qai ciba vata kecega na tamata, ka na lesu tale na tamata me kuvu-ni-qele.

¹⁶ “Kevaka ko sa yalomatua, mo rogoca mada oqo; mo vakarorogo ki na noqu vosa.

¹⁷ Me lewa beka ko koya sa cata na ka dodonu? Ko na vakacalai koya beka sa yalododonu ka kaukauwa,

¹⁸ ko koya sa kaya vua na tui, ‘Kemuni sa ca!’ ka kaya vei ira na turaga dokai, ‘Dou sai valavala ca!’;

¹⁹ ko koya sa sega ni vinakati ira loa na turaga, ka sega ni nanumi ira vakalevu na vutuniyau, ka vakalailai na dravudravua, me vaka ni ra sa cakacaka ni ligana ko ira kecega?

²⁰ Era na mate vakasauri sara; era na kidroa na tamata e na lomaloma ni bogi ka lako tani yani, ka ra na kau tani na qaqa ka sega na liga e kauta.

²¹ “Ni sa rai tiko na matana ki nai valavala ni tamata, ka sa raica kecega na nona i lakolako.

²² Sa sega na butobuto se na yaloyalo ni mate me ra vunitaki ira kina na daucaka ca.

²³ Ni sa sega ni tauca ko koya vua na tamata na ka e sega ni dodonu me rau ia kina na veilewai kaya na Kalou.

²⁴ Ena vorolaki ira ga na tamata qaqa ka na sega ni tarogi, ka na lesi ira na tani eso me kedrai sosomi.

²⁵ Ni sa kila na nodra cakacaka ko koya, ka sa vukici ira e na bogi, a ra sa rusa kina.

²⁶ Sa yaviti ira e na matanavotu, me vaka era tamata ca;

²⁷ ni ra lesu tani me ra kua ni muri koya, ka sega ni via nanuma na nona sala,

²⁸ ia e na vukudra sa yaco kina vua na nodra tagi na dravudravua, ka sa rogoca ko koya na nodra tagi era sa rarawa—

²⁹ Ni sa tiko vagagalu ko koya, ko cei ena rawa ni veivakacacani? Ni sa vunia na matana ko koya, ko cei ena rawa ni raici koya, se sa dua na matanitu se dua na tamata?—

³⁰ ka me kakua kina ni lewa na tamata e sega ni kila na Kalou, se ko ira sa daucoriti ira na tamata.

³¹ “Sa bau dua mada na tamata me kaya vua na Kalou, ‘Au sa vosota nai totogi; au na sega ni ia tale na caka ca;

³² mo ni vakavulica mada vei au na veika ka'u sa sega ni kila; kevaka ka'u sa caka ca, ka'u na sega ni ia tale’?

³³ Ena qai sauma lesu tale beka ko koya me rauti iko vinaka, e na vuku ni nomu sa cata? Ni sa dodonu ga mo digidigi kina, ka sega koi au; o koya oqo mo tusanaka kina na ka ko kila.

³⁴ Era na tukuna vei au ko ira na tamata yalomatua, ka ra tukuna na tamata vuku era sa rogoca na noqu vosa:

³⁵ ‘Sa vosa ko Jope ka sa sega vua na kila-ka, ka sa sega ni vuku na nona vosa.’

³⁶ Au sa vinakata me vakatovolei vakaoti mada ko Jope, ka ni sa totaki ira na tamata ca.

³⁷ Ni sa kuria ko koya na nona i valavala ca e na be; sa vakasausau e na kedatou maliwa, ka ia vakalevu na nona vosacataki koya na Kalou.”