Jope 29 - Ai Vola Tabu (Vakadewa Makawa Vakavoutaki 2021)

Nai Otioti ni Vosa i Jope

¹ A sa tomana tale na nona vosa ko Jope, ka kaya:

² “Isa, ke sa vaka mada e na veivula eliu na noqu tiko oqo, me vaka na gauna sa dauyadravi au voli kina na Kalou;

³ ni sa daucilava na uluqu na nona cina, ni'u sa daulako e loma ni butobuto e na nona rarama;

⁴ e na gauna ka tu donu kina na noqu bula, ni sa tiko e na noqu vale na veitokani ni Kalou;

⁵ ni sa tiko vata ga kei au ko Koya sa Kaukauwa, ka ratou sa vakavolivoliti au na luvequ;

⁶ ni'u a vuya na noqu i lakolako e na uro ni wai-ni-sucu, kei na vatu sa sova mai vei au na veiuciwai ni waiwai!

⁷ Ni'u a lako yani e loma ni koro ki na matamata-ni-koro, ni'u sa vakarautaka na noqu i tikotiko e na rara ni koro,

⁸ era sa raici au na cauravou ka vunitaki ira, ka ra sa tucake na qase ka wavu tu;

⁹ era sa galu mada na turaga ni vanua, ka tabonaka na gusudra e na ligadra;

¹⁰ era sa tiko lo na turaga dokai, ka sa kabita na loma ni gusudra e cake na yamedra.

¹¹ Ni sa rogoci au na daliga, sa qai vosavakalougatataki au, ia ni sa raici au na mata, sa qai vakadonui au,

¹² baleta ni'u a vakabula na dravudravua ka sa tagi, kei na luveniyali sa sega e dua me vukei koya.

¹³ Sa vosavakalougatataki au ko koya sa voleka ni rusa, ka'u a vakamarautaka na yalona na yada.

¹⁴ Au a vakatikora na yalododonu, ka sa vakasulumi au voli; na noqu lewa dodonu sa vaka nai sulu levu kei nai sala vakaturaga.

¹⁵ Au sa matadra na mataboko, ka yavadra na lokiloki.

¹⁶ Au sa tamadra na dravudravua, ka'u a vakatataro ni veivuke vua ka'u sa sega ni kila.

¹⁷ Ka'u a vorolaka na galegaledra na tawa dodonu, ka kaliraka mai na batidra na ka era kauta tani vakaukauwa.

¹⁸ Au a qai vakananuma, ‘Au na mate e na noqu sova, ka'u na vakavuqataka na noqu siga me tautauvata kei na nuku;

¹⁹ sa teteva na wai na wakaqu, ka sa tiko na tegu e na tabaqu e na bogi taucoko;

²⁰ sa vakavoui tikoga na noqu i ukuuku, ka sa vakaukauwataki tu e ligaqu na noqu dakaititi.

²¹ “Sa ra vakarorogo vei au ko ira na tamata ka wawa tiko, ka tiko lo e na vuku ni noqu veivakasalataki.

²² Ni'u a vosa oti era sa sega ni qai vosa tale, ka sa lutuki ira na noqu vosa me vaka na tegu.

²³ Era sa waraki au me vaka era waraka na uca; ka ra sa dalaga sara me vaka ki na uca taumuri.

²⁴ Ka'u a matadredredre vei ira ni sa yali na nodra yate dei; ka sa sega na ka era kitaka me'u vakaveveku mata kina.

²⁵ Au a digitaka na nodra sala, ka'u a dabe sobu vakaturaga, ka bula voli me vaka na tui kei ira na mataivalu, me vaka e dua sa vakacegui ira era tagi.