Jope 32 - Ai Vola Tabu (Vakadewa Makawa Vakavoutaki 2021)

Vunauci Iratou nai Tokani i Jope ko Ilaiu

¹ Sa qai mudu na nodratou vosa tiko vei Jope ko iratou na tamata tolutolu oqo, ni sa vakadonui koya tiko.

² Sa qai waqa mai na cudru i Ilaiu na luve i Parakeli na luve i Pusa, mai na vuvale i Rami. A sa waqa na nona cudru vei Jope baleta ni sa vakadonui koya tikoga ka sa sega ni vakadonuya na Kalou.

³ A sa waqa talega na nona cudru vei iratou na nona i tokani tolutolu, ni ratou sa vakacalai Jope tiko, ka sa sega ni vakadinadinataka rawa.

⁴ Ko Ilaiu oqo sa qai waraka tiko me vosa vei Jope, ni ratou sa qase vua.

⁵ Ia ni sa kunea ko Ilaiu ni sa sega nai sau ni taro mai na gusudratou na turaga tolutolu ko ya, sa qai waqa mai na nona cudru.

⁶ A sa qai vosa ko Ilaiu na luve i Parakeli na luve i Pusa, ka kaya: “Koi au ka'u sa gone wale, ia koi kemudou dou sa qase sara; o koya oqo ka'u a tarovi au kina ka rere ni vakatakila vei kemudou na lomaqu.

⁷ Au a kaya, ‘Me vosa mada ko ira na uabula, ka me vakatavuvulitaka na vuku ko ira sa yabaki vuqa.’

⁸ Ia na yalo ga ka tiko e na loma ni tamata, nai cegu i Koya sa Kaukauwa, sa solia na yalomatua.

⁹ Sa sega ni ko ira sa qase sara era sa vuku, se ko ira sa uabula ka ra sa daukila na lewa dodonu.

¹⁰ O koya ka'u a kaya kina, ‘Dou vakarorogo mai vei au; ka'u na vakatakila talega na lomaqu.’

¹¹ “Raica, ka'u a waraka na nomudou vosa, ka'u a vakatudaliga ki na nomudou i vakavuvuli, ni dou a qara na ka mo dou kaya.

¹² Ia ka'u a vakarorogo vei kemudou, ka raica, sa sega e dua vei kemudou sa vakatakila rawa ni sa cala ko Jope, se sauma lesu rawa na nona vosa.

¹³ Qarauna de dou kaya, ‘Keitou sa kunea na vuku; sa rawa ni biuti koya sobu na Kalou, ka segai na tamata.’

¹⁴ Sa sega ni bau vosataki au ko koya, ka'u na sega talega ni sauma vua na nomudou vosa.

¹⁵ “Eratou sa kidroa, eratou sa sega ni vosa tale; Sa sega na vosa me ra kaya.

¹⁶ Ka me'u wawa tiko, ni ratou sa sega ni vosa, ni ratou sa tiko lo, ka sega ni vosa tale?

¹⁷ Koi au talega, ka'u na tukuna na noqu i tavi; koi au talega, ka'u na vakatakila na lomaqu.

¹⁸ Ni sa sinai sara vei au na vosa; sa uqeti au na yalo sa tiko e lomaqu.

¹⁹ Raica, na ketequ sa vaka na waini sa sogo deivaki; sa vaka na bola-ni-waini vou sa voleka ni kacabote.

²⁰ Ka'u na vosa, me'u yalo vakacegu kina; ka'u na dalaga ka me'u sauma mada.

²¹ Au na sega ni vakaduiduitaka e dua na tamata se vosa vakaveicavilaki ki vua e dua.

²² Ni'u sa sega ni kila nai tovo ni veicavilaki— de na qai muduki au vakadua na noqu Dauveibuli!