Jope 33 - Ai Vola Tabu (Vakadewa Makawa Vakavoutaki 2021)

Sa Vunauci Jope ko Ilaiu

¹ “Ia oqo, mo rogoca mada kina, i Jope, na noqui vunau, ka vakarorogo ki na noqu vosa kecega.

² Raica, ka'u sa qai dalaga; sa vosa oqo na yame ni gusuqu.

³ A noqu vosa sa tukuna na ka dodonu ni lomaqu, kei na tebenigusuqu sa cavuta vakamacala na ka dina.

⁴ Sa buli au na Yalo ni Kalou, ka sa solia vei au na bula nai cegu i Koya sa Kaukauwa.

⁵ Mo sauma mai na noqu vosa, kevaka ko sa rawata; mo tuva vakavinaka na nomu vosa e mataqu; mo tu vakarau.

⁶ Raica, ka'u sa vakataki iko ga e na mata ni Kalou; koi au talega ka'u sa buli mai na qele.

⁷ Raica, ena sega ni vakarerei iko na noqu veivakatarerei; ena sega talega ni bitaki iko na ligaqu.

⁸ “E dina sara ni ko sa vosa oti e daligaqu, ka'u sa rogoca talega na domo ni nomu vosa.

⁹ Ko sa kaya, ‘Au sa savasava, ka sega ni valavala ca; au sa sega ni cala, ka sa sega vei au na ka tawa dodonu.

¹⁰ Raica, sa dauqara ko koya na ka me'u ca kina, sa okati au me'u nona meca;

¹¹ sa vauca na yavaqu e nai vesu kau, ka sa vakaraica na noqu i lakolako kecega.’

¹² “Raica, e na ka oqo ko sa sega kina ni dodonu. Ka'u na vakatakila vei iko: Ni sa ka levu cake sara na Kalou mai na tamata.

¹³ A cava ko sa veivala kaya kina, ka vaka, ‘Sa sega ni sauma ko koya e dua na noqu vosa’?

¹⁴ Ni sa dauvosa na Kalou e na dua na sala, kei na kenai karua, ia sa sega ga ni kila rawa na tamata.

¹⁵ E na tadra, e na raivotu e na bogi, ni sa biti ira na tamata na moce lutu, ni ra sa moce koto e nodra i mocemoce,

¹⁶ sa qai dolava ko koya na daliga ni tamata, ka vakarerei ira e nai vakasala,

¹⁷ me vagolea kina na tamata mai na veika era cakava, ka tarovi ira me ra kakua ni dokadoka,

¹⁸ me tarova na yalona me kakua ni lako ki na rusa, kei na nona bula me kakua ni mate e nai seleiwau.

¹⁹ Sa vakararawataki talega ko koya e na nona i mocemoce, kei na suina e vuqa e na yaluma levu,

²⁰ a sa cata kina na kakana na lomana, kei na yalona na kakana vinaka.

²¹ Sa lila ca na yagona ka sa sega ni raici rawa; kei na suina sa dau sega ni votu, sa qai votu mai.

²² Io, na yalona sa toro voleka ki nai bulubulu, kei na nona bula vei ira na dauveivakarusai.

²³ Kevaka sa tiko vua e dua na agilosi, nai talaki, e le dua vei ira na udolu, me tukuna vua na tamata na nona yalododonu,

²⁴ ka me qai yalololoma vua ko koya, ka kaya, ‘Me vakabulai mada ko koya, me kakua ni lako sobu ki nai bulubulu; au sa kunea na kenai voli me soro kina;

²⁵ ena qai vinaka tale na lewena me vaka na lewe ni gone; ena vuki me cauravou tale.’

²⁶ Ena qai masu vua na Kalou, ka na yalololoma vua ko koya, io ena raica na matana ka reki, ni na solia na Kalou vua na tamata me vaka na nona caka dodonu.

²⁷ Sa raici ira na tamata ko koya, ka sa kaya, ‘Au sai valavala ca, ka vakatanitaka na ka e dodonu, ka sa sega ni saumi lesu tale mai vei au.

²⁸ Sa vakabulai koya ko koya me'u kakua ni lako sobu ki nai bulubulu, ka na raica na rarama na noqu bula.

²⁹ “Raica, sa cakava na ka kecega oqo na Kalou, ka sa cakava vakarua se vakatolu kei na tamata,

³⁰ me vakalesuya tale kina na yalona mai nai bulubulu, me rawa kina ni vakararamataki e na rarama ni bula.

³¹ Mo nanuma vinaka, ko iko Jope, ka vakarorogo vei au; mo tiko lo mada, ka'u na qai vosa.

³² Ke tiko e dua na ka ko via tukuna, mo kaya mai vei au; mo vosa mai, ni'u sa via vakadonui iko.

³³ Kevaka e sega, ia mo vakarorogo vei au; mo tiko lo ga, ka'u na qai vakavulica vei iko na vuku.”